(vovworld) - ຍອດຈຳນວນຄົນງານໃນຂົງເຂດກະສີກຳທີ່ໄດ້ຮັບການບຳລຸງສ້າງວິຊາຊີບໃນໄລຍະ 2010 – 2013 ແມ່ນ 660.000 ກວ່າຄົນ. ສ່ວນຫຼາຍແມ່ນສຸມໃສ່ບັນດາຂົງເຂດລ້ຽງສັດ, ປູກຝັງ ແລະ ສິນໃນນຳ້ຕາມຄວາມຕ້ອງການຂອງທ້ອງຖີ່ນ, ທີ່ຕິດພັນກັບໂຄງການກໍ່ສ້າງຊົນນະບົດໃໝ່. ຈາກບັນດາຜົນງານໃນເບື້ອງຕົ້ນ. ວຽກງານບຳລຸງສ້າງວິຊາຊີບສາມາດຕອບສະໜອງຄວາມຮຽກຮ້ອງຕ້ອງການຫັນກະສີກຳ - ຊົນນະບົດເປັນທັນສະໄໝ, ປະກອບສ່ວນຢ່າງຕັ້ງໜ້າເຂົ້າໃນໂຄງການກໍ່ສ້າງຊົນນບົດໃໝ່.
ປະຈຸບັນ, ທົ່ວປະເທດມີຄົນງານໃນຂົງເຂດກະສີກຳທີ່ເຮັດວຽກໂດຍກົງຢູ່ເຂດຊົນນະບົດເກືອບ 25 ລ້ານຄົນ. ໃນນັ້ນມີພຽງ 5 ລ້ານຄົນໄດ້ຮັບການບຳລຸງສ້າງເທົ່ານັ້ນ. ໃນເງື່ອນໄຂເນື້ອທີ່ດິນຜະລິດກະສີກຳນັບມື້ນັບຮັດແຄບລົງ, ຈຳນວນຄົນງານຊົນນະບົດນັບມື້ນັບລຸດລົງນັ້ນ, ເພື່ອສ້າງວຽກເຮັດງານທຳ ແລະ ຍົກສູງລາຍຮັບໃຫ້ຊາວກະສີກອນ, ວຽກງານສອນວິຊາຊີບແມ່ນມີບົດບາດສຳຄັນພິເສດ. ທ່ານ ຫງວຽນມິງຍ້ານ, ຫົວໜ້າກົມຈັດຕັ້ງພະນັກງານ, ກະຊວງກະສີກຳ ແລະ ພັດທະນາຊົນນະບົດ, ໃຫ້ຮູ້ວ່າ ກະຊວງກະສີກຳ ແລະ ພັດທະນາຊົນນະບົດໄດ້ສ້າງບັນດາລາຍການຊົນນະບົດ, ຕິດພັນການເຄື່ອນໄຫວສົ່ງເສີມກະສີກຳ ກັບການເຄື່ອນໄຫວບຳລຸງສ້າງວິຊາຊີບໃຫ້ແກ່ຄົນງານຊົນນະບົດ. ພ້ອມກັນນັ້ນກໍ່ໜູນຊ່ວຍໃຫ້ວຽກງານຈຳໜ່າຍຜະລິດຕະພັນກະເສດ, ການບໍລິການຊົນນະບົດນັບແຕ່ຂັ້ນຕາແສງຂຶ້ນໄປ. ທ່ານ ຫງວຽນມິງຍ້ານ, ແບ່ງປັນວ່າ:
“ປະຈຸບັນ, ຄົນງານຊົນນະບົດຍັງຄົງຜະລິດດ້ວຍຂອບຂະໜາດນ້ອຍໃນຄອບຄົວ. ນັ້ນແມ່ນຈຸດພິເສດຂອງຂະແໜງຊົນນະບົດຫວຽດນາມໃນປະຈຸບັນ. ດັ່ງນັ້ນເຂົາເຈົ້າຕ້ອງໄດ້ຮັບການບຳລຸງສ້າງກ່ຽວກັບອາຊີບກະສີກຳ. ໃນໄລຍະຈະມາເຖິງ, ເມື່ອຕິດພັນກັບໂຄງປະກອບຂະແໜງ ແລະ ແຜນກຳນົດກ່ຽວກັບການກໍ່ສ້າງຊົນນະບົດໃໝ່, ຕ້ອງເອົາໃຈໃສ່ເຖິງວຽກງານບຳລຸງສ້າງວິຊາຊີບກວ່າ ເພື່ອສ້າງເງື່ອນໄຂໃຫ້ຊາວກະສີກອນສາມາດຫັນປ່ຽນຈາກຂົງເຂດນີ້ໄປຍັງຂົງເຂດອື່ນ“.
ນັບແຕ່ປີ 2010 ມາຮອດປະຈຸບັນ, ຈຳນວນຄົນງານຊົນນະບົດໄດ້ຮັບການບຳລຸງສ້າງບັນລຸຄາດໝາຍແຜນການທີ່ໄດ້ວາງອອກ. ຈຳນວນຄົນງານນີ້ໄດ້ຮັບການບຳລຸງສ້າງຢູ່ຮາກຖານບຳລຸງສ້າງວິຊາຊີບ 760 ກວ່າແຫ່ງໃນທົ່ວປະເທດ. ຜູ້ທີ່ໄດ້ຮັບການບຳລຸງສ້າງສ່ວນຫຼາຍແມ່ນໄດ້ສຳພັດກັບເຕັກນິກໃໝ່ເພື່ອນຳໃຊ້ໃນການຜະລິດກະສີກຳ.ດ່ັງນັ້ນສະມັດຕະພາບການອອກແຮງງານຈຶ່ງໄດ້ຮັບການຍົກສູງຂຶ້ນ, ປະຢັດຄ່າຜະລິດ, ເຮັດໃຫ້ລາຍຮັບຂອງຊາວກະສີກອນເພີ່ມຂຶ້ນ. ທ່ານ ເລຈ້ອງກວາງ, ຮອງປະທານຄະນະກຳມະການປະຊາຊົນແຂວງລາຍເຈົາໃຫ້ຮູ້ວ່າ: ພາຍຫຼັງບຳລຸງສ້າງວິຊາຊີບໃຫ້ຄົນງານຊົນນະບົດ, ຕ້ອງມອບໜັງສືຢັ້ງຢືນໃຫ້ເຂົາເຈົ້າ. ເພາະນີ້ກໍ່ແມ່ນເງື່ອນໄຂເພື່ອເຊັນສັນຍາກັບບັນດາວິສາຫະກິດທີ່ເຄື່ອນໄຫວໃນຂົງເຂດກະສີກຳ ແລະ ພັດທະນາຊົນນະບົດ:
“ຂ້າພະເຈົ້າຖືວ່າ ທີໜຶ່ງແມ່ນຕ້ອງບຳລຸງສ້າງຕາມຄວາມຮຽກຮ້ອງຕ້ອງການຂອງຄົນງານເອງ ຫຼືບັນດາວິສາຫະກິດຈັດຕັ້ງການບຳລຸງສ້າງວິຊາຊີບໃຫ້ຄົນງານຕາມຄວາມຮຽກຮ້ອງຕ້ອງການຂອງຕົນ, ຫຼັງຈາກນັ້ນຈາກຜູ້ທີ່ໄດ້ຮັບການບຳລຸງສ້າງວິຊາຊີບເຂົ້າເປັນກຳມະກອນຂອງວິສາຫະກິດເລີຍ, ຫາກບໍ່ບຳລຸງສ້າງຕາມຂະບວນການໂດຍບໍ່ມີຈຸດສຸມ“.
ຈຸດໝາຍຂອງການບຳລຸງສ້າງວິຊາຊີບແມ່ນເພື່ອໃຫ້ປະຊາຊົນສາມາດຜະລິດກະສີກຳແບບທັນສະໄໝໄດ້. ເພື່ອບຳລຸງສ້າງອາຊີບກະສີກຳໃຫ້ແກ່ຄົນງານ ຊົນນະບົດຢ່າງມີປະສິດທິຜົນ, ແມ່ນຕ້ອງອີງຕາມຄວາມຮຽກຮ້ອງຕ້ອງການຢ່າງແທດຈິງຂອງຊາວກະສີກອນ; ຕິດພັນກັບການວາງແຜນຜະລິດກະສີກຳ, ຫັນປ່ຽນໂຄງປະກອບຜົນລະປູກ, ສັດລ້ຽງ. ດ້ານອື່ນ, ຈຸດໝາຍບຳລຸງສ້າງວິຊາຊີບຕ້ອງມຸ່ງໄປເຖິງການແກ້ໄຂວຽກເຮັດງານທຳ, ເອົາໃຈໃສ່ເປັນພິເສດເຖິງສົ້ນອອກ ເພື່ອເພີ່ມລາຍຮັບໃຫ້ແກ່ຊາວກະສີກອນ ແລະ ປະກອບສ່ວນກໍ່ສ້າງຊົນນະບົດໃໝ່, ພ້ອມທັງເໝາະສົມກັບຈຸດພິເສດກ່ຽວກັບລະດັບ, ຈີນຕະນາການຂອງຄົນງານຊົນນະບົດ. ໃນໄລຍະ 2014 – 2015, ກະຊວງກະສີກຳ ແລະ ພັດທະນາຊົນນະບົດສືບຕໍ່ສົມທົບກັບທ້ອງຖີ່ນຕ່າງໆສຸມໃສ່ຜັນຂະຫຍາຍບັນດາລາຍການບຳລຸງສ້າງວິຊາຊີບໃຫ້ແກ່ຄົນງານຊົນນະບົດ. ໃນນັ້ນເອົາໃຈໃສ່ເປັນພິເສດເຖິງຖັນແຖວນັກເຕັກນິກຂະແໜງກະສີກຳ, ຕ້ອງມີໜັງສືຢັ້ງຢືນອາຊີບ, ເພື່ອປະຕິບັດແຜນນະໂຍບາຍເພີ່ມທະວີກຳລັງຄວາມສາມາດໃຫ້ສູນສົ່ງເສີມກະສີກຳຢູ່ທ້ອງຖີ່ນຕ່າງໆ.