(vovworld)-ການສອນວິຊາຊີບໃຫ້ແກ່ຊາວກະສິກອນແມ່ນປັດໄຈສຳຄັນເພື່ອຕອບສະຫນອງໃຫ້ແກ່ວິວັດການກໍ່ສ້າງຊົນນະບົດໃຫມ່ທີ່ພວມໄດ້ຮັບການຜັນຂະຫຍາຍຢູ່ຫວຽດນາມ. ແຂວງ ອຽນບາຍ ແມ່ນແຂວງຫນຶ່ງຢູ່ເຂດພູສູງທາງພາກເຫນືອຫວຽດນາມ ທີ່ຍັງປະສົບກັບຄວາມຫຍຸ້ງຍາກຫລາຍຢ່າງ ແຕ່ມີຄວາມເອົາໃຈໃສ່ເປັນພິເສດເຖິງວຽກງານສອນວິຊາຊີບ, ສ້າງວຽກເຮັດງານທຳໃຫ້ແກ່ຄົນງານພາຍຫລັງໄດ້ຮຽນວິຊາຊີບ.
ການສອນວິຊາຊີບໃຫ້ແກ່ຊາວກະສິກອນແມ່ນປັດໄຈສຳຄັນ
photo:internet
|
ນາຍົກລັດຖະມົນຕີຫວຽດນາມ ໄດ້ປະກາດໃຊ້ຂໍ້ຕົກລົງເລກທີ 1956/ຕລ-ນຍ ໂດຍອະນຸມັດແຜນຮ່າງ “ສອນວິຊາຊີບໃຫ້ແກ່ຄົນງານຊົນນະບົດໄລຍະ 2010-2020 ດ້ວຍຈຸດໝາຍ: ສະເລ່ຍແຕ່ລະປີ ສອນວິຊາຊີບໃຫ້ແກ່ຄົນງານຊົນນະບົດປະມານ 1 ລ້ານຄົນ, ໃນນັ້ນ ບຳລຸງສ້າງໃຫ້ພະນັກງານ, ລັດຖະກອນໃນຕາແສງປະມານ 100.000 ເທື່ອຄົນ. ຄວາມຈິງ ມາຮອດປະຈຸບັນ, ເລື່ອງຜັນຂະຫຍາຍວຽກງານສອນວິຊາຊີບຕິດພັນກັບໂຄງການກໍ່ສ້າງຊົນນະບົດໃຫມ່ໃນໄລຍະຜ່ານມາ ໄດ້ ແລະ ພວມເສີມຂະຫຍາຍຢ່າງມີປະສິດທິຜົນໃນເບື້ອງຕົ້ນ, ເປັນຕົ້ນຢູ່ບັນດາແຂວງພູດອຍ, ເຂດຫ່າງໄກສອກຫລີກ. ໃນໄລຍະ 3 ປີຜ່ານມາ, ແຂວງ ອຽນບາຍ ມີຄົນງານກວ່າ 18.500 ຄົນໄດ້ຮຽນວິຊາຊີບ, ໃນນັ້ນ ມີຄົນງານໃນຄອບຄົວທຸກຍາກກວມ 32.5%. ບັນດາຮາກຖານການຊ່າງໄດ້ສອນໃຫ້ຄົນງານ 39 ວິຊາຊີບຕົ້ນຕໍຄື: ການປູກຝັງ, ປຸງແຕ່ງຜະລິດຕະພັນກະເສດ, ລ້ຽງສັດ, ຕຳ່ແຜ່ນແພພື້ນເມືອງ, ປູກຜັກປອດສານພິດ,ການກໍ່ສ້າງ…. ການເລືອກເຟັ້ນວິຊາຊີບ ແມ່ນອີງໃສ່ຄວາມຕ້ອງການຕົວຈິງ, ຈາກການຄາດຄະເນຄວາມຕ້ອງການຮຽນວິຊາຊີບຂອງຄົນງານ, ການຜັນແປ່ຂອງຕະຫລາດແຮງງານ. ຜ່ານການຮຽນວິຊາຊີບ, ຊີວິດການເປັນຢູ່ຂອງບັນດາຄອບຄົວຢູ່ເຂດຊົນນະບົດມີຄວາມເປັນປົກກະຕິກວ່າ, ຄົນງານມີວຽກເຮັດງານທຳ, ປະກອບສ່ວນຊຸກຍູ້ການຜະລິດ, ພັດທະນາເສດຖະກິດໃຫ້ແກ່ບັນດາຄອບຄົວ, ພ້ອມທັງເພີ່ມລາຍຮັບ, ຫລຸດຜ່ອນຄວາມອຶດຫິວແບບຍືນຍົງ. ອ້າຍ ເລື່ອງວັນອອນ ຢູ່ ຕາແສງ ເຫງ້ຍເລີ້ຍ ເທດສະບານ ເຫງ້ຍໂລ້ ໃຫ້ຮູ້ວ່າ:
“ກ່ອນນີ້ ພວກຂ້າພະເຈົ້າເຮັດອາຊີບກະສິກຳ, ແຕ່ພາຍຫລັງໄດ້ຮຽນວິຊາຊີບກໍ່ສ້າງ, ພວກຂ້າພະເຈົ້າມີວຽກເຮັດງານທຳ, ຫລຸດຜ່ອນຄວາມຫຍຸ້ງຍາກ,ສາມາດສ້າງລາຍຮັບສະເລ່ຍ 170-180.000ດົງ/ມື້. ”
ປະຈຸບັນ ຖັນແຖວຄູສອນວິຊາຊີບຢູ່ ແຂວງ ອຽນບາຍ ໄດ້ຮັບການເພີ່ມທະວີນັບທັງຈຳນວນ ແລະ ລະດັບວິຊາສະເພາະ. ປະຈຸບັນ ທົ່ວແຂວງ ມີຄູສອນເກືອບ 300 ຄົນ ແລະ ສອນວິຊາຊີບຢູ່ 29 ຮາກຖານ. ນອກນັ້ນ ບັນດາຮາກຖານສອນວິຊາຊີບ ກໍໄດ້ດຶງດູດພະນັກງານ, ກຳມະກອນເຕັກນິກ, ຜູ້ມີສີມືການຊ່າງສູງ ມາຈາກບັນດາອົງການ, ວິສາຫະກິດ ເຂົ້າຮ່ວມການສອນວິຊາຊີບ. ຄຽງຄູ່ກັນນັ້ນ, ການຈັດຕັ້ງສອນວິຊາຊີບໃຫ້ແກ່ຄົນງານຊົນນະບົດແມ່ນປະຕິບັດຕາມຄວາມຕ້ອງການຮຽນວິຊາຊີບ, ທາງແຂວງ ແລະ ບັນດາຮາກຖານສອນວິຊາຊີບ ກໍໄດ້ເອົາໃຈໃສ່ກໍ່ສ້າງ, ພັດທະນາ 47 ຮູບແບບທົດລອງ ເພື່ອໃຫ້ເກືອບ 1.500 ຄົນ ມາທັດສະນະສຶກສາ, ຊອກຮູ້ຕົວຈິງ. ມີຫລາຍຮູບແບບທົດລອງມີປະສິດທິຜົນສູງຄື: ຮູບແບບເຕັກນິກປູກເຂົ້າ, ປູກມອນລ້ຽງມ້ອນ, ປູກໄມ້ໄຜ່ຢູ່ເຈີນອຽນ, ປຸງແຕ່ງຊາ, ປູກເຫັດຢູ່ ວັນເຈີນ…. ເຖິງຢ່າງໃດກໍຕາມ, ວິວັດການຜັນຂະຫຍາຍແຜນຮ່າງສອນວິຊາຊີບໃຫ້ແກ່ຄົນງານຢູ່ເຂດຊົນນະບົດ ຍັງປະສົບກັບຄວາມຫຍຸ້ງຍາກ, ຂໍ້ຕິດຂັດຄື: ວຽກງານສົມທົບກັນລະຫວ່າງອຳນາດການປົກຄອງ ແລະ ອົງການຮັບຜິດຊອບວິຊາສະເພາະໃນວິວັດການປະຕິບັດ. ທ່ານ ຮ່ວາງດືກເວື້ອງ, ຫົວຫນ້າພະແນກແຮງງານທະຫານເສຍອົງຄະນ ແລະ ສັງຄົມ ແຂວງ ອຽນບາຍ ໃຫ້ຮູ້ວ່າ:
“ແຜນຮ່າງ 1956 ໄດ້ຮັບການຜັນຂະຫຍາຍຢ່າງ ເລິກເຊິ່ງ, ກວ້າງຂວາງ, ມີຄວາມໝາຍໃນວຽກງານຫລຸດຜ່ອນຄວາມທຸກຍາກ ແລະ ກໍ່ສ້າງຊົນນະບົດໃຫມ່. ພວກຂ້າພະເຈົ້າໄດ້ເປັນເສນາທິການໃຫ້ແຂວງ ເພີ່ມທະວີຮັບປະກັນຄຸນນະພາບການສອນວິຊາຊີບ, ຍົກສູງອັດຕາສ່ວນຄົນງານມີວຽກເຮັດງານທຳພາຍຫລັງຮຽນວິຊາຊີບ. ຍູ້ແຮງວຽກງານໂຄສະນາ, ຍົກສູງຄວາມຮັບຮູ້, ຄວາມຮັບຜິດຊອບຂອງທຸກຂັ້ນ, ຂະແຫນງການ ແລະ ປະຊາຊົນໃນການປະຕິບັດແຜນຮ່າງ 1956, ເພີ່ມທະວີງົບປະມານ, ອຸປະກອນໃຫ້ແກ່ບັນດາຮາກຖາການຊ່າງ ເພື່ອຕອບສະຫນອງຄວາມຕ້ອງການສອນວິຊາຊີບ, ຄວາມຕ້ອງການຂອງວິສາຫະກິດ ແລະ ຄົນງານ. ປະຕິບັດການເຊັນສັນຍາສາມຝ່າຍ ລະຫວ່າງຫົວຫນ່ວຍຕ້ອງການສອນວິຊາຊີບ, ວິສາຫະກິດ ແລະ ຮາກຖານການຊ່າງ ເພື່ອເສີມຂະຫຍາຍປະສິດທິຜົນຂອງແຜນຮ່າງ.”
ຄົນງານມີວຽກເຮັດງານທຳ, ປະກອບສ່ວນຊຸກຍູ້ການຜະລິດ
photo:internet
|
ຕາມການສະຖິຕິແລ້ວ, ປະຈຸບັນ ອັດຕາສ່ວນຄົນງານມີວຽກເຮັດງານທຳ ພາຍຫລັງຮຽນວິຊາຊີບຢູ່ບໍລິເວນແຂວງ ອຽນບາຍ ບັນລຸປະມານ 65%. ນີ້ແມ່ນຕົວເລກທີ່ເປັນຫນ້າຮັບຮູ້ສຳລັບທ້ອງຖິ່ນຢູ່ເຂດພູດອຍທີ່ຍັງປະສົບກັບຄວາມຫຍຸ້ງຍາກຫລາຍຢ່າງ.
ການສອນວິຊາຊີບໃຫ້ແກ່ຄົນງານຊົນນະບົດ ແມ່ນວຽກງານທີ່ມີລັກສະນະສັງຄົມ ແລະ ວັດທະນະທຳມະນຸດຢ່າງເລິກເຊິ່ງ, ສະນັ້ນພວມໄດ້ຮັບຄວາມເຫັນດີເຫັນພ້ອມຢ່າງສູງຈາກປະຊາຊົນ. ວຽກງານສອນວິຊາຊີບໃຫ້ແກ່ຊາວກະສິກອນຢູ່ແຂວງ ອຽນບາຍ, ບໍ່ພຽງແຕ່ປະກອບສ່ວນເຂົ້າໃນວິວັດການລົບລ້າງຄວາມອຶດຫິວຫລຸດຜ່ອນຄວາມທຸກຍາກເທົ່ານັ້ນ ຫາກຍັງສ້າງກຳລັງຫນູນຊຸກຍູ້ໂຄງການກໍ່ສ້າງຊົນນະບົດໃຫມ່, ປະກອບສ່ວນສ້າງກຳລັງແຮງງານມີຄວາມຮູ້, ຄວາມຊຳນານໃນການຜະລິດ, ເໝາະສົມກັບຄວາມຕ້ອງການພັດທະນາຂອງພື້ນຖານກະສິກຳປະຈຸບັນ.