(vovworld) - ເພື່ອແນໃສ່ຊ່ວຍປະຊາຊົນຫຼຸດພົ້ນອອກຈາກຄວາມທຸກຍາກຢ່າງໝັ້ນຄົງ, ຂະແໜງກະສິກຳເມືອງຢູຍຊວຽນ, ແຂວງກວາງນາມ, ໄດ້ເປັນຂົວຕໍ່ໃຫ້ບໍລິສັດການຄ້າ ແລະ ຂາເຂົ້າຂາອອກຈຳກັດຫວຽດທັ໋ງ, ໜູນຊ່ວຍຊາວກະສິກອນປູກໝາກແຕງແນວພັນຍີ່ປຸ່ນທົດລອງ. ຮູບແບບນີ້ໄດ້ນຳມາເຊິ່ງປະສິດທິຜົນໃນເບື້ອງຕົ້ນ, ຊ່ວຍປະຊາຊົນພັດທະນາຊີວິດການເປັນຢູ່, ປະກອບສ່ວນຍູ້ແຮງຂະບວນການກໍ່ສ້າງຊົນນະບົດໃໝ່ໃນບໍລິເວນ.
(ພາບອິນເຕີແນດ) ໃນຊຸມມື້ນີ້ຊາວກະສິກອນເມືອງຢູຍຊວຽນ, ແຂວງກວາງນາມ, ພວມກ້າວເຂົ້າລະດູການເກັບກ່ຽວໝາກແຕງແນວພັນຍີ່ປຸ່ນ. ທ່ານ ຫງວຽນແປງ, ຢູ່ຕາແສງຢູຍຈີງ, ເມືອງຢູຍຊວຽນ, ແຂວງກວາງນາມ, ໃຫ້ຮູ້ວ່າ: ນອກຈາກປູກສາລີ, ໝາກຖົ່ວດິນ… ແລ້ວ, ຊາວກະສິກອນຍັງປູກໝາກແຕງແນວພັນຍີ່ປຸ່ນ ຕື່ມອີກ. ໃນລະດູການນີ້, ຄອບຄົວທ່ານ ແປງ ປູກໝາກແຕງໃນເນື້ອທີ່ 1 ພັນກວ່າຕາແມັດ. ຕາມການຄິດໄລ່ຂອງທ່ານແລ້ວ, ປູກໝາກແຕງສາມາດຫາກຳໄລໄດ້ຫຼາຍກວ່າທົບ 4 ເທົ່າເມື່ອທຽບໃສ່ການປູກເຂົ້າ ແລະ ຕົ້ນໄມ້ຊະນິດອື່ນໆ.
“ປູກຕົ້ນໝາກແຕງໃຫ້ສະມັດຕະພາບສູງ. ເມື່ອປູກຕົ້ນໄມ້ກະສິກຳຊະນິດອື່ນແມ່ນບໍ່ຮັບປະກັນສົ້ນອອກ, ສ່ວນປູກໝາກແຕງແນວພັນຍີ່ປຸ່ນ, ຮອດຍາມເກັບກ່ຽວ, ບໍລິສັດຫວຽດທັ໋ງ ກໍ່ມາຊື້ ແລະ ຈ່າຍເງິນຢູ່ກັບທີ່, ດັ່ງນັ້ນຊາວກະສິກອນອຸ່ນອຽນໃຈຫຼາຍ“.
ເພື່ອສ້າງຄວາມສະດວກໃຫ້ປະຊາຊົນ, ນອກຈາກການເກັບຊື້ຜະລິດຕະພັນ, ບໍລິສັດການຄ້າ ແລະ ຂາເຂົ້າຂາອອກຈຳກັດຫວຽດທັ໋ງ ຍັງໜູນຊ່ວຍເງິນເພື່ອເຮັດຮ້ານ ແລະ ແນະນຳວິທີບົວລະບັດ, ເກັບກ່ຽວໝາກແຕງ. ທ່ານ ຫງວຽນເຈື່ອງເຊີນ, ຜູ້ຄຸ້ມຄອງໂຮງງານປຸງແຕ່ງຜະລິດຕະພັນກະເສດ, ບໍລິສັດການຄ້າ ແລະ ຂາເຂົ້າຂາອອກຈຳກັດຫວຽດທັ໋ງ ສາຂາຢູ່ຕາແສງຢູຍເຈົາ, ເມືອງຢູຍຊວຽນ, ແຂວງກວາງນາມ ໃຫ້ຮູ້ວ່າ: ນອກຈາກຕົ້ນໝາກແຕງ, ບໍລິສັດຍັງສົມທົບກັບຂະແໜງກະສິກຳເມືອງຢູຍຊວຽນ ປູກຂີງ, ໝາກເຂືອ…ໃນເນື້ອທີ່ 4 ເຮັກຕາຕາມຮູບການຜະລິດ, ຈຳໜ່າຍຜະລິດຕະພັນອີກ.
“ໃນເບື້ອງຕົ້ນ, ບໍລິສັດຈະລົງທຶນໜູນຊ່ວຍດ້ານອຸປະກອນໃຫ້ແກ່ຊາວກະສິກອນ, ຫຼັງຈາກນັ້ນຈະເກັບຊື້ຜະລິດຕະພັນທັງໝົດ. ຈຸດປະສົງຂອງບໍລິສັດແມ່ນສ້າງເຂດວັດຖຸດິບໃຫ້ແກ່ການຜະລິດ. ຍ້ອນເມືອງຢູຍຊວຽນ ສ້າງເງື່ອນໄຂໃຫ້ບໍລິສັດຫວຽດທັ໋ງ ເກັບຊື້ຜະລິດຕະພັນ, ລາຍຮັບຂອງປະຊາຊົນກໍ່ໄດ້ຮັບການຍົກສູງຂຶ້ນ“.
(ພາບອິນເຕີແນດ)
ປະຈຸບັນ, 150 ຄອບຄົວຢູ່ຕາແສງຢູຍຈູງ, ຢູຍເຈົາ, ຢູຍຈິງ, ຢູຍແທ່ງ, ຢູຍເຕິນ, ເມືອງຢູຍຊວຽນ ພວມປູກໝາກແຕ່ງແນວພັນຍີ່ປຸ່ນໃນເນື້ອທີ່ເກືອບ 13 ເຮັກຕາ. ເມືອງຢູຍຊວນ ໄດ້ຊ່ວຍເຫຼືອຊາວກະສິກອນແນວພັນປູກ, ນອກນັ້ນເຂົາເຈົ້າຍັງໄດ້ຮັບການແນະນຳກ່ຽວກັບເຕັກນິກປູກ, ປ້ອງກັນ ແລະ ຂ້າສັດຕູພືດ. ທ່ານ ວັນບ໋ານຳ, ຫົວໜ້າຫ້ອງການກະສິກຳ ແລະ ພັດທະນາຊົນນະບົດເມືອງຢູຍຊວຽນ, ແຂວງກວາງນາມ, ໃຫ້ຮູ້ວ່າ: ໃນເບື້ອງຕົ້ນ, ຮູບແບບຮ່ວມສຳພັນໃນການຮ່ວມມືຜະລິດຕິດພັນກັບການຈຳໜ່າຍຜະລິດຕະພັນໝາກແຕງແນວພັນຍີ່ປຸ່ນ ໄດ້ນຳມາເຊິ່ງປະສິດທິຜົນທາງດ້ານເສດຖະກິດໃຫ້ແກ່ຊາວກະສິກອນ, ເຮັດໃຫ້ຊີວິດຂອງປະຊາຊົນນັບມື້ນັບດີຂຶ້ນ. ຮູບແບບນີ້ຍັງປະກອບສ່ວນຢ່າງຕັ້ງໜ້າເຂົ້າໃນຂະບວນການກໍ່ສ້າງຊົນນະບົດໃໝ່ໃນບໍລິເວນ.
“ພວກຂ້າພະເຈ້ົາໄດ້ຮ່ວມສຳພັນກັບຫຼາຍວິສາຫະກິດ ແລະ ຊາວກະສິກອນ ເພື່ອລົງນາມໃນສັນຍາປູກໝາກແຕງແນວພັນຍີ່ປຸ່ນສົ່ງອອກ. ຜ່ານຮູບແບບນີ້, ລາຍຮັບຈາກການປູກໝາກແຕງໄດ້ສູງກວ່າທົບ 4 ເຖິງ 5 ເທົ່າເມື່ອທຽບໃສ່ປູກເຂົ້າ. ປະຈຸບັນ, ພວກຂ້າພະເຈົ້າສືບຕໍຜັນຂະຫຍາຍການປູກໝາກແຕງລະດູບານໃໝ່ຕໍ່ລະດູຮ້ອນ ແລະ ລະດູຮ້ອນຕໍ່ລະດູໃບໄມ້ຫຼົ່ນ. “
(ພາບອິນເຕີແນດ)
ເມືອງຢູຍຊວຽນ ມີ 11 ຕາແສງພວມຜັນຂະຫຍາຍການກໍ່ສ້າງຊົນນະບົດໃໝ່, ໃນນັ້ນມີ 4 ຕາແສງທີ່ເປັນແບບຢ່າງ. ມາຮອດປະຈຸບັນ, ບັນດາຕາແສງສ່ວນຫຼາຍບັນລຸໄດ້ 10 ມາດຖານຂຶ້ນໄປ, ໃນນັ້ນຕາແສງຢູຍຈິງ, ຢູຍເຟືອກ ບັນລຸໄດ້ 17 ມາດຖານ. ໃນຊຸມປີຜ່ານມາ, ເມືອງໄດ້ລົງທຶນເກືອບ 330 ຕື້ດົ່ງເພື່ອກໍ່ສ້າງຊົນນະບົດໃໝ່, ໃນນັ້ນມີການປະກອບສ່ວນຢ່າງຫຼວງຫຼາຍຂອງປະຊາຊົນ. ຕາມແຜນການ, ນັບແຕ່ນີ້ເຖິງທ້າຍປີ 2015, 4 ຕາແສງທີ່ເປັນແບບຢ່າງຈະປະຕິບັດສຳເລັດຄາດໝາຍກໍ່ສ້າງຊົນນະບົດໃໝ່.
ປະຈຸບັນ, ເມືອງຢູຍຊວຽນ, ແຂວງກວາງນາມ, ສືບຕໍ່ຮ່ວມສຳພັນກັບວິສາຫະກິດຕ່າງໆ ແລະ ເປີດກວ້າງເນື້ອທີ່ປູກຕົ້ນໄມ້ອຸດສາຫະກຳອື່ນໆ. ຜົນສຳເລັດໃນເບື້ອງຕົ້ນຈາກຮູບແບບປູກໝາກແຕງແນວພັນຍີ່ປຸ່ນ ໄດ້ເປີດທິດທາງໃໝ່ໃນການພັດທະນາກະສີກຳ ກໍ່ຄືຊ່ວຍປະຊາຊົນຢູ່ທີ່ນີ້ມີຊີວິດເປັນປົກກະຕິ, ຫຼຸດຜ່ອນຄວາມທຸກຍາກຢ່າງໝັ້ນຄົງ ແລະ ສຳເລັດການກໍ່ສ້າງຊົນນະບົດໃໝ່ໃນບໍລິເວນ.