(vovworld) - ໃນໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ລັດຖະບານຫວຽດນາມ ໄດ້ຕົກລົງ 7 ມາດຕະການຕົ້ນຕໍເພື່ອປະຕິບັດ 11 ເນື້ອໃນ ເຊິ່ງໂຄງການຈຸດໝາຍແຫ່ງຊາດໄດ້ວາງອອກ, ເພື່ອແນໃສ່ບັນລຸຈຸດໝາຍນັບແຕ່ນີ້ເຖິງປີ 2015 ຈະມີປະມານ 20% ຈຳນວນຕາແສງບັນລຸມາດຖານຊົນນະບົດໃໝ່ ແລະ ຮອດປີ 2020 ຈະມີປະມານ 50% ຈຳນວນຕາແສງບັນລຸມາດຖານຊົນນະບົດໃໝ່, ຕາມມາດຖານແຫ່ງຊາດກ່ຽວກັບຊົນນະບົດໃໝ່ເຊິ່ງລັດຖະບານໄດ້ປະກາດໃຊ້.
ໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່
(ພາບ: google.com.vn)
ຕາມທ່ານ Tang Minh Loc, ຫົວໜ້າກົມເສດຖະກິດຮ່ວມມື ແລະ ພັດທະນາຊົນນະບົດ, ຫົວໜ້າຫ້ອງການຄະນະຊີ້ນຳໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ແລ້ວ, ໃນຈຳນວນ 7 ມາດຕະການປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ນັ້ນ, ມາດຕະການທີໜຶ່ງແມ່ນປະຕິບັດບັ້ນໂຄສະນາຂົນຂວາຍການກໍ່ສ້າງຊົນນະບົດໃໝ່ຢ່າງເລິກເຊິ່ງ ແລະ ກວ້າງຂວາງໃນທົ່ວປະເທດ. ທ່ານ Tang Minh Loc, ໃຫ້ຮູ້ວ່າ:
ສິ່ງດັ່ງກ່າວແມ່ນມີຄວາມຈຳເປັນທີ່ສຸດ ເພາະວ່າ, ນີ້ແມ່ນໂຄງການໃໝ່, ເນື້ອໃນໃໝ່, ດັ່ງນັ້ນຢາກລະດົມທົ່ວລະບົບການເມືອງເຂົ້າຮ່ວມ, ແລະເພື່ອໃຫ້ປະຊາຊົນຕື່ນຕົວເຂົ້າຮ່ວມ ແມ່ນຕ້ອງເຮັດໃຫ້ເຂົາເຈົ້າຮູ້ໄດ້ວ່າ, ກໍ່ສ້າງຊົນນະບົດໃໝ່ແມ່ນຄືແນວໃດ, ແລະ ເມື່ອກໍ່ສ້າງຊົນນະບົດໃໝ່, ວຽກງານຢູ່ຕາແສງ, ຢູ່ໝູ່ບ້ານຈະຄືແນວໃດ, ແລະເຮັດແນວໃດເພື່ອໃຫ້ເຂົາເຈົ້າລະດົມແຫຼ່ງກຳລັງ ແລະ ພະນັກງານຢູ່ໝູ່ບ້ານ, ຕາແສງເຂົ້າຮ່ວມໂຄງການໃຫ້ໄດ້. ສິ່ງສຳຄັນນັ້ນແມ່ນໂຄງການນີ້ໂດຍປະຊາຊົນຕົກລົງວິທີເຮັດ ແລະ ຊົມໃຊ້ໝາກຜົນຈາກວິທີເຮັດນັ້ນ.
ມາດຕະການທີສອງໃນການປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ ແມ່ນການຕົກລົງ, ເລືອກເຟັ້ນບັນດາເນື້ອໃນ, ວຽກງານທີ່ຕ້ອງການໃຫ້ບຸລິມາສິດປະຕິບັດກ່ອນ ໃນວິວັດແຫ່ງການກໍ່ສ້າງຊົນນະບົດໃໝ່ຢ່າງມີວິທະຍາສາດ, ເໝາະສົມກັບສະພາບຕົວຈິງຂອງແຕ່ລະທ້ອງຖີ່ນ, ໃນນັ້ນຕ້ອງຍືດໝັ້ນການວາງແຜນກຳນົດແລະ ປັບປຸງແຜນກຳນົດຊົນນະບົດຄືນໃໝ່ຕາມມາດຖານຊົນນະບົດໃໝ່. ມາຮອດປະຈຸບັນ, ທ້ອງຖີ່ນຕ່າງໆໄດ້ຜັນຂະຫຍາຍການວາງແຜນກຳນົດ ຊົນນະບົດໃໝ່ເທື່ອລະກ້າວແລ້ວ, ທ່ານ Nguyen Van Kha, ຮອງປະທານຄະນະກຳມະການປະຊາຊົນເມືອງນູ້ຍແທ່ງ, ແຂວງກວາງນາມ, ໃຫ້ຮູ້ວ່າ:
”ປີ 2012, ທາງເມືອງພວມຜັນຂະຫຍາຍວຽກງານຈຳນວນໜຶ່ງ, ໃນນັ້ນສູມໃສ່ວຽກງານວາງແຜນກຳນົດ, ສູ້ຊົນເພື່ອໃຫ້ 4 ຕາແສງປະຕິບັດທົດລອງ ຕ້ອງວາງແຜນກຳນົດໃຫ້ສຳເລັດ ແລະ ບັນດາຕາແສງທີ່ຍັງເຫຼືອຕ້ອງສົ່ງເສີມວຽກງານວາງແຜນກຳນົດ. ແຜນນະໂຍບາຍກໍ່ສ້າງຊົນນະບົດໃໝ່ ແມ່ນແຜນນະໂຍບາຍທີ່ຖືກຕ້ອງ ແລະໄດ້ຮັບຄວາມເຫັນດີເຫັນພ້ອມຈາກປະຊາຊົນ. ໃນງົບປະມານຂອງແຂວງ, ສະເພາະໃນປີນີ້ ທາງແຂວງໄດ້ລົງທຶນໃຫ້ເມືອງ 5 ຕຶ້ດົ່ງ ເພື່ອກໍ່ສ້າງຊົນນະບົດໃໝ່”.
ໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່
(ພາບ: google.com.vn)
|
ການປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ລວມມີເລື່ອງສືບຕໍ່ໜູນຊ່ວຍຊາວກະສີກອນກ່ຽວກັບດ້ານວິທະຍາສາດ - ເຕັກນິກ, ການນຳໃຊ້ຄວາມກ້າວໜ້າດ້ານວິທະຍາສາດເຂົ້າໃນຂົງເຂດກະສີກຳ, ຊົນນະບົດໃນໄລຍະຍາວ. ນອກນັ້ນ, ການບຳລຸງສ້າງຖັນແຖວພະນັກງານໃຫ້ແກ່ການກໍ່ສ້າງຊົນນະບົດນັ້ນ ກໍ່ແມ່ນມາດຕະການທີ່ຈຳເປັນ. ທ່ານ Tang Minh Loc ໃຫ້ຮູ້ວ່າ, ໃນຫຼາຍປີຜ່ານມາ, ພັກ ແລະ ລັດຫວຽດນາມ ໄດ້ລົງທຶນຫຼາຍພໍສົມຄວນ ເພື່ອບຳລຸງສ້າງຖັນແຖວພະນັກງານກໍ່ສ້າງຊົນນະບົດໃໝ່. ນອກນັ້ນ, ພັກ ແລະ ລັດ ໄດ້ມີການປ່ຽນໃໝ່ນະໂຍບາຍ, ກົນໄກຈຳນວນໜຶ່ງທີ່ຍັງບໍ່ທັນສອດຄ່ອງ. ທ່ານ Tang Minh Loc ໃຫ້ຮູ້ວ່າ.
”ໃນໝວດນະໂຍບາຍ, ມີບັນດານະໂຍບາຍສິນເຊື່ອ ເພື່ອສົ່ງເສີມປະຊາຊົນກູ້ຢືມທຶນກໍ່ສ້າງຊົນນະບົດໃໝ່, ແລະ ນະໂຍບາຍສົ່ງເສີມບັນດາວິສາຫະກິດລົງທຶນເຂົ້າໃນການກໍ່ສ້າງຊົນນະບົດ, ນະໂຍບາຍດຶງດູດພະນັກງານໜຸ່ມໄປເຮັດວຽກຢູ່ເຂດຫ່າງໄກສອກຫຼີກ. ປະຈຸບັນ, ໄດ້ມີບັນດານະໂຍບາຍດັ່ງກ່າວແລ້ວ.”
ໃນລະບົບມາດຖານເພື່ອປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ຢູ່ຫວຽດນາມ ຍັງມີມາດຖານຮັກສາລາຄາເປັນປົກກະຕິ ເພື່ອໃຫ້ຊາວກະສີກອນອູ່ນອ່ຽນໃຈທຳການຜະລິດຜະລິດຕະພັນກະເສດ, ເຄື່ອງປ່າຂອງດົງ. ຕາມນັ້ນແລ້ວ, ລັດຖະບານໄດ້ມີຂໍ້ຕົກລົງກ່ຽວກັບການຄ້ຳປະກັນດ້ານສະບຽງອາຫານແຫ່ງຊາດ, ໝາຍຄວາມວ່າຕ້ອງຮັກສາເນື້ອທີ່ປູກເຂົ້າໄວ້ໃນໄລຍະຍາວປະມານ 3,8 ລ້ານເຮັກຕາ. ນອກນັ້ນ, ລັດຍັງກຳນົດລາຄາຊື້ເຂົ້າເພື່ອຮັບປະກັນດ້ານກຳໄລໃຫ້ແກ່ຊາວກະສີກອນ ແລະ ມີນະໂຍບາຍປະກັນໄພເພື່ອໃຫ້ຊາວກະສີກອນອຸ່ນອ່ຽນໃຈປູກເຂົ້າໃນເງື່ອນໄຂເກີດຄວາມສ່ຽງຍ້ອນດິນຟ້າອາກາດ, ໄພທຳມະຊາດ, ໂລກລະບາດ. ລັດກໍ່ຮັບປະກັນສ້າງສະພາບແວດລ້ອມດີທີ່ສຸດໃຫ້ບັນດາຮູບການຜະລິດທີ່ເໝາະສົມກັບລະດັບຄວາມຮູ້ຂອງປະຊາຊົນໃນແຕ່ລະຕາແສງ, ແຕ່ລະໝູ່ບ້ານ, ກໍ່ຄືຕົ້ນໄມ້, ສັດລ້ຽງແຕ່ລະປະເພດ, ໝູ່ບ້ານຫັດຖະກຳ… ດ້ວຍຈຸດໝາຍສ້າງຜະລິດຕະພັນສິນຄ້າທີ່ມີມູນຄ່າສູງ, ເພີ່ມລາຍຮັບໃຫ້ແກ່ຊາວກະສີກອນ.
ທີ່ທ່ານຟັງມານັ້ນແມ່ນບົດຂອງວິທະຍຸກະຈາຍສຽງຫວຽດນາມກ່ຽວກັບບັນດາມາດຕະການປະຕິບັດຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່. ໃນລາຍການຊົນນະບົດໃໝ່ສັບປະດາໜ້າ, ພວກເຮົາຈະແນະນຳລາຍລະອຽດກ່ຽວກັບບັນຫານີ້. ເຊີນທ່ານຕິດຕາມຮັບຟັງ.