(vovworld) – ການນຳໃຊ້ ແລະ ຖ່າຍທອດຄວາມກ້າວໜ້າດ້ານວິທະຍາສາດ ເຕັກໂນໂລຢີເພື່ອຮັບໃຊ້ການພັດທະນາເສດຖະກິດ, ສັງຄົມ ຊົນນະບົດຢູ່ເຂດພູດອຍ ໄດ້ນຳມາເຊິ່ງປະສິດທິຜົນດ້ານເສດຖະກິດ - ສັງຄົມຢ່າງແທດຈິງ, ປະກອບສ່ວນປັບປຸງຊີວິດການເປັນຢູ່ຂອງປະຊາຊົນ. ນີ້ກໍ່ແມ່ນໜຶ່ງໃນບັນດາມາດຖານສຳຄັນໃນໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ໄລຍະ 2010-2020.
(ພາບ: ອິນເຕີແນດ)
ໂຄງການລ້ຽງຫອຍນາງລົມ ຜະລິດອາຫານຈາກຫອຍນາງລົມຢູ່ແຂວງບິ່ງດິ້ງ ໄດ້ປະກອບສ່ວນພັດທະນາອາຊີບລ້ຽງຫອຍນາງລົມ, ແກ້ໄຂວຽກເຮັດງານທຳ, ລົບລ້າງຄວາມອຶດຫີວ ຫຼຸດຜ່ອນຄວາມທຸກຍາກໃຫ້ຊາວປະມົງຢູ່ເຂດແຄມທະເລ. ກ່ອນນີ້ຊາວທ້ອງຖີ່ນລ້ຽງຫອຍນາງລົມທຳມະຊາດເປັນຕົ້ນ, ດັ່ງນັ້ນອັດຕາສ່ວນການຕາຍສູງ, ປະລິມານຊີ້ນບໍ່ຫຼາຍ ແລະ ກໍ່ມົນລະພິດເຖິງສິ່ງແວດລ້ອມ, ສົ່ງຜົນສະທ້ອນເຖິງການລ້ຽງຫອຍນາງລົມຄັ້ງຕໍ່ໄປ. ປະຈຸບັນ, ປະຊາຊົນແຄມທະເລໄດ້ນຳໃຊ້ເຕັກນິກຜະລິດແນວພັນ ແລະ ລ້ຽງຫອຍນາງລົມແນວພັນມະຫາສະໝຸດປາຊີຟິກ ແລະ ບິ່ງດິ້ງ. ຍ້ອນເຫດນັ້ນ, ສະມັດຕະພາບລ້ຽງຫອຍນາງລົມຂອງປະຊາຊົນໄດ້ເພີ່ມຂຶ້ນຈາກ 3,2 - 25ໂຕນ/ເຮັກຕາ/ປີ, ລາຄາຫອຍນາງລົມເພີ່ມຂຶ້ນກວ່າ 30% ເມື່ອທຽບໃສ່ຫອຍນາງລົມທຳມະຊາດ. ທ່ານນາງ ຟ້າມທິແທງເຮືອງ, ຫົວໜ້າໂຄງການລ້ຽງຫອຍນາງລົມ, ຜະລິດອາຫານຈາກຫອຍນາງລົມຢູ່ແຂວງບິ່ງດິ້ງ, ໃຫ້ຮູ້ວ່າ:
“ຍ້ອນມີໂຄງການນີ້, ປະຊາຊົນຈຶ່ງຮູ້ນຳໃຊ້ວິທະຍາສາດເຕັກໂນໂລຢີ ເພື່ອເພີ່ມສະມັດຕະພາບລ້ຽງຫອຍນາງລົມຂຶ້ນຈາກ 3 – 8 ເທົ່າເມື່ອທຽບໃສ່ກ່ອນນີ້. ຄຸນນະພາບຫອຍນາງລົມກໍ່ດີທີ່ສຸດ, ພິເສດແມ່ນຮັບປະກັນສຸຂະອະນາໄມອາຫານ. ຍ້ອນເຫດນັ້ນ, ທັງຕະຫຼາດ ແລະ ວິສາຫະກິດລ້ວນແຕ່ມີຄວາມຕ້ອງການຫອຍນາງລົມນີ້ຫຼາຍ. ປະຈຸບັນ, ເຖິງວ່າບໍ່ມີການໜູນຊ່ວຍຂອງໂຄງການກໍ່ຕາມ, ແຕ່ປະຊາຊົນຫຼາຍຄອບຄົວໄດ້ສະໝັກໃຈລົງທຶນໃນເບື້ອງຕົ້ນເພື່ອພັດທະນາອາຊີບລ້ຽງຫອຍນາງລົມນີ້“.
ສ່ວນຢູ່ແຂວງບັກຢາງ, ໃນຊຸມປີຜ່ານມາໄດ້ນຳໃຊ້ວິທະຍາສາດເຕັກໂນໂລຢີເຂົ້າໃນການຜະລິດຢ່າງບໍ່ຢຸດຢັ້ງ ເພື່ອພັດທະນາຂະແໜງກະສິກຳ ແລະ ກໍ່ສ້າງຊົນນະບົດໃໝ່. ກ່ຽວກັບວຽກງານຄົ້ນຄ້ວາວິທະຍາສາດ, ຖ່າຍທອດເຕັກໂນໂລຢີ ແລະ ສົ່ງເສີມກະສິກຳ, ໄລຍະ 2011-2014 ໃນບໍລິເວນແຂວງໄດ້ຜັນຂະຫຍາຍນັບຮ້ອຍຮູບແບບ, ຫົວຂໍ້, ໂຄງການ. ໃນນັ້ນ, ມີບາງຫົວຂໍ້, ໂຄງການດີເດັ່ນໄດ້ຮັບການປະຕິບັດຄື: ໂຄງການຍົກລະດັບສູນແນວພັນເຫດ, ສູນແນວພັນສັດນຳ້, ສູນແນວພັນຕົ້ນໄມ້ໃຫ້ໝາກ. ພິເສດ, ໃນວິວັດແຫ່ງການກໍ່ສ້າງຮູບແບບທົ່ງນາທີ່ເປັນແບບຢ່າງ, ເນື້ອທີ່ ທັງໝົດລ້ວນແຕ່ນຳໃຊ້ກົນຈັກເຂົ້າໃນການຜະລິດ, ພ້ອມທັງຮ່ວມສຳພັນກັບວິສາຫະກິດໃນການຜະລິດ ແລະ ຈຳໜ່າຍຜະລິດຕະພັນ. ຜ່ານຮູບແບບທົ່ງນາທີ່ເປັນແບບຢ່າງ ໄດ້ປະກອບສ່ວນຫຼຸດຜ່ອນຄ່າສົ້ນເຂົ້າ, ປະສິດທິຜົນດ້ານເສດຖະກິດສູງກວ່າເມື່ອທຽບໃສ່ການຜະລິດທົ່ວໄປແຕ່ 10-15%. ທ່ານ ຫງວຽນດຶກກຽນ, ຫົວໜ້າພະແນກວິທະຍາສາດ ແລະ ເຕັກໂນໂລຢີແຂວງບັກຢາງ ສະເໜີວ່າ:
“ຖ້າບັນດາໂຄງການອື່ນໆກໍ່ມີປະສິດທິຜົນຄືໂຄງການນີ້ແມ່ນຈະກະທົບຫຼາຍທີ່ສຸດເຖິງການລົບລ້າງຄວາມອຶດຫີວຫຼຸດຜ່ອນຄວາມທຸກຍາກ ແລະ ກໍ່ສ້າງຊົນນະບົດໃໝ່“.
(ພາບ: ອິນເຕີແນດ) ນັບມື້ນັບມີຫຼາຍຮູບແບບຖ່າຍທອດຄວາມກ້າວໜ້າດ້ານວິທະຍາສາດ, ເຕັກໂນໂລຢີໃໝ່ຖືກນຳໃຊ້ເຂົ້າໃນການຜະລິດກະສິກຳ, ຊ່ວຍຊາວກະສິກອນສຳພັດກັບຂັ້ນຕອນການຜະລິດທີ່ກ້າວໜ້າ, ປະກອບສ່ວນຊຸກຍູ້ການເຕີບໂຕຂອງຂະແໜງກະສິກຳ. ໃນຊຸມປີຜ່ານມາ, ກະຊວງວິທະຍາສາດ ແລະ ເຕັກໂນໂລຢີ ໄດ້ປະຕິບັດການນຳໃຊ້ ແລະ ຖ່າຍທອດ 4.800 ກວ່າເຕັກໂນໂລຢີ ແລະ 2.500 ກວ່າຮູບແບບກ່ຽວກັບການນຳໃຊ້ເຕັກໂນໂລຢີຢູ່ 62 ແຂວງ, ນະຄອນຢ່າງມີປະສິດທິຜົນ. ທ່ານລັດຖະມົນຕີວ່າການກະຊວງວິທະຍາສາດ ເຕັກໂນໂລຢີ ຫງວຽນກວນ, ໃຫ້ຮູ້ວ່າ:
“ຜ່ານໄລຍະແຫ່ງການປະຕິບັດໂຄງການ ສາມາດຢືນຢັນໄດ້ວ່າ, ບ່ອນໃດປະຕິບັດບັນດາໂຄງການຊົນນະບົດເຂດພູດອຍໄດ້, ບ່ອນນັ້ນຈະບັນລຸໄດ້ມາດຖານທີ່ຈຳເປັນຂອງຊົນນະບົດໃໝ່ໂດຍໄວ ແລະ ຢືນຢັນທີ່ຕັ້ງຊົນນະບົດໃໝ່ຂອງຕົນໄດ້. ທີສອງແມ່ນໜູນຊ່ວຍໃຫ້ປະຊາຊົນເຂດຊົນເຜົ່າສ່ວນໜ້ອຍ ຍົກສູງຊີວິດການເປັນຢູ່ ແລະ ຮັບປະກັນປ້ອງກັນຊາດ, ປ້ອງກັນຄວາມສະຫງົບ. ສຸດທ້າຍແມ່ນສຸມໃສ່ຜະລິດຕະພັນຂອງຊາດຈຳນວນໜຶ່ງເຊັ່ນເຂົ້າສານຫວຽດນາມ ທີ່ມີຄຸນນະພາບສູງ, ປາໜັງ ແລະ ເຫດເປັນຜະລິດຕະພັນ ແລະ ຢາ“.
ນັບແຕ່ປີ 2016 ເຖິງປີ 2025, ກະຊວງວິທະຍາສາດເຕັກໂນໂລຢີ ຈະສືບຕໍ່ຍູ້ແຮງການນຳໃຊ້ວິທະຍາສາດ ແລະ ເຕັກໂນໂລຢີ ເພື່ອຂຸດຄົ້ນທ່າແຮງ ແລະ ເງື່ອນໄຂພິເສດສະເພາະຂອງແຕ່ລະເຂດຢ່າງມີປະສິດທິຜົນ. ພ້ອມທັງກໍ່ສ້າງບັນດາຮູບແບບນຳໃຊ້, ຖ່າຍທອດຄວາມກ້າວໜ້າດ້ານເຕັກໂນໂລຢີຢ່າງລະອຽດເພື່ອຂະຫຍາຍອອກຢ່າງກວ້າງຂວາງ. ນີ້ແມ່ນໂອກາດເພື່ອຊ່ວຍປະຊາຊົນສ້າງຄວາມຮັ່ງມີຢ່າງໝັ້ນຄົງຈາກການຜະລິດກະສິກຳ.