ທ່ານນາງຮ່ວຽນແອງ (ຊຸດດຳ) ແນະນຳຈັກຂົ້ວກາເຟທີ່ຫາກໍ່ລົງທຶນເພື່ອພັດທະນາກາເຟແປ້ງ

   ສະຫະກອນກະສິກອນ ຍຸດຕິທຳ ໂປໂກ, ເທດສະບານເມືອງ ດັກຮ່າ, ເມືອງດັກຮ່າ, ແຂວງກອນຕຸມ ມີສະມາຊິກ 113 ຄົນ, ມີເນື້ອທີ່ດິນປູກກາເຟ 172 ເຮັກຕາ ຊື່ງໄດ້ສະໜອງວັດຖຸດິບທີ່ມີຄຸນນະພາບສູງໃຫ້ແກ່ບັນດາຄູ່ຮ່ວມມືສາກົນ. ເມື່ອເກີດໂລກລະບາດໂຄວິດ 19, ການເຄື່ອນໄຫວຂອງສະຫະກອນປະສົບກັບຄວາມຫຍຸ້ງຍາກທີ່ສຸດ ດ້ວຍບັນດາໃບສັ່ງຊື້ຖືກຢຸກສະງັກ, ຄ່າຂົນສົ່ງທາງທະເລໄດ້ເພີ່ມຂຶ້ນສູງ…ເພື່ອຮັກສາການຜະລິດ, ສະຫະກອນໄດ້ສົ່ງເສີມບັນດາສະມາຊິກ ປູກຕົ້ນຖົ່ວ, ງາເຕື່ມອີກ ເພື່ອມີລາຍຮັບເພີ່ມເຕີ່ມ, ທັງຮັກສາທາດບຳລຸງໃຫ້ແກ່ດິນ ແລະ ຫລຸດຜ່ອນຄ່າຊື້ຝຸ່ນໃຫ້ແກ່ຕົ້ນກາເຟ. ຈາກຕົ້ນກາເຟ ແລະ ບັນດາຜົນລະປູກອື່ນໆປະສົມກັນນັ້ນ, ສະຫະກອນໄດ້ພັດທະນາ 2 ຜະລິດຕະພັນຂາຍຍ່ອຍຢູ່ພາຍໃນປະເທດຄື: ແປ້ງກາເຟຕອງ    ດ້ວຍອັດຕາສ່ວນໝາກກາເຟສຸກ 100% ແລະ ຊາຈາກເຂົ້າກ້ອງ   ເພື່ອບຳລຸງສຸຂະພາບ. ຍ້ອນເຫດນັ້ນ, ໃນປິ 2020, ຍອດລາຍຮັບຂອງສະຫະກອນຍັງບັນລຸກ່ວາ 18 ຕື້ດົ່ງ. ທ່ານນາງຟ້າມທິຮ່ວຽນແອງ ປະທານສະພາບໍລິຫານ ສະຫະກອນກະສິກອນ ຍຸດຕິທຳ ໂປໂກ ເວົ້າວ່າ:

   ກ່ອນນີ້ ທາງສະຫະກອນພຽງແຕ່ໄດ້ສົ່ງອອກ ແລະ ຂາຍສົ່ງເທົ່ານັ້ນ, ແຕ່ປະຈຸບັນກໍ່ສ້າງລະບົບເພື່ອສາມາດຂາຍໃຫ້ລູກຄ້າພາຍໃນປະເທດໄດ້. ພ້ອມກັນນັ້ນກໍ່ໄດ້ຮ່ວມມືກັບບັນດາຜູ້ຈຳໜ່າຍອື່ນໆ ເພື່ອສ້າງເປັນລະບົບຂາຍເຄື່ອງອອນລາຍ.

 ສວນມັກກາພວມໃຫ້ໝາກຂອງສະຫະກອນມັກກາ ເຍິນຮົ່ວ

    ສ່ວນສຳລັບສະຫະກອນ ມັກກາ ເຍິນຮົ່ວ ຢູ່ບ້ານ 3, ຕາແສງ ກອນດ່າວ, ເມືອງ ກັກໂຕ ແລ້ວ, ເຖິງວ່າ ໂລກລະບາດໂຄວິດ 19 ໄດ້ເຮັດໃຫ້ການເຄື່ອນໄຫວໃນຕະຫຼາດຖືກຢຸດສະງັກ ແລະ ລາຄາຜະລິດຕະພັນຖືກຫລຸດລົງກໍ່ຕາມ, ແຕ່ສະຫະກອນທີ່ມີສະມາຊິກ 9 ຄົນນີ້ ຍັງຄົງໄດ້ລົງທຶນຖືກຕ້ອງຕາມຂັ້ນຕອນຄື: ເປີດກ້ວາງເນື້ອທີ່ດິນປູກໃໝ່, ນຳເຂົ້າສາຍພານປອກເປຶອກ, ອົບແຫ້ງ ແລະ ເກັບຮັກສາຜະລິດຕະພັນເຂົ້າເຄື່ອນໄຫວ. ເມື່ອແບ່ງປັນກ່ຽວກັບເຂັດລັບຮັກສາການເຄື່ອນໄຫວຂອງສະຫະກອນໃຫ້ເປັນປົກກະຕິນັ້ນ, ທ່ານ ຫງວຽນວັນກວຽດ, ປະທານສະພາບໍລິຫານ ທັງເປັນຜູ້ອຳນວຍການ ສະຫະກອນ ມັກກາ ເຍິນຮົ່ວ ໃຫ້ຮູ້ວ່າ:

   ໃນໄລຍະເກີດໂລກລະບາດ, ບັນດາສະມາຊິກໃນສະຫະກອນໄດ້ພ້ອມກັນເຮັດ, ພ້ອມກັນຄົ້ນຄ້ວາ, ພ້ອມກັນພັດທະນາ ແລະ ພ້ອມກັນປະກອບທຶນ ເພື່ອມີກຳລັງແຮງໃຫ່ຍຫຼວງກ່ວາ. ຕົ້ນ ມັກກາ ແມ່ນຕົ້ນໄມ້ຊະນິດໃໝ່ທີ່ຕ້ອງມີການຄົ້ນຄ້ວາ. ແຕ່ລະສະມາຊິກໃນສະຫະກອນ ລ້ວນແຕ່ມີທ່າແຮງທີ່ແຕກຕ່າງກັນ, ພ້ອມກັນຮ່ວມມືເພື່ອພັດທະນາ ແລະ ນຳມາເຊິ່ງຊີວິດທີ່ດີງາມກ່ວາ ໃຫ້ແກ່ສະມາຊິກທຸກຄົນໃນສະຫະກອນ.

  ຕາມການສະຖິຕິຂອງສະຫະພັນສະຫະກອນແຂວງ ກອນຕຸມ ແລ້ວ, ຈຳນວນສະຫະກອນໃນແຂວງປະມານ 80% ຖືກຜົນກະທົບຈາກໂລກລະບາດໂຄວິດ 19 ແຕ່ຈຳນວນເຫຼົ່ານັ້ນເກືອບທັງໝົດ ລ້ວນແຕ່ມີການພັດທະນາດີ ແລະ ກຽມພ້ອມໃນໄລຍະຕໍ່ໄປໄດ້ ເມື່ອໂລກລະບາດຖືກຄວບຄຸມ. ຕາມທ່ານ ຫງວຽນເລິມແກັງ, ປະທານ ສະຫະພັນສະຫະກອນແຂວງ ກອນຕຸມ ແລ້ວ, ໃນຂະບວນວິວັດແຫ່ງການຜ່ານຜ່າຄວາມຫຍຸ້ງຍາກ ເພື່ອຮັກສາການຜະລິດດຳເນີນທຸລະກິດ, ຄວາມສາມັກຄີ, ເອກະພາບຂອງສະມາຊິກສະຫະກອນ; ຄວາມຂະຫຍັນຂັນເຄື່ອນ, ມານະພະຍາຍາມຂອງຄະນະບໍລິຫານບັນດາສະຫະກອນ ແມ່ນສຳຄັນທີ່ສຸດ. ເພື່ອໜູນຊ່ວຍຄວາມສາມາດຮັບມື ແລະ ຮັກສາການເຄື່ອນໄຫວເປັນປົກກະຕິໃຫ້ບັນດາສະຫະກອນສະມາຊິກນັ້ນ, ທາງສະຫະພັນສະຫະກອນແຂວງ ກອນຕຸມ ຈະສືບຕໍ່ເສີມຂະຫຍາຍບາດບົດປະສານງານໃຫ້ເປັນຢ່າງດີ, ຕິດພັນບັນດາສະມາຊິກຢ່າງມີປະສິດທິຜົນ. ທ່ານ ຫງວຽນເລິມແກັງ ຢືນຢັນວ່າ:

     ສະຫະພັນສະຫະກອນແຂວງ ຈະສືບຕໍ່ເພີ່ມທະວີການເປັນເສນາທິການ, ສ້າງຄະນະຊີ້ນຳພັດທະນາເສດຖະກິດລວມໝູ່ຂັ້ນຕ່າງໆໃຫ້ສຳເລັດ ເພື່ອແນໃສ່ຮັບປະກັນການສົມທົບກັນຢ່າງຄົບຊຸດ, ມີປະສິດທິຜົນລະຫວ່າງບັນດາຂະແໜງໃນການຜັນຂະຫຍາຍການປະຕິບັດບັນດານະໂຍບາຍດ້ານເສດຖະກິດລວມໝູ່ ແລະ ເສີມຂະຫຍາຍບົດບາດຂອງບັນດາສະມາຊິກ ໃນການພັດທະນາເສດຖະກິດລວມໝູ່, ສະຫະກອນ.

   ເລື່ອງຫຼາຍສະຫະກອນຢູ່ແຂວງ ກອນຕຸມ ຊື່ງແມ່ນທ້ອງຖິ່ນທີ່ຍັງປະສົບກັບຄວາມຫຍຸ້ງຍາກ ໄດ້ເສີມຂະຫຍາຍນ້ຳໃນສາມັກຄີເປັນຢ່າງດີ ແລະ ມີບັນດາວິທີເຮັດທີ່ມີຫົວຄິດປະດິດສ້າງ ເພື່ອຜ່ານຜ່າສິ່ງທ້າທາຍ ໂດຍໂລກລະບາດໂຄວິດ 19 ກໍ່ຂຶ້ນນັ້ນ, ແມ່ນການປຸກລະດົມກຳລັງໃຈ, ແມ່ນກຳລັງໜູນທີ່ດີ ເພື່ອໃຫ້ບັນດາສະຫະກອນໃນທົ່ວປະເທດ ສາມາດຮັກສາການເຄື່ອນໄຫວເປັນປົກກະຕິໄດ້, ຜ່ານຜ່າຄວາມຫຍຸ້ງຍາກ ແລະ ບືນຕົວຂຶ້ນ. ສິ່ງດັ່ງກ່າວຍິ່ງມີຄວາມໝາຍກວ່າອີກ ໃນສະພາບການທີ່ໂລກລະບາດໂຄວິດ 19 ຖືກຄາດວ່າ ຍັງສືບຕໍ່ມີການຜັນແປທີ່ສັບສົນ ແລະ ບໍ່ທັນສີ້ນສຸດລົງໄດ້ງ່າຍເທື່ອ.