(vovworld) – ບັນດາເສັ້ນທາງປູຢາງຂະໜາດໃຫຍ່. ທາງບ້ານຖືກກໍ່ສ້າງດ້ວຍເບຕົງທີ່ສະອາດ, ບັນດາໂຮງຮຽນຫຼັງໃໝ່ຫຼືສຸກສາລາທີ່ສະອາດສວຍງາມນັ້ນແມ່ນໂສມໜ້າໃໝ່ຂອງ 25 ຕາແສງທີ່ພວມກໍ່ສ້າງຊົນນະບົດໃໝ່ຢູ່ແຂວງໄຕນິງ. ພ້ອມກັນນັ້ນ, ຄຸນນະພາບການດຳລົງຊີວິດຂອງປະຊາຊົນໄດ້ຮັບການຍົກສູງຂຶ້ນ, ສິ່ງດັ່ງກ່າວໄດ້ສ້າງຄວາມເບີກບານມ່ວນຊື່ນໃຫ້ແກ່ປະຊາຊົນຢູ່ຫຼາຍທ້ອງຖີ່ນໃນແຂວງ. ໄດ້ຮັບຜົນງານດັ່ງກ່າວແມ່ນຍ້ອນມີການຮ່ວມແຮງຮ່ວມໃຈລະຫວ່າງປະຊາຊົນ ແລະ ອຳນາດການປົກຄອງໃນການນຳໃຊ້, ເສີມຂະຫຍາຍທຸກແຫຼ່ງກຳລັງເພື່ອພັດທະນາບ້ານເກີດເມືອງນອນ.
ເສັ້ນທາງສາຍຕ່າງໆຢູ່ໄຕນິງລ້ວນແຕ່ໄດ້ຮັບການປູຢາງຢ່າງສະອາດສວຍງາມ
(ພາບ: ອິນເຕີແນດ)
ສະເພາະປີນີ້, ລາຍຈ່າຍທັງໝົດທີ່ແຂວງໄຕນິງ ໄດ້ລົງທຶນໃຫ້ 9 ຕາແສງກໍ່ສ້າງຊົນນະບົດໃໝ່ແມ່ນຂຶ້ນເຖິງກວ່າ 600 ຕື້ດົ່ງ. ໃນນັ້ນສ່ວນໜຶ່ງແມ່ນຫັກຈາກງົບປະມານຂອງແຂວງ, ສ່ວນຍັງເຫຼືອແມ່ນການປະກອບສ່ວນຂອງປະຊາຊົນ ແລະ ບັນດາວິສາຫະກິດໃນບໍລິເວນ. ໃນຈຳນວນ 25 ຕາແສງທີ່ແຂວງໄຕນິງເລືອກເຟັ້ນເພື່ອຜັນຂະຫຍາຍໂຄງການກໍ່ສ້າງຊົນນະບົດໃໝ່ໄລຍະ 2011 – 2015, ຕາແສງແທກດົງ (ເມືອງເຕິນເຈົ້າ) ແມ່ນຕາແສງທີ່ໄດ້ຮັບແຫຼງທຶນຫຼາຍກວ່າໝູ່ ດ້ວຍກວ່າ 100 ຕຶ້ດົ່ງ. ເງິນຈຳນວນດັ່ງກ່າວແມ່ນລົງທຶນໃຫ້ວຽກງານກໍ່ສ້າງພື້ນຖານໂຄງລ່າງ. ມາຮອດປະຈຸບັນ, ອັດຕາຄອບຄົວມີໄຟຟ້າໃຊ້ແມ່ນ 99,9%, ລະບົບທາງຄົມມະນາຄົມ, ໂຮງຮຽນ, ສຸກສາລາ, ຫໍວັດທະນະທຳ, ໄປສະນີ ໄດ້ຮັບການກໍ່ສ້າງຢ່າງໃຫຍ່ໂຕໂອໂຖງ ແລະ ສວຍງາມ. ປະຈຸບັນ, ຕາແສງແທກດົງມີຄອບຄົວທີ່ທຸກຍາກພຽງ 35 ຄອບຄົວ, ເທົ່າກັບ 1,6% ຈຳນວນຄອບຄົວທັງໝົດໃນຕາແສງເທ່ົານັ້ນ. ແທງດົງ ພວມສູ້ຊົນເພື່ອບັນລຸຄາດໝາຍ ກາຍຕາແສງທຳອິດຂອງແຂວງບັນລຸ 19 ມາດຖານກ່ຽວກັບການກໍ່ສ້າງຊົນນະບົດໃໝ່. ທ່ານ ຟ້າມຫວູຕຸ່ງ, ປະທານຄະນະກຳມະການປະຊາຊົນຕາແສງແທງດົງ, ໃຫ້ຮູ້ວ່າ:
“ຕາແສງແທງດົງບັນລຸໄດ້ 11/19 ມາດຖານກ່ຽວກັບການກໍ່ສ້າງຊົນນະບົດໃໝ່, ພວກຂ້າພະເຈົ້າສູ້ຊົນຮອດທ້າຍປີນີ້ຈະບັນລຸໃຫ້ໄດ້ 8 ມາດຖານທີ່ຍັງເຫຼືອ. ນີ້ແມ່ນໂຄງການທີ່ໄດ້ຮັບຄວາມເຫັນດີເຫັນພ້ອມສູງຈາກປະຊາຊົນ“
ໃນວິວັດແຫ່ງການກໍ່ສ້າງຊົນນະບົດໃໝ່, ຊາວໄຕນິງ ຫຼາຍຄົນ ໄດ້ສ້າງບັນດາຮູບແບບຜະລິດທີ່ມີປະສິດທິຜົນຄື,: ຮູບແບບລ້ຽງໂຕແລນ, ລ້ຽງໄກ່ພັນເອົາຊີ້ນ, ລ້ຽງງູສົມທົບກັບການລ້ຽງກົບ, ປາປະດັບ…ຫວ່າງແລ້ວນີ້ຢູ່ຫຼາຍຕາແສງໃນແຂວງໄຕນິງ, ພໍ່ແມ່ປະຊາຊົນຍັງນຳໃຊ້ວິທະຍາສາດເຕັກນິກເຂົ້າໃນການປູກອ້ອຍ, ປູກມັນຕົ້ນທີ່ໃຫ້ສະມັດຕະພາບ ແລະ ຄຸນນະພາບສູງ. ອ້າຍ ຕ້າຮ່ວາງແທກ, ຢູ່ຕາແສງເຟືອກນິງ, ເມືອງ ເຢືອງມິງເຈົາ, ແມ່ນຜູ້ພັດທະນາຟາມລ້ຽງໝູສົມທົບກັບການລ້ຽງປາໃນເນື້ອທີ່ກວ່າ 2 ເຮັກຕາ. ມາຮອດປະຈຸບັນ, ຟາມຂອງອ້າຍສ້າງລາຍຮັບໄດ້ກວ່າ 3 ຕື້ດົ່ງ/ປີ. ອ້າຍແທກ ແບ່ງປັນວ່າ:
“ຂ້າພະເຈົ້າລ້ຽງໝູ ເພາະວ່າມັນເໝາະສົມກັບກັບເຂດຊົນນະບົດນີ້ ທີ່ສຸດ. ລ້ຽງໝູຢູ່ເທິງ, ລ້ຽງປາຢູ່ໃຕ້, ເຮັດຄືແນວນັ້ນສາມາດນຳໃຊ້ຝຸ່ນໃນການປູກມັນຕົ້ນ ແລະ ອ້ອຍ, ຫຼຸດຜ່ອນຄ່າຜະລິດ. ນອກນັ້ນ, ອາຊີບລ້ຽງໝູກໍ່ງ່າຍ ແລະ ເໝາະສົມກັບປະຊາຊົນ“.
ພາບປະກອບ ເພື່ອປະຕິບັດໂຄງການກໍ່ສ້າງຊົນນະບົດໃໝ່, ແຂວງໄຕນິງ ໄດ້ຜັນຂະຫຍາຍແຜນຮ່າງບຳລຸງສ້າງວິຊາຊີບໃຫ້ແກ່ຜູ້ອອກແຮງງານຊົນນະບົດ, ປະກອບຄວາມຮູ້ໃນການປູກຝັງ ແລະ ລ້ຽງສັດໂດຍພື້ນຖານໃຫ້ແກ່ປະຊາຊົນ, ຊ່ວຍໃຫ້ເຂົາເຈົ້າເສີມຂະຫຍາຍຄວາມສາມາດສ້າງຄວາມຮັ່ງມີໃນບ້ານເກີດເມືອງນອນຂອງຕົນ. ທາງແຂວງໄດ້ເປີດຫ້ອງຮຽນວິຊາຊີບເກືອບ 360 ຫ້ອງ, ບຳລຸງສ້າງໃຫ້ຜູ້ອອກແຮງງານປະມານ 11.000 ຄົນ. ທ່ານ ຫງວຽນວັນຮຶງ, ຮອງປະທານຄະນະກຳມະການປະຊາຊົນຕາແສງລອງແທ່ງບັກ, ເມືອງຮ່ວາແທ່ງ, ແຂວງໄຕນິງ, ໃຫ້ຮູ້ວ່າ:
“ຕາແສງລອງແທ່ງບັກ ແມ່ນຕາແສງພວມກໍ່ສ້າງຊົນນະບົດໃໝ່, ດັ່ງນັ້ນປະຊາຊົນໃນເກນອາຍຸອອກແຮງງານຕ້ອງມີວຽກເຮັດງານທຳ, ຕາມຄາດໝາຍທີ່ວາງອອກແມ່ນ 60%. ມາຮອດປະຈຸບັນທາງຕາແສງບັນລຸໄດ້ 40%ແລ້ວ. ພວກຂ້າພະເຈົ້າຈະໂຄສະນາ, ຂົນຂວາຍປະຊາຊົນ, ພາຍຫຼັງເຂົ້າຮ່ວມຊຸດບຳລຸງວິຊາຊີບ, ຄວນເລືອກເອົາອາຊີບໃດໜຶ່ງທີ່ເໝາະສົມເພື່ອປະກອບສ່ວນປະຕິບັດການກໍ່ສ້າງຕາແສງຊົນນະບົດໃໝ່ໃຫ້ສຳເລັດໃນປີ 2015“
ສະເພາະປີ 2014, ແຂວງ ໄຕນິງ ລົງທຶນປະມານ 7 ຕຶ້ດົ່ງເພື່ອບຳລຸງວິຊາຊີບໃຫ້ແກ່ ຜູ້ອອກແຮງງານໃນແຂວງກວ່າ 5.000 ຄົນ.
ແຂວງໄຕນິງ ສູ້ຊົນຮອດປີ 2015 ຢ່າງໜ້ອຍສຸດກໍ່ມີ 20% ຕາແສງບັນລຸມາດຖານຊົນນະບົດໃໝ່. ບັນດາຜົນງານທີ່ບັນລຸໄດ້ນັ້ນ ແມ່ນພື້ນ ຖານເພື່ອໃຫ້ປະຊາຊົນ ແລະ ອຳນາດການປົກຄອງແຂວງໄຕນິງທຸກຂັ້ນຜັນຂະຫຍາຍໂຄງການກໍ່ສ້າງຊົນນະບົດໃໝ່ ຢ່າງມີປະສິດທິຜົນ.