ຫໍວັດທະນະທຳບ້ານບິ່ງວ້ອງ
(ພາບ: laodong.com.vn)
(vovworld) - ໃນ 10 ປີມານີ້, ຫໍວັດທະນະທຳບ້ານບິ່ງວ້ອງ, ບ່ອນທີ່ມີຫໍສະໝຸດຮັບໃຊ້ປະຊາຊົນ ໄດ້ກາຍເປັນບ່ອນທີ່ມີຄວາມຊິນເຄີຍກັບປະຊາຊົນບ້ານບິ່ງວ້ອງ, ຕາແສງວັນບິ່ງ, ເມືອງເທື່ອງຕີ໋ນ, ຮ່າໂນ້ຍ. ນັບແຕ່ສຳພັດກັບແຫຼ່ງຄວາມຮູ້ຈາກປື້ມ, ໜັງສືພິມໃນຫໍສະໝຸດ, ຊີວິດຂອງປະຊາຊົນຢູ່ທີ່ນີ້ໄດ້ມີການປ່ຽນແປງຕາມທິດທີ່ຕັ້ງໜ້າ.
ແຕ່ລະມື້, ນັບແຕ່ເວລາ 14 ໂມງ 30 ນາທີ ເຖິງ 17 ໂມງ, ຫໍສະໝຸດບ້ານບິ່ງວ້ອງ ກໍ່ເປີດປະຕູໃຫ້ປະຊາຊົນເຂົ້າອ່ານປື້ມ, ໜັງສືພິມ. ຫໍສະໝຸດໄດ້ຮັບການພັດທະນາຈາກຮູບແບບຕູ້ປື້ມຂອງບ້ານ ໂດຍທ່ານ ເຢືອງວັນຟີ, ພະນັກງານພັກກິນເບ້ຍບຳນານເປັນຜູ້ກໍ່ຕັ້ງແຕ່ປີ 1999, ດ້ວຍຄວາມປາຖະໜາວ່າ “ນຳວັດທະນະທຳອ່ານມາໃຫ້ຕາແສງ”, ຊ່ວຍຍົກສູງຄວາມຮູ້ໃຫ້ແກ່ປະຊາຊົນ. ໂດຍເຫັນໄດ້ຜົນປະໂຫຍດຂອງຕູ້ປື້ມ, ປະຊາຊົນຢູ່ທີ່ນີ້ ໄດ້ປະກອບຊັບສິນ, ເຫື່ອແຮງ ເພື່ອກໍ່ສ້າງຫໍສະໝຸດໃຫ້ໃຫຍ່ໂຕໂອໂຖງ ແລະ ສວຍງາມ. ປື້ມໃນຫໍສະໝຸດໄດ້ແບ່ງອອກເປັນ 5 ປະເພດຄື: ການເມືອງສັງຄົມ; ວິທະຍາສາດເຕັກນິກ, ວັດທະນະທຳ; ກົດໝາຍ; ເຍົາວະຊົນ. ນອກນັ້ນຕາມຄວາມຮຽກຮ້ອງຕົວຈິງຂອງທ້ອງຖີ່ນ, ຫໍສະໝຸດຍັງມີຕູ້ປື້ມສະເພາະ 2 ໜ່ວຍ, ນັ້ນແມ່ນຕູ້ປື້ມກ່ຽວກັບປະທານໂຮ່ຈີມິນ ແລະ ປື້ມໂດຍປະທານໂຮ່ຈີມິນຂຽນ ແລະ ຕູ້ປື້ມໂດຍຊາວບິ່ງວ້ອງ ຂຽນເອງ. ປ້າ ເຈິ່ນທິງາ, ປະຊາຊົນບ້ານບິ່ງວ້ອງ, ໃຫ້ຮູ້ວ່າ, ນັບແຕ່ພັກກິນເບ້ຍບຳນານ. ຕອນບ່າຍມື້ໃດປ້າກໍ່ມາອ່ານປື້ມໃນຫໍສະໝຸດ.
“ຂ້າພະເຈົ້າມັກອ່ານປື້ມວິທະຍາສາດ, ພິເສດແມ່ນເວົ້າເຖິງວິທີປິ່ນປົວພະຍາດໃຫ້ແກ່ຜູ້ອາຍຸສູງ, ອ່ານກ່ຽວກັບຂົງເຂດກະສີກຳ, ວິທີສຶກສາເດັກ ກໍ່ຄືອ່ານກາບກອນອີກ. ອ່ານປື້ມຢູ່ທີ່ນີ້ ໄດ້ຊ່ວຍໃຫ້ຂ້າພະເຈົ້າຫຼາຍຢ່າງ, ຕົວຢ່າງຄືຮູ້ວິທີກັນພະຍາດ, ປິ່ນປົວພະຍາດໃຫ້ແກ່ຕົນ”.
ຫໍສະໝຸດບິ່ງວ້ອງ ໄດ້ປະກອບສ່ວນບໍ່ໜ້ອຍເຂົ້າໃນການພັດທະນາຂອງທ້ອງຖີ່ນ. ມາແຫ່ງນີ້, ເດັກນ້ອຍຈະໄດ້ອ່ານປື້ມມ່ວນຫຼາຍຫົວ, ໄດ້ແລກປ່ຽນຄວາມຮູ້, ສ່ວນລຸ້ນໜຸ່ມອ່ານປື້ມເພື່ອຮຽນວິທີຄຸ້ມຄອງເສດຖະກິດ, ສ້າງຄວາມຮັ່ງມີ, ຊາວກະສີກອນອ່ານປື້ມເພື່ອຮຽນວິທີລ້ຽງສັດ, ປູກຝັງ... ທ່ານ ຈິ່ນກິມຟຸ້ງ, ຊາວບ້ານບິ່ງວ້ອງ, ໃຫ້ຮູ້ວ່າ:
“ຫໍສະໝຸດມີປື້ມຄົ້ນຄ້ວາຫຼາຍຫົວ, ພິເສດແມ່ນບັນດາບັນຫາກ່ຽວກັບກະສີກຳ. ຂ້າພະເຈົ້າເຄີຍອ່ານໜັງສືພິມປະຊາຊົນ ແລະ ໜັງສືພິມກະສີກຳເພື່ອຮູ້ສະພາບການເມືອງ, ຮູ້ເຕັກນິກປູກຝັງ, ລ້ຽງສັດ ກໍ່ຄືວິທີກັນໂລກລະບາດໃຫ້ແກ່ສັດລ້ຽງ“.
ໃນເບື້ອງຕົ້ນມີປື້ມພຽງ 200 ຫົວ, ແຕ່ມາຮອດປະຈຸບັນຫໍສະໝຸດບ້ານບິ່ງວ້ອງ ໄດ້ມີປື້ມເຖິງ 8000 ຫົວ, ໃນນັ້ນປື້ມທີ່ມີຄຸນຄ່າມີຫຼາຍຫົວ. ຫໍສະໝຸດໄດ້ຮັບການສ້າງຕັ້ງຕາມຮູບແບບຫັນເປັນສັງຄົມ, ດັ່ງນັ້ນປະຊາຊົນໃນບ້ານລ້ວນແຕ່ມີສະຕິນຳເອົາປື້ມມາປະກອບໃຫ້ຫໍສະໝຸດເພື່ອໃຫ້ທຸກຄົນອ່ານນຳກັນ. ທ່ານເລືອງ ກິມທ້ຽວ, ຮອງຫົວໜ້າຫໍສະໝຸດບ້ານບິ່ງວ້ອງ, ໃຫ້ຮູ້ວ່າ:
“ປະຊາຊົນພວກຂ້າພະເຈົ້າມີທັດສະນະວ່າ, ນອກຈາກໄດ້ຮັບຂ່າວທາງວິທະຍຸ, ໂທລະພາບແລ້ວ, ພວກຂ້າພະເຈົ້າຍັງມີວັດທະນະທຳອ່ານອີກ. ທຸກຄົນມັກອ່ານ, ເພາະຢູ່ຫໍສະໝຸດມີປື້ມໃໝ່ທີ່ມີຄຸນຄ່າຫຼາຍມຫົວ. ດັ່ງນັ້ນວັດທະນະທຳອ່ານໄດ້ກະທົບເຖິງປະຊາຊົນທຸກຊັ້ນຄົນ“.
ຜ່ານ 15 ປີ ແຫ່ງການເຄື່ອນໄຫວ, ຫໍສະໝຸດໄດ້ຕ້ອນຮັບຜູ້ອ່ານເກືອບ 115.000 ເທື່ອຄົນ, ຄິດສະເລ່ຍແຕ່ລະເດືອນມີຜູ້ມາອ່ານ ແລະ ຢືມປື້ມ 1.000 ເທື່ອຄົນ, ໃນນັ້ນຜູ້ອາຍຸສູງກວມ 50%, ຊາວໜຸ່ມ, ເຍົາວະຊົນກວມ 40%. ຫໍສະໝຸດບ້ານບິ່ງວ້ອງ ຍັງສະໜອງບັດອ່ານປື້ມ 515 ບັດໃຫ້ແກ່ເດັກນ້ອຍອີກ. ເລື່ອງຮັກສາ ແລະ ພັດທະນາຫໍສະໝຸດແມ່ນໜ້າທີ່ລວມຂອງປະຊາຊົນໃນບ້ານ. ພິເສດ, ໃນບ້ານມີຜູ້ອາຍຸສູງ 114 ຄົນໄດ້ສະໝັກໃຈເຂົ້າຮ່ວມບໍລິຫານການເຄື່ອນໄຫວຕ່າງໆຂອງຫໍສະໝຸດ.
ນັບແຕ່ມີຫໍສະໝຸດ, ປະຊາຊົນກໍ່ມີຄວາມຊິນເຄີຍອ່ານປື້ມເທື່ອລະກ້າວ ແລະ ເດັກນ້ອຍກໍ່ເມົາມົວກັບການຮຳ່ຮຽນກວ່າ, ອັດຕານັກຮຽນເສັງເຂົ້າມະຫາວິທະຍາໄລ ແລະ ວິທະຍາໄລໄດ້ກໍ່ຫຼາຍກວ່າ, ຊີວິດດ້ານວັດທະນະທຳ, ຈິດໃຈຂອງປະຊາຊົນໃນບ້ານກໍ່ຮັບການຍົກສູງຂຶ້ນ. ທ່ານ ເລືອງຂັກຮວຽນ, ພະນັກງານກິນເບ້ຍບຳນານບ້ານບິ່ງວ້ອງໃຫ້ຮູ້ວ່າ:
“ຫໍສະໝຸດນັບມື້ນັບພັດທະນາ. ມາອ່ານຢູ່ທີ່ນີ້ຈະມີຄວາມຮູ້ຫຼາຍຢ່າງກ່ຽວກັບທາງດ້ານການເມືອງ, ສັງຄົມຢູ່ພາຍໃນ ແລະ ຕ່າງປະເທດ. ຫໍສະໝຸດຊ່ວຍໃຫ້ທຸກຄົນມີສະຕິ, ແບບແຜນດຳລົງຊີວິດ, ຈາກນັ້ນສຶກສາທຸກຄົນ, ກໍ່ສ້າງບ້ານໃຫ້ເປັນບ້ານວັດທະນະທຳ ແລະ ຄອບຄົວວັດທະນະທຳ“.
ປີໃດ, ຫໍສະໝຸດບິ່ງວ້ອງ ກໍ່ຕ້ອນຮັບແຂກຈາກທຸກແຫ່ງມາຢ້ຽມຢາມ, ໃນນັ້ນມີຜູ້ຕາງໜ້າຫໍສະໝຸດລາດຊະວົງຊູແອດໄດ້ມາທາບທາມຮູບແບບ ແລະ ບົດຮຽນໃນການຈັດຕັ້ງຫໍສະໝຸດປະຊາຄົມຂອງບ້ານ. ຫໍສະໝຸດຂອງບ້ານທັງແມ່ນບ່ອນພົບປະແລກປ່ຽນຂອງປະຊາຊົນ, ທັງແມ່ນສະຖານທີ່ເພື່ອໃຫ້ປະຊາຊົນຊອກຮູ້ຂໍ້ມູນຂ່າວສານ, ບົດຮຽນ. ຫໍສະໝຸດບ້ານໄດ້ຊຸກຍູ້ຂະບວນການຮຳ່ຮຽນປະຊາຄົມຢູ່ທ້ອງຖີ່ນ, ປະກອບສ່ວນປ່ຽນໃໝ່ໂສມໜ້າເຂດຊົນນະບົດຢູ່ຊານນະຄອນຫຼວງຮ່າໂນ້ຍ.