(vovworld) - ພາຍຫຼັງກວ່າ 3 ປີ ແຫ່ງການປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ໂສມໜ້າເຂດຊົນນະບົດຫວຽດນາມມີການປ່ຽນແປງຫຼາຍຢ່າງ, ຊີວິດຂອງປະຊາຊົນໄດ້ຮັບການປັບປຸງຢ່າງເຫັນໄດ້ຊັດ. ແຕ່ເພື່ອເຮັດໃຫ້ບັນດາຈຸດໝາຍຂອງໂຄງການກໍ່ສ້າງຊົນນະບົດໃໝ່ປະກົດຜົນເປັນຈິງ. ແຫຼ່ງກຳລັງທັງໝົດຕ້ອງໄດ້ຮັບການລະດົມຢ່າງມີປະສິດທິຜົນ, ພິຕ້ອງເຮັດຄືແນວໃດເພື່ອດຶງດູດປະຊາຄົມວິສາຫະກິດເຂົ້າຮ່ວມໂຄງການກໍ່ສ້າງຊົນນະບົດໃໝ່ເປັນຈຳນວນຫຼວງຫຼາຍ.
ເວທີປາໄສເສີມຂະຫຍາຍບົດບາດຂອງວິສາຫະກິດໃນການກໍ່ສ້າງຊົນນະບົດໃໝ່
(ພາບອິນເຕີແນດ)
ໂດຍແມ່ນວິສາຫະກິດດຳເນີນທຸລະກິດໃນຂົງເຂດກະສີກຳ, ທ່ານ ດ່າມກວາງທັ໋ງ - ຜູ້ອຳນວຍການໃຫຍ່ບໍລິສັດ Agricare ຫວຽດນາມ ຈຳກັດ, ໃຫ້ຮູ້ວ່າ: ໂດຍກຳນົດໄດ້ຄວາມສຳຄັນຂອງການກໍ່ສ້າງຊົນນະບົດໃໝ່, ໄລຍະຜ່ານມາ, ທາງບໍລິສັດໄດ້ຜັນຂະຫຍາຍຫຼາຍຮູບແບບ, ໂຄງການ, ປະຕິບັດການຮ່ວມສຳພັນລະຫວ່າງລັດ, ນັກວິທະຍາສາດ, ນັກທຸລະກິດ ແລະ ຊາວກະສີກອນ, ບໍລິສັດຕິດພັນກັບຊາວກະສີກອນ. ທ່ານ ທັ໋ງ ແບ່ງປັນວ່າ, ຈາກການຮ່ວມສຳພັນນີ້, ວິສາຫະກິດສ້າງໄດ້ເຂດວັດຖຸດິບເປັນປົກກະຕິ, ຕອບສະໜອງຕົວເລກຄາດໝາຍກ່ຽວກັບຄວາມປອດໄພດ້ານທັນຍາຫານ ແລະ ທຳການຜະລິດຖືກຕ້ອງຕາມຂັ້ນຕອນ… ຈາກນັ້ນຍົກສູງລາຍຮັບໃຫ້ແກ່ຊາວກະສີກອນ. ທ່ານ ດ່າມກວາງທັ໋ງ ໃຫ້ຮູ້ວ່າ:
“ປະຈຸບັນພວກຂ້າພະເຈົ້າຜັນຂະຫຍາຍຫຼາຍຮູບແບບເກັບຊື້ຜະລິດຕະພັນກະເສດຂອງຊາວກະສີກອນ, ກໍ່ສ້າງເຄື່ອງໝາຍຜະລິດຕະພັນກະເສດທີ່ມີຄຸນນະພາບສູງເພື່ອຮັບໃຊ້ໃຫ້ຜູ້ບໍລິໂພກ, ອຸປະໂພກໃນປະຈຸບັນ. ລົງທຶນດ້ານແນວພັນ, ຢາຂ້າສັດຕູພືດ, ຝຸ່ນເຄມີໃຫ້ແກ່ຊາວກະສີກອນ. ວິສາຫະກິດໃກ້ຊິດຕິດແທດກັບການເຄື່ອນໄຫວຂອງຊາວກະສີກອນ. ພວກຂ້າພະເຈົ້າພວມມຸ່ງໄປສູ່ພື້ນຖານກະສີກຳເຕັກໂນໂລຢີສູງ, ປະຈຸບັນພວກຂ້າພະເຈົ້າໄດ້ວາງແຜນກຳນົດເຂດວັດຖຸດິບເພື່ອຜະລິດສິນຄ້າຫຼາຍປະເພດດ້ວຍເຕັກໂນໂລຢີສູງ“
ວິສາຫະກິດເກັບຊື້ຜະລິດຕະພັນກະເສດ
(ພາບອິນເຕີແນດ)
ຕາມທ່ານນາງ ຟ້າມທິທູຮັ່ງ, ເລຂາທິການຫ້ອງການອຸດສາຫະກຳ ແລະ ການຄ້າຫວຽດນາມ ແລ້ວ, ຊົນນະບົດແມ່ນຕະຫຼາດໃຫຍ່ ແລະ ເຕັມໄປດ້ວຍຄວາມສາມາດບົ່ມຊ້ອນ. ດັ່ງນັ້ນວິສາຫະກິດຕ້ອງຖືໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ແມ່ນກາລະໂອກາດເພື່ອພັດທະນາ. ຈາກນັ້ນວິສາຫະກິດປະກອບສ່ວນຫັນປ່ຽນໂຄງປະກອບເສດຖະກິດ ໃນການຜະລິດກະສີກຳ, ສ້າງວຽກເຮັດງານທຳ, ເພີ່ມລາຍຮັບໃຫ້ແກ່ຊາວກະສີກອນ. ທ່ານນາງ ຟ້າມທິທູຮັ່ງ, ຖືວ່າ:
“ໃນສະຖານະການໂລກປະຈຸບັນນີ້, ດ້ວຍຄວາມຕ້ອງການດ້ານທັນຍາຫານນັບມື້ນັບເພີ່ມຂຶ້ນ, ດັ່ງນັ້ນບັນດາວິສາຫະກິດຄວນຖືບັນຫານີ້ຄືດັ່ງກາລະໂອກາດໜຶ່ງ. ຈາກນັ້ນມີຫຼາຍໂຄງການລົງທຶນພັດທະນາເຂດຊົນນະບົດ, ເຮັດໃຫ້ຊາວກະສີກອນສຳພັດກັບຕະຫຼາດຢ່າງມີປະສິດທິຜົນກວ່າ ເພື່ອໃຫ້ໂຄງການກໍ່ສ້າງຊົນນະບົດໃໝ່ກ້າວເຂົ້າສູ່ຊີວິດການເປັນຢູ່ຢ່າງມີປະສິດທິຜົນກວ່າ“.
ວິສາຫະກິດເກັບຊື້ຜະລິດຕະພັນກະເສດ
(ພາບອິນເຕີແນດ)
ຄວາມຈິງສະແດງໃຫ້ເຫັນວ່າ, ເພື່ອດຶງດູດ, ສ້າງເງື່ອນໄຂໃຫ້ບັນດາວິສາຫະກິດເຂົ້າຮ່ວມໂຄງການ, ລັດ ແລະ ບັນດາອົງການກ່ຽວຂ້ອງ ຄວນສືບຕໍ່ການປັບປຸງບັນດາກົນໄກນະໂຍບາຍ, ສ້າງເງື່ອນໄຂໃຫ້ບັນດາວິສາຫະກິດຂະໜາດກາງ ແລະ ນ້ອຍພັດທະນາ. ລັດມີມາດຕະການໜູນຊ່ວຍຢ່າງທັນການ, ສ້າງເງື່ອນໄຂໃຫ້ບັນດາວິສາຫະກິດສຳພັດກັບບັນດາຊອງໜູນຊ່ວຍຂອງລັດຄື: ທຶນ, ກຳໄລ, ບັນດາລາຍການສິນເຊື່ອພິເສດໄລຍະຍາວ, ເຮັດໃຫ້ວິສາຫະກິດມີຄວາມອຸ່ນອ່ຽນໃຈ ເພື່ອລົງທຶນໃຫ້ແກ່ການກໍ່ສ້າງຊົນນະບົດໃໝ່. ທ່ານ ຫງວຽນມິນຕ໋ຽນ, ຮອງຫົວໜ້າກົມເສດຖະກິດ ຮ່ວມມື ແລະ ພັດທະນາຊົນນະບົດ, ຮອງຫົວໜ້າຫ້ອງການປະສານງານສູນກາງ ໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ໃຫ້ຮູ້ວ່າ:
“ເພື່ອສ້າງເງື່ອນໄຂສະດວກໃຫ້ບັນດາວິສາຫະກິດລົງທຶນເຂົ້າເຂດຊົນນະບົດ. ໃນໄລຍະຈະມາເຖິງ, ລັດຈະປະກາດໃຊ້ດຳລັດໃໝ່ເພື່ອສ້າງເງື່ອນໄຂສະດວກກວ່າໃຫ້ບັນດາວິສາຫະກິດໃນວິວັດການລົງທຶນ ແລະ ຜະລິດດຳເນີນທຸລະກິດໃນຂົງເຂດກະສີກຳຊົນນະບົດ. ຄຽງຂ້າງນັ້ນ, ພວກຂ້າພະເຈົ້າກໍ່ສະເໜີບັນດາມາດຕະການແກ້ໄຂ ເພື່ອຫຼຸດຜ່ອນຄວາມສ່ຽງ, ໜູນຊ່ວຍການບຳລຸງສ້າງ, ແຮງງານ...“.
ແຂກໄດ້ຮັບເຊື້ອເຊີນເຂົ້າຮ່ວມເວທີປາໄສເສີມຂະຫຍາຍບົດບາດຂອງວິສາຫະກິດໃນການກໍ່ສ້າງຊົນນະບົດໃໝ່
(ພາບອິນເຕີແນດ)
ການກໍ່ສ້າງຊົນນະບົດໃໝ່ແມ່ນແຜນນະໂຍບາຍທີ່ຖືກຕ້ອງ, ເໝາະສົມກັບຈິດໃຈຂອງປະຊາຊົນ, ແຕ່ຖ້າຫາກຂາດການລົງທຶນຂອງວິສາຫະກິດ, ປະຊາຊົນຈະປະສົບກັບຄວາມຫຍຸ້ງຍາກກ່ຽວກັບສົ້ນອອກຜະລິດຕະພັນ ແລະ ຂັ້ນຕອນຂອງການຜະລິດ. ຍ້ອນເຫດນັ້ນ, ເພື່ອເຮັດໃຫ້ໂຄງການບັນລຸປະສິດທິຜົນ ຕ້ອງສ້າງກຳລັງໜູນ, ສ້າງເງື່ອນໄຂສະດວກເພື່ອໃຫ້ບັນດາວິສາຫະກິດລົງທຶນເຂົ້າບັນດາຂົງເຂດທີ່ກ່ຽວຂ້ອງໂດຍກົງເຖິງກະສີກຳ, ຊົນນະບົດ./.