(vovworld) - ໃນວິວັດແຫ່ງການກໍ່ສ້າງຊົນນະບົດໃໝ່, ວັດທະນະທຳມີບົດບາດສຳຄັນ, ທັງແມ່ນຈຸດໝາຍ, ທັງແມ່ນກຳລັງໜູນຂອງການພັດທະນາ. ການຊອກຫາຮູບແບບຊົນນະບົດໃໝ່ຕາມທິດໝັ້ນຄົງ, ທັງພັດທະນາເສດຖະກິດ ທັງຕອບສະໜອງຄວາມຕ້ອງການດ້ານວັດທະນະທຳ, ການບັນເທິງຂອງປະຊາ ຊົນພຽງແຕ່ປະຕິບັດໄດ້ເມື່ອມີວິທີເຮັດຢ່າງມີຫົວຄິດປະດິດສ້າງຂອງຊາວທ້ອງຖີ່ນ ເທົ່ານັ້ນ. ການກໍ່ສ້າງຊີວິດທາງດ້ານວັດທະນະທຳຢູ່ຕາແສງເມ້ເສີ, ແຂວງຮຶງອຽນ, ເຊິ່ງແມ່ນທ້ອງຖີ່ນຕິດກັບຮ່າໂນ້ຍ ແມ່ນແບບຢ່າງທີ່ດີໃນການກໍ່ສ້າງຊີວິດທາງ ດ້ານວັດທະນະທຳຢູ່ເຂດຊົນນະບົດ.
ຕາແສງເມ້ເສີໃນປະຈຸບັນ
(ພາບອິນເຕີແນດ)
ຕາແສງເມ້ເສີ ລວມມີ 6 ບ້ານຄື: ເມ້ເສີ, ຟູ໋ທິ, ຍ້ານທາບ, ຟູ໋ແຈກ, ຮ່ວາງແຈກ ແລະ ດົ່ງເກວ, ດ້ວຍເນື້ອທີ່ດິນທຳມະຊາດແມ່ນ 664 ເຮັກຕາ, ໃນນັ້ນເນື້ອທີ່ດິນປູກຝັງແມ່ນ 388 ເຮັກຕາ. ແທນທີການປູກເຂົ້າ, ຢູ່ທີ່ນີ້ໄດ້ປູກຕົ້ນໄມ້ໃຫ້ໝາກ, ຕົ້ນໄມ້ປະດັບ. ດ້ວຍການຫັນປ່ຽນຜົນລະປູກໃນຊຸມປີມໍ່ໆມານີ້ ໄດ້ຊ່ວຍໃຫ້ຊາວເມ້ເສີ ສ້າງລາຍຮັບໄດ້ແຕ່ 50 ເຖິງ 100 ລ້ານດົ່ງ/ເຮັກຕາ, ຊຳ້ບໍ່ໜຳສາມາດສ້າງລາຍຮັບໄດ້ແຕ່ 150 ເຖິງ 250 ລ້ານດົ່ງ/ເຮັກຕາ. ນອກນັ້ນ, ຢູ່ເມ້ເສີ ຍັງພັດທະນາຫຼາຍຂະແໜງອາຊີບໃໝ່ອີກຄີ: ອາຊີບກໍ່ສ້າງ, ກົນຈັກ, ປຸງແຕ່ງຜະລິດຕະພັນກະເສດ, ຜະລິດເຂົ້າປຸ້ນ... ອັນໄດ້ສ້າງວຽກເຮັດງານທຳໃຫ້ຄົນງານນັບພັນຄົນ. ແລະ ນຳມາເຊິ່ງລາຍຮັບສູງພໍສົມຄວນໃຫ້ແກ່ປະຊາຊົນຢູ່ທີ່ນີ້. ມາຮອດປະຈຸບັນ, ຕາແສງເມ້ເສີບັນລຸໄດ້ 16/19 ມາດຖານກ່ຽວກັບການກໍ່ສ້າງຊົນນະບົດໃໝ່, ຍັງມີ 3 ມາດຖານຄື: ທາງຄົມມະນາຄົມ, ຊົນລະປະທານ ແລະ ສິ່ງແວດລ້ອມ ຄາດວ່າຈະສູ້ຊົນປະຕິບັດໃຫ້ສຳເລັດໃນປີ 2014 ນີ້. ໃນການກໍ່ສ້າງຊົນນະບົດໃໝ່, ເລື່ອງຫັນປ່ຽນຜົນລະປູກທີ່ມີປະສິດທິຜົນດ້ານເສດຖະກິດສູງ, ເຮັດໃຫ້ຊີວິດຂອງຊາວເມ້ເສີ ໄດ້ຮັບການປ່ຽນໃໝ່ຢ່າງໄວວາ. ພິເສດ, ຢູ່ເມ້ເສີ, ມາດຖານວັດທະນະທຳໃນການກໍ່ສ້າງຊົນນະບົດໃໝ່ໄດ້ຮັບຖືວ່າເປັນສຳຄັນທີ່ສຸດ. ມາຮອດປະຈຸບັນ, ຕາແສງໄດ້ລົງທຶນເກືອບ 1 ຕຶ້ດົ່ງເພື່ອກໍ່ສ້າງໂຮງຮຽນມັດທະຍົມຕອນຕົ້ນ, ໂຮງຮຽນອະນຸບານ ແລະ ໂຮງຮຽນປະຖົມຂອງຕາແສງໃຫ້ບັນລຸມາດຖານແຫ່ງຊາດ. ຫໍສະໝຸດ ແລະ ສູນວັດທະນະທຳຕາແສງກໍ່ໄດ້ຮັບການລົງທຶນກໍ່ສ້າງໃໝ່. ທ່ານ ເຈິ່ນວັນບິ໋ງ, ຮອງເລຂາປະຈຳຄະນະພັກຕາແສງ, ໃຫ້ຮູ້ວ່າ:
”ນັບແຕ່ເລີ່ມຜັນຂະຫຍາຍການກໍ່ສ້າງຊົນນະບົດໃໝ່, ພວກຂ້າພະເຈົ້າໄດ້ຜັນຂະຫຍາຍການກໍ່ສ້າງພື້ນຖານໂຄງລ່າງພ້ອມກັບການສ້າງແບບແຜນວັດທະນະທຳຢູ່ເຂດຊຸມຊົນ. ບັນດາອົງການຈັດຕັ້ງມະຫາຊົນໄດ້ປຸກລະດົມຂະບວນການຕ່າງໆເຊັ່ນ: ຂະບວນການກໍ່ສ້າງຊີວິດດ້ານວັດທະນະທຳຢູ່ເຂດຊຸມຊົນ, ຂະບວນການຕ້ານໄພສັງຄົມ, ຊາວກະສີກອນຜະລິດດຳເນີນທຸລະກິດເກັ່ງ, ຂະບວນການເຮັດອະນາໄມຮັກສາຄວາມສະອາດສວຍງາມ, ສ້າງຂະບວນການຄອບຄົວບໍ່ມີໄພສັງຄົມ, ຂະບວນການຊາວໜຸ່ມກໍ່ຮ່າງສ້າງຕົວ... ບັນດາຂະບວນການເຫຼົ່ານັ້ນໄດ້ປະກອບສ່ວນຮັບປະກັນຊີວິດວັດທະນະທຳໃນມາດຖານກໍ່ສ້າງຊົນນະບົດໃໝ່ຢ່າງມີປະສິດທິຜົນ”.
ການເຄື່ອນໄຫວວັດທະນະທຳຢູ່ຕາແສງເມ້ເສີ, ແຂວງຮຶງອຽນ
(ພາບອິນເຕີແນດ) ເພື່ອບັນລຸໄດ້ຜົນງານດັ່ງກ່າວ, ການນຳຕາແສງເມ້ເສີ ໄດ້ກຳນົດຢ່າງຈະແຈ້ງວ່າ: ການກໍ່ສ້າງຊົນນະບົດໃໝ່ໂດຍປະຊາຊົນເປັນເຈົ້າ. ເພື່ອມີເງິນລົງທຶນກໍ່ສ້າງພື້ນຖານໂຄງລ່າງ, ຕາແສງໄດ້ຂົນຂວາຍປະຊາຊົນປະກອບທີ່ດິນ. ດ້ວຍບັນດາວຽກງານທີ່ແທດຈິງ, ເໝາະສົມກັບຈິດໃຈປະຊາຊົນ, ມີຫຼາຍຄອບຄົວໄດ້ປະກອບທີ່ດິນດ້ວຍຄວາມສະໝັກໃຈເພື່ອກໍ່ສ້າງພື້ນຖານໂຄງລ່າງຄື: ທາງຄົມມະນາຄົມ, ຫໍວັດທະນະທຳ, ໂຮງຮຽນອະນຸບານ. ທ່ານ ຫງວຽນກົງບິ່ງ, ປະຊາຊົນໃນບ້ານຮ່ວາງແຈກ, ຕາແສງເມ້ເສີ, ໃຫ້ຮູ້ວ່າ:
”ແຕ່ລະເທື່ອເມື່ອມີການຂົນຂວາຍ ຕາແສງລ້ວນແຕ່ແຈ້ງໃຫ້ປະຊາຊົນໄດ້ຮັບຊາບ. ເມື່ອນຳໃຊ້ກອງທຶນໂດຍປະຊາຊົນປະກອບ, ທາງຕາແສງກໍ່ເປີດເຜີຍຢ່າງຈະແຈ້ງ, ປະຊາທິປະໄຕ, ດັ່ງນັ້ນປະຊາຊົນຍິ່ງເຊື່ອໝັ້ນ ແລະ ປະກອບທຶນຫຼາຍພໍສົມຄວນ ”.
ດ້ວຍນະໂຍບາຍຫັນເປັນສັງຄົມ ແລະ ວິທີເຮັດທີ່ເໝາະສົມກັບຈິດໃຈປະຊາຊົນ, ຕາແສງຍັງຂົນຂວາຍປະຊາຊົນປະກອບແຮງງານ, ວັດຖຸເພື່ອກໍ່ສ້າງພື້ນຖານໂຄງລ່າງວັດທະນະທຳ. ນອກຈາກບັນດາສະຖານທີ່ລະຫຼິ້ນ. ປະຈຸບັນ, ຕາແສງຍັງມີສູນກິລາກາຍະກຳ 2 ແຫ່ງ ໂດຍປະຊາຊົນລົງທຶນກໍ່ສ້າງ. ບ້ານໃດກໍ່ມີສະໜາມກິລາໃຫ້ປະຊາຊົນແອບກາຍຫຼໍ່ຫຼອມສຸຂະພາບ. ໃນຊີວິດປະຊາຄົມ, ບ້ານໃດກໍ່ມີໜ່ວຍໄກ່ເກ່ຍປອງດອງ. ໜຶ່ງໃນບັນດາຈຸດວັດທະນະທຳທີ່ດີງາມຢູ່ຕາແສງເມ້ເສີ ນັ້ນແມ່ນສະຕິປະຊາຄົມໄດ້ຮັບການສະແດງອອກຜ່ານຄວາມສາມັກຄີ, ຄວາມຮັກແພງຊ່ວຍເຫຼືອເຊິ່ງກັນ ແລະ ກັນ.
ຢູ່ເມ້ເສີ, ສະຕິປະຊາຄົມບ້ານຕາແສງ ໄດ້ປະກອບສ່ວນສ້າງຄວາມເອກອ້າງທະນົງໃຈຕໍ່ມູນເຊື້ອບ້ານເກີດເມືອງນອນ, ດ້ວຍວິທີເຮັດຢ່າງມີຫົວຄິດປະດິດສ້າງ, ຕາແສງເມ້ເສີ ໄດ້ສ້າງບາດກ້າວຫັນປ່ຽນຢ່າງຈະແຈ້ງໃນການພັດທະນາເສດຖະກິດ ແລະ ວັດທະນະທຳ, ປະກອບສ່ວນຍົກສູງຊີວິດທາງດ້ານວັດຖຸ, ຈິດໃຈຂອງປະຊາຊົນໃນການກໍ່ສ້າງຊົນນະບົດໃໝ່.