ແຂວງກວາງນິງ ແມ່ນແຂວງຕັ້ງຢູ່ທິດຕາເວັນອອກສ່ຽງເໜືອ ຂອງຫວຽດນາມ, ໄດ້ເຕົ້າໂຮມບັນດາປັດໃຈພິເສດສະເພາະກ່ຽວກັບພູມສາດ ດ້ວຍທະເລ, ປ່າດົງ, ເນື້ອທີ່ດິນທຳມະຊາດອຸດົມສົມບູນພໍສົມຄວນ, ມີເງື່ອນໄຂເພື່ອພັດທະນາເສດຖະກິດສັງຄົມ. ແມ່ນແຂວງທຳອິດໃນທົ່ວປະເທດໄດ້ສ້າງຕັ້ງຄະນະຊີ້ນຳກ່ຽວກັບການກໍ່ສ້າງຊົນນະບົດໃໝ່ສະເພາະກິດ, ສະນັ້ນວຽກງານຊີ້ນຳ, ຜັນຂະຫຍາຍໂຄງການກໍ່ສ້າງຊົນນະບົດໃໝ່ຢູ່ແຂວງ ກວາງນິງ ຈຶ່ງມີຈຸດສຸມ, ລົງເລິກ ແລະ ທັນການ. ແຂວງກວາງນິງ ໄດ້ເອົາໃຈໃສ່ເປັນພິເສດເຖິງວຽກງານໂຄສະນາການກໍ່ສ້າງຊົນນະບົດໃໝ່. ເພາະສະນັ້ນ, ໂຄງການຈຶ່ງໄດ້ຮັບການຕອບສະໜອງ ແລະ ປຸກລະດົມກຳລັງແຮງຈາກພໍ່ແມ່ປະຊາຊົນເປັນຈຳນວນຫຼວງຫຼາຍ, ບັນດາວິສາຫະກິດໃນບໍລິເວນແຂວງພ້ອມກັບອຳນາດການປົກຄອງໄດ້ຮ່ວມແຮງຮ່ວມໃຈກໍ່ສ້າງຊົນນະບົດໃໝ່. ທ່ານນາງ ເຢືອງທິເມັນ, ຫົວໜ້າສະຫະກອນຕາແສງອຽນດຶກ, ໃຫ້ຮູ້ວ່າ.
“ເຂົ້າຮ່ວມໂຄງການກໍ່ສ້າງຊົນນະບົດໃໝ່, ບໍລິສັດກໍ່ຮ່ວມແຮງຮ່ວມໃຈປະກອບສ່ວນກໍ່ສ້າງທາງໃນບ້ານ ແລະ ພິເສດແມ່ນເຂົ້າຮ່ວມບັນດາໂຄງການຮັບປະກັນຊີວິດສັງຄົມ. ຄຽງຂ້າງນັ້ນ, ບໍລິສັດໄດ້ສ້າງວຽກເຮັດງານທຳໃຫ້ບາງພາລະກອນຢູ່ທີ່ນີ້ ແລະ ພັດທະນາການທ່ອງທ່ຽວເພື່ອໃຫ້ປະຊາຊົນໄດ້ຮັບຜົນປະໂຫຍດ”.
ຂະແໜງກະສິກຳຂອງກວາງນິງ ໄດ້ກຳນົດແຈ້ງທິດນຳທີ່ວ່າ “ຖືອຸດສາຫະກຳ, ການບໍລິການເພື່ອຊຸກຍູ້ກະສິກຳ”, ສະນັ້ນ ຈຶ່ງມີບາດກ້າວພັດທະນາຢ່າງຮອບດ້ານໃຂຂົງເຂດຕ່າງໆຄື: ການປູກຝັງ, ລ້ຽງສັດ, ສ້າງບັນດາເຂດຜະລິດສິນຄ້າລວມສູນ ຕິດພັນກັບການກໍ່ສ້າງ ແລະ ພັດທະນາເຄື່ອງໝາຍການຄ້າຜະລິດຕະພັນກະເສດ ຄືຕົ້ນສາຄູຢູ່ແຂວງບິ່ງລຽວ; ປູກຕົ້ນໄມ້ກິນໝາກຄື ໝາກຂຽບ, ໝາກລີ້ນຈີ່ ຢູ່ດົງຈ່ຽວ, ອວງບິ໋, ໝາກຍໍຢູນາແຈ… ໂຄງການ “ກວາງນິງ 1 ຕາແສງ 1 ຜະລິດຕະພັນ” ໄດ້ກາຍເປັນຈຸດທີ່ເປັນເອກະລັກສະເພາະຂອງແຂວງກວາງນິງ. ຄຽງຂ້າງນັ້ນ, ຮູບແບບທ່ອງທ່ຽວເຂດບ້ານນາຄືຢູ່ຕາແສງອຽນດຶກ, ເທດສະບານເມືອງ ດົງຈ່ຽວ ກໍໄດ້ດຶງດູດນັກທ່ອງທ່ຽວທັງຢູ່ພາຍໃນ ແລະ ຕ່າງປະເທດມາຢ້ຽມຢາມເປັນຈຳນວນຫຼວງຫຼາຍ. ມາຮອດປະຈຸບັນ, ລະດັບລາຍຮັບສະເລ່ຍຂອງຊາວບ້ານເຂດຊົນນະບົດແຂວງກວາງນິງ ໄດ້ເພີ່ມຈາກ 10 ລ້ານດົງ/ປີ (ໃນປີ 2010) ຂຶ້ນເຖິງ 30 ລ້ານດົງ/ປີ (ໃນປີ 2015). ທ່ານເລກ໋ວກແຄ໋ງ, ຊາວບ້ານຕາແສງອານຊິງ, ເມືອງດົງຈ່ຽວ, ໃຫ້ຮູ້ວ່າ.
“ປະຈຸບັນ, ກ່ຽວກັບທາງໃນບ້ານ, ເວົ້າລວມແລ້ວແມ່ນກວ້າງຂວາງ. ສ່ວນລາຍຮັບທັງປີຂອງຄອບຄົວ ໂດຍບໍ່ຄິດໄລ່ແມ່ນບັນລຸກຳໄລປະມານ 700 – 800 ລ້ານດົງ/ປີ”
ພາຍຫຼັງໄລຍະ 5 ປີແຫ່ງການຜັນຂະຫຍາຍໂຄງການກໍ່ສ້າງຊົນນະບົດໃໝ່, ແຂວງກວາງນິງ ໄດ້ກາຍເປັນແຂວງນຳໜ້າໃນທົ່ວປະເທດດ້ວຍ 100% ຈຳນວນຕາແສງສຳເລັດການວາງແຜນກໍ່ສ້າງຊົນນະບົດໃໝ່ ແລະ ສ້າງເຄື່ອງໝາຍການຄ້າຜະລິດຕະພັນກະເສດໄດ້ 23 ເຄື່ອງໝາຍ ຕິດພັນກັບການສ້າງເຂດຜະລິດສິນຄ້າລວມສູນສຳເລັດ. ໄລ່ຮອດທ້າຍປີ 2015, ຈຳນວນຕາແສງບັນລຸມາດຖານ ແລະ ບັນລຸມາດຖານກໍ່ສ້າງຊົນນະບົດໃໝ່ໂດຍພື້ນຖານຢູ່ແຂວງກວາງນິງ ແມ່ນ 86 ຕາແສງ. ກວາງນິງ ກໍມີ 3 ຫົວໜ່ວຍຂັ້ນເມືອງໄດ້ບັນລຸມາດຖານຊົນນະບົດໃໝ່. ກວາງນິງ ແມ່ນໜຶ່ງໃນຈຳນວນ 10 ແຂວງ, ນະຄອນມີຜົນງານດີທີ່ສຸດໃນການກໍ່ສ້າງຊົນນະບົດໃໝ່ຂອງທົ່ວປະເທດ. ໂສມໜ້າຊົນນະບົດຢູ່ກວາງນິງ ໄດ້ຮັບການປ່ຽນແປງຢ່າງກວ້າງຂວາງ ສວນງາມກວ່າ, ຊີວິດຂອງປະຊາຊົນໄດ້ຮັບການປັບປຸງຢ່າງຫັນໄດ້ຊັດ.
ການນຳ ອຳນາດການປົກຄອງ ແລະ ປະຊາຊົນແຂວງກວາງນິງ ກຳນົດການກໍ່ສ້າງຊົນນະບົດໃໝ່ບໍ່ພຽງແຕ່ແມ່ນຂະບວນການ, ແມ່ນບັ້ນຂົນຂວາຍໃຫຍ່ເທົ່ານັ້ນ, ຫາກຍັງ ໄດ້ຮັບການພັດທະນາຕາມທິດຍືນຍົງ ຕາມຮູບແບບ “ຊົນນະບົດກ້າວໜ້າ”. ທ່ານ ດັ້ງຮຸຍເຮົ້າ, ຮອງປະທານຜູ້ປະຈຳການຄະນະກຳມະການປະຊາຊົນແຂວງກວາງນິງ ໃຫ້ຮູ້ວ່າ.
“ແຂວງກວາງນິງ ໄດ້ກຳນົດຈະກ່າຍເປັນແຂວງຊົນນະບົດໃໝ່ໂດຍພື້ນຖານໃນປີ 2015, ແຕ່ຮອດໄລຍະ 2016 – 2020, ຊົນນະບົດໃໝ່ຂອງກວາງນິງ ຈະຕ້ອງຫັນປ່ຽນຕາມວິທີປະຕິບັດໃໝ່, ໝາຍຄວາມວ່າ ພາຍຫຼັງບັນລຸມາດຖານແລ້ວ ຈະຕ້ອງຍົກລະດັບຕື່ມອີກ ເຊິ່ງພວກຂ້າພະເຈົ້າໄດ້ກຳນົດວ່າ ຊົນນະບົດມີຄວາມກ້າວໜ້າ, ຫັນເຂດຊົນນະບົດເປັນຕົວເມືອງ. ສ່ວນໂຄງການ 1 ຕາແສງມີ 1 ຜະລິດຕະພັນ ກໍຕ້ອງສືບຕໍ່ຍົກສູງຄຸນນະພາບ ແລະ ຜະລິດສິນຄ້າໃຫ້ມີຄຸນນະພາບສູງກວ່າ ແລະ ຫຼາຍກວ່າ ເພື່ອຮັບໃຊ້ໃຫ້ຕະຫຼາດ”.
ຕາມການກຳນົດທິດທາງດັ່ງກ່າວ, ເມືອງທີ່ບັນລຸມາດຖານຊົນນະບົດໃໝ່ທຳອິດຢູ່ທາງພາກເໜືອ ແມ່ນ ດົງຈ່ຽວ, ແຂວງກວາງນິງ ຈະວາງຄາດໝາຍກໍ່ສ້າງຮູບແບບ “ຊົນນະບົດກ້າວໜ້າ”, ດ້ວຍຄວາມຕັດສິນໃຈຫັນເຂດຊົນນະບົດເປັນຕົວເມືອງ. ສະນັ້ນ, ໂຄງການຈຸດໝາຍກໍ່ສ້າງຊົນນະບົດໃໝ່ຢູ່ແຂວງກວາງນິງ ຈະກ້າວເຂົ້າສູ່ໄລຍະໃໝ່ທີ່ພັດທະນາກວ່າອີກ.