(vovworld) - ພາຍຫຼັງ 5 ປີແຫ່ງການຜັນຂະຫຍາຍໂຄງການຈຸດໝາຍແຫ່ງຊາດກໍ່ສ້າງຊົນນະບົດໃໝ່, ໂສມໜ້າຊົນນະບົດຂອງແຂວງບິ່ງເຟືອກ ມີການປ່ຽນແປງຫຼາຍຢ່າງ. ລາຍຮັບສະເລ່ຍໃສ່ຫົວຄົນເພີ່ມຂຶ້ນຈາກ 24 ລ້ານດົ່ງ/ຄົນປີ 2010 ຂຶ້ນເຖິງເກືອບ 43 ລ້ານດົ່ງ/ຄົນໃນປີ 2015. ປະຈຸບັນ 20 ຕາແສງຂອງແຂວງບັນລຸໄດ້ 15/19 ມາດຖານຂອງຕາແສງຊົນນະບົດໃໝ່. ສິ່ງພິເສດແມ່ນຂະບວນການກໍ່ສ້າງຊົນນະບົດໃໝ່ຢູ່ບິ່ງເຟືອກ ສາມາດເສີມຂະຫຍາຍໄດ້ນຳ້ໃຈສາມັກຄີ ແລະ ເປັນເຈົ້າການຂອງປະຊາຊົນ.
ປະຊາຊົນມ່ວນຊື່ນເມື່ອມີເສັ້ນທາງໃໝ່
(ພາບ: ອິນເຕີແນດ)
ໄປຕາມເສັ້ນທາງເບຕົງທີ່ກວ້າງຂວາງ, ພວກຂ້າພະເຈົ້າໄດ້ມາຮອດໃຈກາງຕາແສງມິງແທ່ງ, ເມືອງເຈີນແທ່ງ. ທັງສອງຝາກທາງແມ່ນບັນດາເຮືອນທີ່ກວ້າງຂວາງ, ສວຍງາມ, ພ້ອມກັບສວນໄມ້ທີ່ຂຽວອຸ່ມທູ່ມ. ມາຮອດປະຈຸບັນ, ທາງຄົມມະນາຄົມຊົນນະບົດທັງໝົດ 18 ກມ ຂອງຕາແສງມິງແທ່ງ ລ້ວນແຕ່ໄດ້ຮັບການກໍ່ສ້າງດ້ວຍເບຕົງ. ລະບົບໂຮງຮຽນ, ສຸກສາລາໄດ້ຮັບການກໍ່ສ້າງຢ່າງຮຽບຮ້ອຍ. ນອກຈາກການບໍລິຈາກທີ່ດິນເພື່ອກໍ່ສ້າງທາງ, ປະກອບກຳລັງເຫື່ອແຮງແລ້ວ, ປະຊາຊົນຢູ່ທີ່ນີ້ຍັງປະກອບເງິນໄດ້ກວ່າ 2 ຕື້ດົ່ງ ເພື່ອພ້ອມກັບອຳນາດການປົກຄອງທ້ອງຖີ່ນ
ກໍ່ສ້າງພື້ນໂຄງລ່າງອີກດ້ວຍ. ມິງແທ່ງ ແມ່ນ 1 ໃນຈຳນວນ 3 ຕາແສງຂອງແຂວງບິ່ງເຟືອກທີ່ບັນລຸມາດຖານກ່ຽວກັບການກໍ່ສ້າງຊົນນະບົດໃໝ່. ທ່ານ ຟານວັນແຫ່ງ, ຢູ່ໜ່ວຍ 3, ບ້ານ 5, ຕາແສງມິງແທ່ງ, ໃຫ້ຮູ້ວ່າ:
“ເມື່ອອຳນາດການປົກຄອງເຊື່ອໝັ້ນ, ມອບໜ້າທີ່ໃຫ້ກໍ່ສ້າງກິດຈະກຳຊົນນະບົດໃໝ່, ປະຊາຊົນໄດ້ຈັດການປະຊຸມ, ແບ່ງອອກເປັນແຕ່ລະໜ່ວຍ, ເລືອກເຟັ້ນຄະນະຕິດຕາມກວດກາ ເພື່ອຄຸ້ມຄອງວັດສະດຸກໍ່ສ້າງເຊິ່ງທ້ອງ
ຖີ່ນຈັດແບ່ງໃຫ້. ໂດຍໄດ້ຮັບຄວາມເຫັນດີເຫັນພ້ອມສູງຈາກປະຊາຊົນ, ບັນດາກິດຈະກຳທັງໝົດຈຶ່ງຮັບການກໍ່ສ້າງສຳເລັດ“.
ດ້ວຍທິດນຳ “ລັດ ແລະ ປະຊາຊົນພ້ອມກັນຮັດ“, ແຂວງບິ່ງເຟືອກ ໄດ້ລະດົມທຸກແຫຼ່ງກຳລັງໃຫ້ແກ່ວຽກງານກໍ່ສ້າງຊົນນະບົດໃໝ່. ຍອດຈຳນວນທຶນລະດົມໃນ 5 ປີຜ່ານມາຂອງແຂວງບັນລຸເກືອບ 6.000 ຕື້ດົ່ງ, ໃນນັ້ນປະຊາຊົນປະກອບໄດ້ກວ່າ 220 ຕື້ດົ່ງ. 20 ຕາແສງທີ່ແຂວງບິ່ງເຟືອກ ເລືອກເປັນຕາແສງແບບຢ່າງໃນການກໍ່ສ້າງຊົນນະບົດໃໝ່ ໄດ້ປະຕິບັດສຳເລັດບັນດາໝວດມາດຖານ ກ່ຽວກັບເສດຖະກິດ ແລະ ພັດທະນາການຜະລິດ, ກ່ຽວກັບວັດທະນະທຳ, ສັງຄົມ, ສິ່ງແວດລ້ອມ… ທ່ານ ຮ່ວາງເຍິດເຕິນ, ປະທານຄະນະກຳມະການປະຊາຊົນເມືອງ ລົກນິງ, ຖືວ່າ: ນີ້ແມ່ນຜົນງານທີ່ໜ້າຮັບຮູ້, ເພາະວ່າບິ່ງເຟືອກ ຍັງແມ່ນແຂວງທຸກຍາກ, ຊີວິດການເປັນຢູ່ຂອງປະຊາຊົນຍັງປະສົບກັບຄວາມຫຍຸ້ງຍາກຫຼາຍຢ່າງ.
“ສຳລັບບັນດາກິດຈະກຳກໍ່ສ້າງຊົນນະບົດໃໝ່ຢູ່ເມືອງລົກນິງ, ເມື່ອເຫັນວ່າບ່ອນໃດມີຄວາມສະດວກ ແລະ ໄດ້ຮັບຄວາມເຫັນດີເຫັນພ້ອມຈາກປະຊາຊົນ, ພວກຂ້າພະເຈົ້າຈະເຮັດກ່ອນ. ພວກຂ້າພະເຈົ້າປະຕິບັດຕາມແຜນຮ່າງຂອງເມືອງແມ່ນປະຊາຊົນເປັນຜູ້ກໍ່ສ້າງກິດຈະກຳ: ລັດໜູນຊ່ວຍດ້ານວັດສະດຸ. ດ້ວຍຈິດໃຈຄືດັ່ງກ່າວ, ມີຫຼາຍກິດຈະກຳຢູ່ບັນດາຕາແສງຊົນນະບົດໃໝ່ຂອງເມືອງໄດ້ຮັບການກໍ່ສ້າງສຳເລັດ ດ້ວຍຄຸນນະພາບ
ດີທີ່ສຸດ“.
ຜັນຂະຫຍາຍການກໍ່ສ້າງຊົນນະບົດໃໝ່, ແຂວງບິ່ງເຟືອກ ໄດ້ດຶງດູດປະຊາຊົນທຸກຊັ້ນວັນນະເຂົ້າຮ່ວມເປັນຈຳນວນຫຼວງຫຼາຍ. ໃນນັ້ນ, ສະມາຊິກຊາວໜຸ່ມ, ຊາວໜຸ່ມນັບພັນຄົນ ໄດ້ເປັນແກ່ນສານໃນການຂົນຂວາຍປະຊາຊົນບໍລິຈາກທີ່ດິນເຮັດທາງ, ປົກປັກຮັກສາຄວາມສະຫງົບປອດໄພ, ຄວາມເປັນລະບຽບຮຽບຮ້ອຍ, ກໍ່ສ້າງຊີວິດທາງດ້ານວັດທະນະທຳໃໝ່ຢູ່ເຂດຊຸມຊົນ. ຢູ່ທຸກຕາແສງຂອງແຂວງບິ່ງເຟືອກ, ອົງການຈັດຕັ້ງຊາວໜຸ່ມໄດ້ຮັບຜິດຊອບແຕ່ 2-4 ມາດຖານໃນຈຳນວນ 19 ມາດຖານກໍ່ສ້າງຊົນນະບົດໃໝ່. ບັນດາອົງການຈັດຕັ້ງຊາວໜຸ່ມ ແລະ ສະມາຊິກຊາວໜຸ່ມ ໄດ້ສ້າງເປັນຫຼາຍສະຫະກອນຜະລິດ, ດຳເນີນທຸລະກິດ, ສ້າງວຽກເຮັດງານທຳໃຫ້ຊາວໜຸ່ມຊົນນະບົດເຊັ່ນ: ສະຫະກອນຜະລິດປຸງແຕ່ງເຂົ້າ, ສະຫະກອນໂຄສະນາ, ສະຫະກອນຈັກສານ… ເອື້ອຍ ໂຕນງອກແຫ້ງ, ເລຂາຄະນະຊາວໜຸ່ມແຂວງບິ່ງເຟືອກ, ໃຫ້ຮູ້ວ່າ:
“ໄວໜຸ່ມບິ່ງເຟືອກ ເຂົ້າຮ່ວມວິວັດການກໍ່ສ້າງຊົນນະບົດໃໝ່ ດ້ວຍບັນດາການເຄື່ອນໄຫວລະອຽດ. ບັນດາໜ່ວຍຊາວໜຸ່ມເກືອບທັງໝົດໄດ້ຈົດທະບຽນເຮັດຕາມຄວາມສາມາດຂອງຕົນ. ຄະນະຊາວໜຸ່ມຮາກຖານມີແຫຼ່ງກຳລັງນ້ອຍແມ່ນເຮັດກິດຈະກຳນ້ອຍ, ສ່ວນຄະນະຊາວໜຸ່ມເມືອງ, ແຂວງ ມີແຫຼ່ງກຳລັງຫຼາຍກວ່າຈະເຮັດບັນດາກິດຈະກຳໃຫຍ່ກວ່າ“.
ໂດຍແມ່ນແຂວງທີ່ທຸກຍາກ, ມີຫຼາຍຊົນເຜົ່າສ່ວນໜ້ອຍຢູ່ຮ່ວມກັນ, ວຽກງານກໍ່ສ້າງຊົນນະບົດໃໝ່ພວມວາງອອກບັນດາໜ້າທີ່ໜັກໜ່ວງໃຫ້ແຂວງບິ່ງເຟືອກ. ຄຽງຂ້າງການໜູນຊ່ວຍຂອງລັດ ແລະ ການລະດົມແຫຼ່ງກຳລັງໃນໝູ່ປະຊາຊົນ, ບັນດາທ້ອງຖີ່ນກໍ່ຮຽກຮ້ອງການສະໜັບສະໜູນຈາກບັນດາວິສາຫະກິດເພື່ອລົງທຶນກໍ່ສ້າງພື້ນຖານໂຄງລ່າງ, ສູ້ຊົນຮອດປີ 2020 ຈະມີ 46 ຕາແສງຂອງແຂວງບິ່ງເຟືອກ ບັນລຸມາດຖານຊົນນະບົດໃໝ່.