(vovworld) - ພາຍຫຼັງ 2 ປີ ແຫ່ງການຜັນຂະຫຍາຍໂຄງການກໍ່ສ້າງຊົນນະບົດໃໝ່, ໂສມໜ້າຊົນນະບົດຫວຽດນາມ ໄດ້ມີການຫັນປ່ຽນຢ່າງຕັ້ງໜ້າ, ຊີວິດທາງດ້ານວັດຖຸ ແລະ ຈິດໃຈຂອງປະຊາຊົນໄດ້ຮັບການຍົກສູງຂຶ້ນເທື່ອລະກ້າວ… ແຕ່ເພື່ອປະຕິບັດຈຸດໝາຍກໍ່ສ້າງຊົນນະບົດໃໝ່ໃຫ້ສຳເລັດໃນປີ 2020, ຫຼາຍທ້ອງຖີ່ນພວມຈັດຕັ້ງການປະເມີນຜົນ, ຖອດຖອນບົດຮຽນ ເພື່ອແນໃສ່ແກ້ໄຂຄວາມຫຍຸ້ງຍາກ, ສິ່ງທີ່ຍັງຄົງຄ້າງຄື: ວຽກງານໂຄສະນາ, ວຽກງານວາງແຜນກຳນົດ; ການນຳໃຊ້ແຫຼ່ງທຶນ, ການລົງທຶນກໍ່ສ້າງພື້ນຖານໂຄງລ່າງ; ສິ່ງແວດລ້ອມ, ວັດທະນະທຳຊົນນະບົດ…
(ພາບ: google.com.vn)
ພາຍງການຫຼັງ 2 ປີ ແຫ່ງການຜັນຂະຫຍາຍໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ມາຮອດປະຈຸບັນ, ມີ 68% ຈຳນວນຕາແສງໄດ້ເຊັນອະນຸມັດແຜນຮ່າງກໍ່ສ້າງຊົນນະບົດໃໝ່. ປະຈຸບັນ, ນອກຈາກ 11 ຕາແສງປະຕິບັດທົດລອງບັນລຸໄດ້ 15 – 18 ມາດຖານແລ້ວ, ຍັງມີກວ່າ 980 ຕາແສງບັນລຸໄດ້ແຕ່ 10 ມາດຖານຂຶ້ນໄປ. ກ່ຽວກັບແຫຼ່ງກຳລັງໃຫ້ແກ່ການກໍ່ສ້າງຊົນນະບົດໃໝ່, ນອກຈາກງົບປະມານຂອງສູນກາງແລ້ວ, ມາຮອດປະຈຸບັນ, ມີ 53 ແຂວງ, ນະຄອນໄດ້ຈັດແບ່ງງົບປະມານທ້ອງຖີ່ນໃຫ້ແກ່ວຽກງານກໍ່ສ້າງຊົນນະບົດໃໝ່, ດ້ວຍຍອດຈຳນວນເງິນກວ່າ 14.000 ຕຶ້ດົ່ງ, ໃນນັ້ນສູງສຸດແມ່ນນະຄອນ ໂຮ່ຈີມິນ, ວິ້ງຟຸກ ແລະ ຮ່າໂນ້ຍ. ແຕ່ຄວາມຈິງຢູ່ຫຼາຍທ້ອງຖີ່ນໄດ້ສະແດງໃຫ້ເຫັນວ່າ: ໃນຈຳນວນ 19 ມາດຖານທີ່ວາງອອກນັ້ນ, ຍັງມີມາດຖານຈຳນວນໜຶ່ງບໍ່ທັນເໝາະສົມເທື່ອ. ທ່ານ Nguyen Huu Duc, ເລຂາພັກຕາແສງເຟືອກເຫົ້າ, ເມືອງນິງເຟືອກ, ແຂວງນິງທ້ວນ, ໃຫ້ຮູ້ວ່າ:
“ໃນຈຳນວນ 19 ມາດຖານກ່ຽວກັບການກໍ່ສ້າງຊົນນະບົດໃໝ່, ມາດຖານທີ 12 ກ່ຽວກັບໂຄງປະກອບແຮງງານຊົນນະບົດ, ເຊິ່ງກຳນົດຜູ້ເຮັດວຽກງານກະສີກຳກວມ 30% ຈຳນວນແຮງງານ, ແມ່ນປະຕິບັດຍາກທີ່ສຸດ. ດັ່ງນັ້ນຈຶ່ງສະເໜີປັບປຸງມາດຖານນີ້ໃຫ້ເໝາະສົມກັບແຕ່ລະເຂດ, ເພື່ອໃຫ້ຕາແສງໃດກໍ່ສາມາດປະຕິບັດໄດ້. ສ່ວນການໜູນຊ່ວຍຂອງລັດໃຫ້ແກ່ການກໍ່ສ້າງໂຮງຮຽນບັນລຸມາດຖານລະດັບລັດ, ກໍ່ສ້າງຄອງເໝືອງດ້ວຍເບຕົງ…ຍັງປະສົບຄວາມຫຍຸ້ງຍາກດ້ານທຶນຮອນຢູ່. ດັ່ງນັ້ນ, ສະເໜີໃຫ້ບັນດາຂັ້ນ, ຂະແໜງຕ່າງໆສືບຕໍ່ເອົາໃຈໃສ່ເຖິງບັນຫານີ້”
(ພາບ: google.com.vn)
ສ່ວນທ່ານ Le Truong Luu, ຮອງປະທານຄະນະກຳມະການປະຊາຊົນແຂວງ, ຫົວໜ້າຄະນະຊີ້ນຳການກໍ່ສ້າງຊົນນະບົດໃໝ່ແຂວງ ເທື່ອທຽນເຫວ໋, ໃຫ້ຮູ້ວ່າ:
“ທ້ອງຖີ່ນພວກຂ້າພະເຈົ້າໄດ້ຜັນຂະຫຍາຍໂຄງການກໍ່ສ້າງຊົນນະບົດໃໝ່ດີພໍສົມຄວນ. ແຕ່ຍັງມີຫຼາຍບັນຫາຖືກວາງອອກ. ທີໜຶ່ງແມ່ນແຫຼ່ງກຳລັງລະດົມເພື່ອປະຕິບັດໂຄງການກໍ່ສ້າງຊົນນະບົດໃໝ່ຍັງຈຳກັດຢູ່. ທີສອງແມ່ນ, ສຳຫຼັບຊາວກະສີກອນແຂວງເທື່ອທຽນເຫວ໋ ແລ້ວ, ເງື່ອນໄຂເພື່ອພັດທະນາການຜະລິດ, ເພີ່ມລາຍຮັບແມ່ນຍາກທີ່ສຸດ”.
ຄວາມຈິງແລ້ວ, ບັນດາຄວາມຫຍຸ້ງຍາກຕົ້ນຕໍໃນການກໍ່ສ້າງຊົນນະບົດໃໝ່ ໃນປະຈຸບັນ, ແມ່ນປະສິດທິຜົນວຽກງານໂຄສະນາ ເພື່ອເປັນເອກະພາບດ້ານຄວາມຮູ້ກ່ຽວກັບການກໍ່ສ້າງຊົນນະບົດໃໝ່ຍັງບໍ່ທັນໄດ້ດີ. ຄວາມຈິງສະແດງໃຫ້ເຫັນວ່າ, ຢູ່ບັນດາທ້ອງຖີ່ນທີ່ເຮັດວຽກງານໂຄສະນາໄດ້ດີ, ສາມາດປະກອບສ່ວນສົ່ງເສີມບັນດາວິສາຫະກິດ, ບັນດາຜູ້ທີ່ມີໃຈບູນ, ໃຈກຸສົນສະໜັບສະໜູນໃຫ້ແກ່ຂະບວນການ ດ້ວຍການຊ່ວຍເຫຼືອທັງດ້ານການເງິນ ແລະ ວັດຖຸ. ພ້ອມກັນນັ້ນ, ປະຊາຊົນຫຼາຍຄົນກໍ່ໄດ້ບໍລິຈາກທີ່ດິນ, ປະກອບກຳລັງເຫື່ອແຮງຂອງຕົນເພື່ອປັບປຸງ, ຍົກລະດັບທາງຄົມມະນາຄົມຊົນນະບົດ, ບຸລະນະສ້ອມແປງບ່ອນຢູ່ ແລະ ບັນດາກິດຈະກຳສາທາລະນະ… ຍ້ອນເຫດນັ້ນ, ວຽກງານໂຄສະນາຕ້ອງເປັນເອກະພາບຈາກຂັ້ນສູນກາງຕະຫຼອດຮອດຂັ້ນແຂວງ, ເມືອງ, ຕາແສງ, ບ້ານ ແລະ ແຕ່ລະຄອບຄົວ.
(ພາບ: google.com.vn) ນອກນັ້ນ, ໃນການກໍ່ສ້າງຊົນນະບົດໃໝ່ຫຼາຍທ້ອງຖີ່ນໄດ້ສະເໜີເຖິງບັນຫາແຫຼ່ງທຶນ, ໃນນັ້ນລວມມີທຶນກໍ່ສ້າງກິດຈະກຳໄຟຟ້າ, ທາງຄົມມະນາຄົມ, ໂຮງຮຽນ, ສຸກສາລາ ແລະ ແຫຼ່ງທຶນໃຫ້ບັນດາຄອບຄົວພັດທະນາການຜະລິດ. ທ່ານຮອງນາຍົກລັດຖະມົນຕີ Vu Van Ninh, ຫົວໜ້າຄະນະຊີ້ນຳໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ສູນກາງ, ໃຫ້ຮູ້ວ່າ:
”ກ່ຽວກັບແຫຼ່ງທຶນໃນປະຈຸບັນຍັງປະສົບກັບຄວາມຫຍຸ້ງຍາກຫຼາຍ, ມີຫຼາຍແຫຼ່ງທຶນຈາກລັດ, ວິສາຫະກິດ, ສິນເຊື່ອ… ບໍ່ທັນໄດ້ຮັບການເສີມຂະຫຍາຍ. ແຕ່ຍັງມີຫຼາຍທ້ອງຖີ່ນນຳໃຊ້ບ້ວງສິນເຊື່ອຂອງລັດ ແລະ ທະນາຄານດ້ວຍດອກເບ້ຍ 0% ບໍ່ທັນໝົດເທື່ອ. ພວກຂ້າພະເຈົ້າຈະສະເໜີໃຫ້ທະນາຄານແນະນຳບ້ວງສິນເຊື່ອຢ່າງລະອຽດແລະ ສ້າງເງື່ອນໄຂໃຫ້ປະຊາຊົນໄດ້ກູ້ຢືມທຶນຕາມໂຄງການ. ”
(ພາບ: google.com.vn)
ເພື່ອປະຕິບັດຈຸດໝາຍກໍ່ສ້າງຊົນນະບົດໃໝ່ໃຫ້ສຳເລັດໃນປີ 2015, ບັນດາທ້ອງຖີ່ນຄວນເພີ່ມທະວີການເຂົ້າຮ່ວມຂອງອຳນາດການປົກຄອງທຸກຂັ້ນ, ສືບຕໍ່ປັບປຸງຄະນະຊີ້ນຳທຸກຂັ້ນຕາມທິດເພີ່ມທະວີໜ້າທີ່ສະເພາະກິດ; ສຸມໃສ່ປະຕິບັດວຽກງານວາງແຜນກຳນົດ ແລະ ສ້າງແຜນຮ່າງຊົນນະບົດໃໝ່ຂັ້ນຕາແສງທີ່ຮັບປະກັນຄວາມຄືບໜ້າ ແລະ ຄຸນນະພາບ. ໃນໄລຍະຈະມາເຖິງ, ຄະນະປະຈຳຄະນະຊີ້ນຳສູນກາງກ່ຽວກັບການກໍ່ສ້າງຊົນນະບົດໃໝ່ຈະແນະນຳ, ກວດກາປັບປຸງແຜນກຳນົດ, ນັບທັງບັນດາແຜນກຳນົດທີ່ໄດ້ຮັບການເຊັນອະນຸມັດແລ້ວ, ຄວນມີການແນະນຳຢ່າງລະອຽດ, ເໝາະສົມກັບສະພາບຕົວຈິງ, ກຳນົດໜ້າທີ່ຈຸດສຸມເພື່ອປະຕິບັດຢ່າງເໝາະສົມ. ທ່ານຮອງນາຍົກລັດຖະມົນຕີ Vu Van Ninh, ຊີ້ແຈ້ງວ່າ:
“ຂ້າພະເຈົ້າຖືວ່າສິ່ງສຳຄັນແມ່ນຕ້ອງສະຫຼຸບຮູບແບບ, ຄົ້ນພົບວິທີປະຕິບັດໄດ້ດີ, ມີຫົວຄິດປະດິດສ້າງ, ກໍ່ຄືແບບຢ່າງຢູ່ທ້ອງຖີ່ນຕ່າງໆ. ພ້ອມທັງຕ້ອງເອົາໃຈໃສ່ເຖິງການແນະນຳ, ກວດກາກ່ຽວກັບແຜນກຳນົດຢູ່ຕາແສງຕ່າງໆ; ພິເສດແມ່ນເລື່ອງສ້າງແຜນຮ່າງກໍ່ຕ້ອງເໝະສົມກັບສະພາບຕົວຈິງຂອງທ້ອງຖີ່ນ”
ຄະນະຊີ້ນຳສູນກາງກ່ຽວກັບການກໍ່ສ້າງຊົນນະບົດໃໝ່ໃຫ້ຮູ້ວ່າ ສິ່ງທີ່ພັກ, ລັດຖະບານເອົາໃຈໃສ່ທີ່ສຸດ, ນັ້ນແມ່ນກໍ່ສ້າງຊົນນະບົດໃໝ່ບໍ່ແມ່ນປະຕິບັດໃຫ້ໄດ້ 19 ມາດຖານເພື່ອໄດ້ຮັບນາມມະຍົດເທົ່ານັ້ນ, ຫາກສິ່ງສຳຄັນນັ້ນແມ່ນ ຕ້ອງປ່ຽນໃໝ່ຊີວິດການເປັນຢູ່ໂດຍພື້ນຖານ, ແລະ ພັດທະນາການຜະລິດຂອງປະຊາຊົນໃຫ້ໄດ້.