(vovworld) - ບົນເສັ້ນທາງໄປທ່ອງທ່ຽວເໜືອ - ໃຕ້ຫວຽດນາມ, ເມື່ອຂ້າມກີ່ວງາງ ເຂົ້າບໍລິເວນແຂວງກວາງບິ່ງ, ແຂກທ່ອງທ່ຽວຈະຮູ້ສຶກຕົກສະເງີ້ ເມື່ອເຫັນທີວທັດທຳມະຊາດພູຜາປ່າໄມ້ທີ່ສວຍງາມ, ປຽບເໝືອນຮູບພາບປະເທດຫວຽດນາມຫຍໍ້ເຂົ້າຂອງໝູ່ບ້ານຫຼີຮ່ວາ, ທີ່ຂຶ້ນກັບຕາແສງຫາຍແຈກ, ເມືອງໂບ໋ແຈກ, ແຂວງກວາງບິ່ງ. ຢູ່ທີ່ນີ້ມີທັງພູຜາປ່າໄມ້, ແມ່ນ້ຳລຳເຊ ແລະ ທະເລ. ໃນປະຫວັດສາດ, ຫຼີຮ່ວາ ບໍ່ພຽງແຕ່ແມ່ນໝູ່ບ້ານແຄມທະເລທີ່ອຸດົມສົມບຸນ ແລະ ມັ່ງຄັ່ງ ເທົ່ານັ້ນ, ຫາກຍັງແມ່ນເຂດບ້ານນາທີ່ມີມູນເຊື້ອວັດທະນະທຳ, ປະຫວັດສາດຂອງແຂວງກວາງບິ່ງ ແລະ ຂອງທົ່ວປະເທດອີກດ້ວຍ.
ໝູ່ບານແຄມທະເລຫຼີຮ່ວາ(ພາບ: lyhoa.net)
|
ທຳມະຊາດໄດ້ບັນດານໃຫ້ຫຼີຮ່ວາມີ ”ພູຜາປ່າໄມ້ທີ່ຂຽວອຸ່ມທູ່ມ ແລະ ແມ່ນ້ຳລຳເຊທີ່ສ່ອງໃສ. ໂດຍຕັ້ງຢູ່ເຂດທີ່ອ້ອມຮອບດ້ວຍພູຜາປ່າໄມ້ ແລະ ທະເລ, ອັນໄດ້ເຮັດໃຫ້ຫຼີຮ່ວາ ກາຍເປັນທີ່ຕັ້ງຍຸດທະສາດທີ່ສຳຄັນ ໃນປະຫວັດແຫ່ງການຕ້ານເສິກຮຸກຮານຕ່າງດ້າວ, ນີ້ກໍ່ແມ່ນແຫ່ງທີ່ເປັນຂີດໝາຍບັນດາໄຊຊະນະແຫ່ງປະຫວັດສາດ. ປາກແມ່ນ້ຳຫຼີຮ່ວາໃນເມື່ອກ່ອນເອີ້ນວ່າດ້າຍຫຼີ, ແມ່ນແຫ່ງທີ່ເມື່ອປີ 1369, ເຈົ້າຊີວິດ ເຈິ່ນຢູ້ຕົງ ພ້ອມກັບທະຫານເຮືອ ດ້າຍຫວຽດ ຕີເອົາຊະນະທະຫານຈຳຈາກພາກໃຕ້ມາປຸ້ນສະດົມ. ຢູ່ໃກ້ກັບປາກແມ່ນ້ຳຫຼີຮ່ວາ ແມ່ນໝູ່ບ້ານທະເລຫຼີຮ່ວາທີ່ອຸດົມສົມບຸນ, ປະຊາຊົນທຳມາຫາກິນສະດວກສະບາຍ, ຊີວິດສົມບຸນພູນສຸກ. ນັບແຕ່ດົນນານມາແລ້ວ, ວຽກງານການປະມົງ ແລະ ການຄ້າທາງທະເລຂອງປະຊາຊົນຢູ່ທີ່ນີ້ໄດ້ຮັບການພັດທະນາ. ທ່ານ ຫງວຽນຢູຍຮຸ່ງ, ພະນັກງານຕາແສງຫາຍແຈກ, ໃຫ້ຮູ້ວ່າ:
(ພາບ: lyhoa.net)
|
”ໝູ່ບ້ານຫຼີຮ່ວາ ມີປະຫວັດແຫ່ງການພັດທະນາມາເປັນເວລາກວ່າ 300 ປີ ແລະ ຜ່ານການຜັນແປຂອງການເວລາ, ຊາວໝູ່ບ້ານຫຼີຮ່ວາໄດ້ມີມູນເຊື້ອສາມັກຄີ, ຮັກແພງກັນ ແລະ ພ້ອມກັນຕ້ານໄພທຳມະຊາດ, ທຳການຜະລິດ, ພ້ອມທັງປະຕິບັດພັນທະຂອງຕົນເປັນຢ່າງດີ, ປະກອບສ່ວນເຂົ້າໃນການຕໍ່ຕ້ານໆອາເມລິກາກູ້ຊາດ. ໂດຍແມ່ນໝູ່ບ້ານວັດທະນະທຳ, ໝູ່ບ້ານມັກຮຽນ ແລະ ມີຄວາມຂະຫຍັນຂັນເຄື່ອນໃນການຜະລິດ, ດຳເນີນທຸລະກິດ, ຊາວໝູ່ບ້ານຫຼີຮ່ວາ, ຕາແສງຫາຍແຈກ ຍາມໃດກໍ່ມີຄວາມສາມັກຄີຜ່ານຜ່າຄວາມຫຍຸ້ງຍາກ, ອັນໄດ້ເຮັດໃຫ້ຊີວິດການເປັນຢູ່ຂອງປະຊາຊົນນັບມື້ນັບສົມບຸນພູນສຸກ”.
ກໍ່ເຊັ່ນດຽວກັບໝູ່ບ້ານອື່ນໆ, ຢູ່ໝູ່ບ້ານຫຼີຮ່ວາ ກໍ່ມີປູຊະນີຍະສະຖານປະຫວັດສາດອັນລ້ຳຄ່າຫຼາຍແຫ່ງ. ສາລາຫຼີຮ່ວາ ໄດ້ຮັບການກໍ່ສ້າງຂຶ້ນເມື່ອປີ 1737, ແມ່ນກິດຈະກຳທີ່ມີຄຸນຄ່າປະຫວັດສາດ, ສະຖາປັດຕະຍາກຳສິລະປະທີ່ດີເດັ່ນ, ແມ່ນແຫ່ງບູຊາບັນພະບຸລຸດຜູ້ມີບຸນຄູນໃນການກໍ່ຕັ້ງໝູ່ບ້ານ ແລະ ສ້າງອາຊີບທີ່ເປັນມູນເຊື້ອໃຫ້ໝູ່ບ້ານທະເລ. ສາລາຍັງບູຊາ 12 ຕະກູນ, ໃນນັ້ນມີຕະກູນ ຫງວຽນຢູດ ເຊິ່ງແມ່ນຕະກູນທີ່ມີຊື່ສຽງຢູ່ໝູ່ບ້ານຫຼີຮ່ວາ ຍ້ອນມີຫຼາຍລຸ້ນຄົນເສັງໄດ້ເປັນອາດຍາເຈົ້ານາຍ, ແລະ ໄດ້ຮັບຄວາມເຄົາລັບນັບຖືຈາກສັງຄົມ. ຕາມພົງສາວະດານແລ້ວ, ນັບແຕ່ປີ ມິງມ້າງ ທີ 10 ເປີດການສອບເສັງຊຸດທຳອິດເຖິງຊຸດຮຽນສຸດທ້າຍເມື່ອປີ 1919, ຕະກູນ ຫງວຽນຢູຍ ຢູ່ໝູ່ບ້ານຫຼີຮ່ວາ ໄດ້ມີ 5 ທ່ານເສັງໄດ້ປະລິຍາເອກ. ນັ້ນແມ່ນກໍລະນີທີ່ບໍ່ເຄີຍມີມາໃນປະຫວັດແຫ່ງການສອບເສັງຂອງຫວຽດນາມ ໃນສະໄໝສັກດີນາ. ທ່ານ ຟ້າມຢາເທືອງ, ຜູ້ມີອາຍຸສູງຢູ່ໝູ່ບ້ານຫຼີຮ່ວາ, ໃຫ້ຮູ້ວ່າ:
ສາລາບ້ານຫຼີຮ່ວາ(ພາບ: lyhoa.net)
|
”ໃນສະໄໝກ່ອນ, ໝູ່ບ້ານຂອງພວກເຮົາມີຫຼາຍຄົນເສັງປະລິຍາເອກໄດ້, ແລະ ເປັນອາດຍາເຈົ້ານາຍໃນສະໄໝລາຊະວົງອື່ນໆ, ເຂົາເຈົ້າໄດ້ເປັນແບບຢ່າງທີ່ດີໃຫ້ແກ່ໝູ່ບ້ານ. ໄລຍະຜ່ານມາ, ໝູ່ບ້ານຂ້າພະເຈົ້າຍັງຄົງເສີມຂະຫຍາຍມູນເຊື້ອອັນດີງາມດັ່ງກ່າວ. ດ້ວຍມູນເຊື້ອນັ້ນ, ພວກຂ້າພະເຈົ້າເຊື່ອໝັ້ນວ່າ, ໝູ່ບ້ານຂອງພວກຂ້າພະເຈົ້າຈະມີການປ່ຽນໃໝ່, ພັດທະນາ, ສວຍງາມ ແລະ ຮັ່ງມີກວ່າ”
ໃນຊຸ່ມປີແຫ່ງການຕໍ່ຕ້ານໆອາເມລິກາກູ້ຊາດ, ກີ່ວຫຼີຮ່ວາ ໄດ້ກາຍເປັນຈຸດສຸມແຫ່ງການຍິງທຳລາຍຂອງທັບອາກາດອາເມລິກາ, ເພາະວ່ານີ້ແມ່ນເສັ້ນທາງຄົມມະນາຄົມຂົນສົ່ງທີ່ສຳຄັນເພື່ອໃຫ້ແນວຫຼັງພາກເໜືອລຳລຽງຂົນສົ່ງອາວຸດ, ເຄື່ອງຂອງຕ່າງໃຫ້ແນວໜ້າພາກໃຕ້. ເພື່ອຮັບປະກັນໃຫ້ທາງຄົມມະນາຄົມຂົນສົ່ງທະລຸໂລ່ງ, ຊາວໝູ່ບ້ານຫຼີຮ່ວາ ໄດ້ຮື້ມ້າງເຮືອນຊານ 150 ຫຼັງຂອງຕົນເພື່ອສ້າງຂົວໃຫ້ທະຫານຂ້າມແມ່ນ້ຳ, ປະກອບກຳລັງແຮງ, ຊັບສິນໃຫ້ການຕໍ່ສູ້ກູ້ຊາດ, ທ້ອນໂຮມປະເທດຊາດເປັນເອກະພາບ. ຢູ່ແຫ່ງນີ້, ທະຫານ ແລະ ປະຊາຊົນຫຼີຮ່ວາໄດ້ຍິງເຮືອບິນອາເມລິກາຕົກ 2 ລຳ. ພາຍຫຼັງປະເທດໄດ້ຮັບສັນຕິພາບ, ຫຼີຮ່ວາ ບໍ່ພຽງແຕ່ກາຍເປັນສູນພັດທະນາອາຊີບການປະມົງຢູ່ແຄມທະເລເທົ່ານັ້ນ, ຫາກຍັງແມ່ນສູນການຄ້າທີ່ຄຶກໂຄມໜາແໜ້ນອີກດ້ວຍ. ປະຈຸບັນ, ຊາວໝູ່ບ້ານຫຼີຮ່ວາ, ເຖິງວ່າຈະໄປເຮັດວຽກຢູ່ທົ່ວທຸກແຫ່ງໃນປະເທດ, ແລະ ໄດ້ຮັບຜົນສຳເລັດໃນຫຼາຍຂົງເຂດຂອງຊີວິດສັງຄົມກໍ່ຕາມ, ແຕ່ຈິດໃຈເຂົາເຈົ້າຍາມໃດກໍ່ຮູ້ສຶກເອກອ້າງທະນົງໃຈຕໍ່ໝູ່ບ້ານຂອງຕົນ. ທ່ານຫງວຽນເກິມເຊີນ, ຊາວໝູ່ບ້ານຫຼີຮ່ວາ, ສະແດງຄວາມຮູ້ສຶກວ່າ:
ເທບ
”ສຳຫຼັບຊາວໝູ່ບ້ານຫຼີຮ່ວາແຕ່ລະຄົນແລ້ວ, ເມື່ອໄປໄກຈາກໝູ່ບ້ານ ຈຶ່ງຮັບຮູ້ໄດ້ອາລົມຈິດທັງໝົດທີ່ມີຕໍໝູ່ບ້ານ. ສ່ວນຂ້າພະເຈົ້າເອງ, ກໍ່ໄດ້ຮັບການກຳເນີດ, ເຕີບໃຫຍ່ ແລະ ຕິດພັນກັບດິນແດນແຫ່ງນີ້ໃນຍາມສົງຄາມອັນດຸເດືອດ. ຍາມໃດຂ້າພະເຈົ້າກໍ່ຄິດຮອດຄິດເຖິງບ້ານເກີດເມືອງນອນ. ຂ້າພະເຈົ້າເຊື່ອໝັ້ນວ່າ, ໃນໄລຍະຈະມາເຖິງ, ເມືອງໂບ໋ແຈກຂອງຂ້າພະເຈົ້າ ຈະທັດທຽມກັບເມືອງຕ່າງໆໃນທົ່ວປະເທດ”.
ໝູ່ບ້ານທະເລຫຼີຮ່ວາຍັງແມ່ນທັດສະນີຍະພາບທີ່ສວຍງາມ, ດ້ວຍແກ້ງຫີນໃຫຍ່, ນ້ອຍ, ສູງ, ຕ່ຳຫຼາຍແຫ່ງທີ່ພົ້ນຂຶ້ນຈາກທະເລ, ສ້າງເປັນຮູບທີ່ມະຫັດສະຈັນ, ດັ່ງນັ້ນ, ປະຊາຊົນຢູ່ແຫ່ງນີ້ຈຶ່ງເອີ້ນວ່າ ”ແກ້ງຫີນໂດດ”. ໝູ່ບ້ານປະມົງຫຼີຮ່ວາ ທີ່ອຸດົມສົມບຸນ, ມີຄວາມສັນຕິສຸກ, ພ້ອມກັບແກ້ງຫີນໂດດນັ້ນ ໄດ້ກາຍເປັນທັດສະນີຍະພາບທີ່ສວຍງາມ, ແມ່ນສະຖານທີ່ທ່ອງທ່ຽວ, ຜັກຜ່ອນຢ່ອນອາລົມທີ່ດຶງດູດນັກທ່ອງທ່ຽວທີ່ມາຈາກທຸກສາລະທິດ, ແລະ ຊາວກວາງບິ່ງ. ຖ້າມີໂອກາດ, ເຊີນທ່ານມາຢາມໝູ່ບ້ານທະເລຫຼີຮ່ວາ ເພື່ອມີຄວາມເຂົ້າໃຈຕື່ມີກກ່ຽວກັບປະຫວັດ ສາດ, ມູນເຊື້ອວັດທະນະທຳຂອງເຂດບ້ານນາທີ່ສວຍງາມແຫ່ງນີ້.