(vovworld) - ພ້ອມກັບຊາວໜຸ່ມໃນທົ່ວປະເທດ, ໄວໜຸ່ມແຂວງ ອຽນບ໋າຍ ໄດ້ຕອບສະໜອງຂະບວນການກໍ່ສ້າງຊົນນະບົດໃໝ່ດ້ວຍບັນດາການເຄື່ອນໄຫວ, ລາຍການລະອຽດ. ບັນດາໂຄງການ, ຮູບແບບພັດທະນາເສດຖະກິດຂອງຊາວໜຸ່ມເໝາະສົມກັບເງື່ອນໄຂຕົວຈິງຂອງທ້ອງຖິ່ນ, ໄດ້ ແລະ ພວມປະກອບສ່ວນຍູ້ໄວໂຄງການກໍ່ສ້າງຊົນນະບົດໃໝ່ຢູ່ແຂວງ ອຽນບ໋າຍ. ບົດຂຽນ “ໄວໜຸ່ມແຂວງ ອຽນບ໋າຍ ຮ່ວມແຮງຮ່ວມໃຈກໍ່ສ້າງຊົນນະບົດໃໝ່” ຂອງເທື່ອຊວນ, ນັກຂ່າວ VOV.
ອຽນບ໋າຍ ແມ່ນແຂວງພູດອຍທາງພາກເໜືອ ຫວຽດນາມ, ທີ່ຍັງປະສົມກັບຄວາມຫຍຸ້ງຍາກຫຼາຍຢ່າງ. ໂດຍກຳນົດໄດ້ວ່າມາດຖານທີ 10 (ມາດຖານດ້ານລາຍຮັບ) ແມ່ນມາດຖານສຳຄັນເພື່ອຈຳກັດສະພາບການສະມາຊິກຊາວໜຸ່ມປະລະເຮືອນຊານບ້ານຊ່ອງໄປເຮັດວຽກຢູ່ແຂວງອື່ນ, ຄະນະຊາວໜຸ່ມແຂວງ ອຽນບ໋າຍ ໄດ້ສ້າງແຜນການລະອຽດເພື່ອພັດທະນາເສດຖະກິດ ແລະ ໂຄສະນາຢ່າງເລິກເຊິ່ງ, ກ້ວາງຂວາງເຖິງສະມາຊິກຊາວໜຸ່ມ. ໝາກຜົນພາຍຫຼັງ 5 ປີແຫ່ງການປະຕິບັດ, ທົ່ວແຂວງກໍ່ສ້າງໄດ້ກ່ວາ 300 ຮູບແບບ, ສະໂມສອນຊາວໜຸ່ມພັດທະນາເສດຖະກິດ, ດ້ວຍການເຂົ້າຮ່ວມຂອງສະມາຊິກຊາວໜຸ່ມນັບພັນຄົນ, ໃນນັ້ນມີຫຼາຍຮູບແບບສ້າງລາຍຮັບໄດ້ແຕ່ 100 – 200 ລ້ານດົ່ງ/ປີ. ພົ້ນເດັ່ນແມ່ນຮູບແບບ “ສະໂມສອນຊາວໜຸ່ມຊ່ວຍເຫລືອກັນພັດທະນາເສດຖະກິດ” ຢູ່ບ້ານ ຮີນລໍ່, ຕາແສງ ອຽນຖັງ, ເມືອງ ລຸກອຽນ ໂດຍອ້າຍ ເຢືອງວັນທູ ເປັນຫົວໜ້າ. ສະໂມສອນມີສະມາຊິກເກືອບ 20 ຄົນນີ້ໄດ້ລົງທຶນປະກອບເຄື່ອງກົນຈັກ, ອຸປະກອນຜະລິດກະສິກຳຫຼາຍຢ່າງເຊັ່ນ: ຈັກດູດຂີ້ຕົ້ມ, ຈັກຂຸດຄົ້ນປ່າ, ລົດໄຖເດີນຕາມເພື່ອຮັບໃຊ້ຄວາມຮຽກຮ້ອງຕ້ອງການຂອງພໍ່ແມ່ປະຊາຊົນໃນບ້ານ, ຕາແສງ. ດັ່ງນັ້ນ, ສະມາຊິກແຕ່ລະຄົນລ້ວນແຕ່ມີລາຍຮັບສະເລ່ຍປະມານ 3 ລ້ານດົ່ງ/ຄົນ/ເດືອນ. ອ້າຍ ຫງວຽນກວາງທ່ວນ, ສະມາຊິກຂອງສະໂມສອນ, ໃຫ້ຮູ້ວ່າ:
“ເມື່ອເຂົ້າຮ່ວມສະໂມສອນຊາວໜຸ່ມຊ່ວຍເຫຼືອກັນເຮັດເສດຖະກິດ, ບັນດາສະມາຊິກໄດ້ຮ່ຳຮຽນເອົາບົດຮຽນຂອງກັນ. ກ້າເຮັດກ້າທຳກ່ວາໃນການຫັນປ່ຽນໂຄງປະກອບຜົນລະປູກ, ໄດ້ສຳພັດກັບບັນດາຮູບແບບເສດຖະກິດໃໝ່ ແລະ ມີລາຍຮັບເປັນປົກກະຕິກ່ວາ.”
ພາບປະກອບຈາກ ອີນເຕີເນັດ
ໄປຄຽງຄູ່ກັບການປະຕິບັດມາດຖານກ່ຽວກັບລາຍຮັບນັ້ນ, ສະມາຊິກຊາວໜຸ່ມ, ຊາວໜຸ່ມແຂວງ ອຽນບ໋າຍ ຍັງໃຫ້ບຸລິມະສິດປະຕິບັດມາດຖານທີ 17, ນັ້ນແມ່ນມາດຖານກ່ຽວກັບສິ່ງແວດລ້ອມໃນການກໍ່ສ້າງຊົນນະບົດໃໝ່. ຊາວໜຸ່ມຕັ້ງໜ້າເຂົ້າຮ່ວມ “ວັນອາທິດຂຽວ” ແລະ “ວັນເສົາອາສາສະໝັກ” ໂດຍແຂວງ ແລະ ສູນກາງຊາວໜຸ່ມກອມມູນິດ ໂຮ່ຈີມິນ ປຸກລະດົມ, ດຳເນີນການເຮັດອະນາໄມທາງເຂົ້າບ້ານ, ຕາແສງ, ຂົນຂວາຍປະຊາຊົນເກັບມ້ຽນ, ກຳຈັດສິ່ງເສດເຫຼືອໃນການດຳເນີນຊີວິດ. ບັນດາການເຄື່ອນໄຫວນີ້ໄດ້ດຶງດູດສະມາຊິກຊາວໜຸ່ມ, ຊາວໜຸ່ມກ່ວາ 10.000 ເທື່ອຄົນເຂົ້າຮ່ວມ. ອ້າຍ ຮ່ວາງຈູງຈີງ, ເລຂາຄະນະຊາວໜຸ່ມເມືອງລຸກອຽນ, ແຂວງ ອຽນບ໋າຍ, ໃຫ້ຮູ້ວ່າ:
“ສຳລັບບັນດາສະມາຊິກຊາວໜຸ່ມເຂົ້າຮ່ວມການກໍ່ສ້າງຊົນນະບົດໃໝ່ນັ້ນ, ພວກຂ້າພະເຈົ້າພວມສຸມໃສ່ເຂົ້າມາດຖານປົກປັກຮັກສາສິ່ງແວດລ້ອມ. ນັ້ນແມ່ນການຂົນຂວາຍປະຊາຊົນຂຸດຂຸມໃສ່ຂີ້ເຫຍື້ອ, ສິ່ງເສດເຫຼືອຢູ່ຄອບຄົວ. ຂົນຂວາຍສັງຄົມຂຸດຂຸມໃສ່ຂີ້ເຫຍື້ອຢູ່ເຂດທົ່ງນາ ແລະ ຫຼັງຈາກນັ້ນຂົນຂວາຍປະຊາຊົນຖິ້ມຖົງ, ບັນຈຸຢາຂ້າສັດຕູພືດ, ຢາປ້ອງກັນພືດໃສ່, ໃນຂຸມນັ້ນເພື່ອໃຫ້ສະມາຊິກຊາວໜຸ່ມ, ຊາວໜຸ່ມກຳຈັດສິ່ງເສດເຫຼືອດັ່ງກ່າວ.”
ຜ່ານ 5 ປີແຫ່ງການປະຕິບັດລາຍການ “ໄວໜຸ່ມແຂວງ ອຽນບ໋າຍ ຮ່ວມແຮງຮ່ວມໃຈກໍ່ສ້າງຊົນນະບົດໃໝ່” ໄດ້ມີນັບຮ້ອຍກິດຈະກຳ, ວຽກງານຕ່າງໆໂດຍຊາວໜຸ່ມປະຕິບັດສຳເລັດຜົນ. ພິເສດໃນຂົງເຂດພັດທະນາເສດຖະກິດ, ພື້ນຖານໂຄງລ່າງ ແລະ ສິ່ງແວດລ້ອມໄດ້ກາຍເປັນການເຄື່ອນໄຫວຈຸດສຸມຂອງໄວໜຸ່ມ ອຽນບ໋າຍ. ຜົນງານໄດ້ຮັບແມ່ນເສັ້ນທາງຊົນນະບົດຍາວເກືອບ 200 ກມ ແລະ ເສັ້ນທາງໃນເຂດທົ່ງນາເກືອບ 100 ກມໄດ້ຮັບການຍົກລະດັບ, ສ້າງໃໝ່, ຫໍວັດທະນະທຳ 114 ແຫ່ງ, ເຮືອນເຄິ່ງກິນນອນຂອງນັກຮຽນ, ເຮືອນແຫ່ງສາຍຈິດມິດໃຈ 128ແຫ່ງ, ເດີນເບຕົງ 44 ແຫ່ງໄດ້ຮັບການກໍ່ສ້າງ. ໃນຂົງເຂດເສດຖະກິດ, ຄະນະຊາວໜຸ່ມທຸກຂັ້ນໄດ້ປູກຕົ້ນໄມ້ໃນເນື້ອທີ່ 420 ເຮັກຕາ, ປູກຊາ ຊານຕວຽດ ໃນເນື້ອທີ່ກ່ວາ 100 ເຮັກຕາ, ນາຂັ້ນໄດ 5 ເຮັກຕາຢູ່ເມືອງ ຈ້າມເຕົ໋າ ແລະ ໝູ່ກັງຈ໋າຍ… ບັນດາໝາກຜົນດັ່ງກ່າວໄດ້ປະກອບສ່ວນພໍສົມຄວນເຂົ້າໃນການປະຕິບັດໂຄງການກໍ່ສ້າງຊົນນະບົດໃໝ່ຂອງທົ່ວແຂວງ ອຽນບ໋າຍ ດ້ວຍ 6 ຕາແສງບັດລຸມາດຖານ ແລະ 40 ຕາແສງບັນລຸໄດ້ 10 ມາດຖານຂຶ້ນໄປ. ເພື່ອສືບຕໍ່ປະຕິບັດຂະບວນການ “ໄວໜຸ່ມແຂວງ ອຽນບ໋າຍ ຮ່ວມແຮງຮ່ວມໃຈກໍ່ສ້າງຊົນນະບົດໃໝ່” ໃຫ້ມີປະສິດທິຜົນໃນໄລຍະຈະມາເຖິງ, ອ້າຍ ເລືອງແມ້ງຮ່າ, ຮອງເລຂາຜູ້ປະຈຳການຄະນະຊາວໜຸ່ມແຂວງ ອຽນບ໋າຍ, ໃຫ້ຮູ້ວ່າ:
“ຄະນະປະຈຳການຄະນະຊາວໜຸ່ມແຂວງໄດ້ກຳນົດບັນດາໜ້າທີ່ຈຸດສຸມໃນການກໍ່ສ້າງຊົນນະບົດໃໝ່, ເພື່ອໃຫ້ຄະນະຊາວໜຸ່ມເຂົ້າຮ່ວມປະຕິບັດບັນດາມາດຖານທີ່ເໝາະສົມກັບຄວາມສາມາດຂອງຄະນະຊາວໜຸ່ມ. ຕົວຢ່າງຄືມາດຖານທີ 2, 3, 6 ແລະ 17 ກ່ຽວກັບການກໍ່ສ້າງພື້ນຖານໂຄງລ່າງເຂດຊົນນະບົດ, ສິ່ງແວດລ້ອມ, ມາດຖານເລກທີ 10, 13 ກ່ຽວກັບການຈັດຕັ້ງການຜະລິດ, ຍົກສູງລາຍຮັບເພື່ອຫັນບັນດາມາດຖານນັ້ນເປັນລະອຽດ”
ດ້ວຍຄວາມສຸດຈິດສຸດໃຈຂອງໄວໜຸ່ມ, ສະມາຊິກຊາວໜຸ່ມ, ຊາວໜຸ່ມກ່ວາ 222.000 ຄົນຢູ່ແຂວງ ອຽນບ໋າຍ ພວມຫ້າວຫັນຮ່ວມແຮງຮ່ວມໃຈກໍ່ສ້າງຊົນນະບົດໃໝ່, ສູ້ຊົນໃຫ້ນັບມື້ນັບມີຫລາຍຕາແສງໄດ້ຮັບການຮັບຮອງວ່າບັນລຸມາດຖານຊົນນະບົດໃໝ່.