សមាជិកក្នុងក្រុមគ្រួសាររបស់លោក Bui Cong Tuyen

ចំពោះប្រជាជនវៀតណាម ដែលកំពុងរស់នៅឡាវនោះទោះបីជាអាកាសធាតុនៅទីនេះមិនមាននិទាឃរដូវក៏ដោយ ប៉ន្តែពួកគេបានទទួលអំណរឆ្នាំថ្មី តាមរយៈឆ្នាំងស្ងោនំអន្សំ ពាក្យប្រស្នាក្រហម មេឃផ្កាម៉ាក់ខៃ ដើមក្រូចឃ្វិច នាពេលបុណ្យតេតមកដល់ម្ដងៗ។

នាវេលាម៉ោង ៦ ព្រឹក សមាជិកក្នុងក្រុមគ្រួសាររបស់លោក Bui Cong Tuyen ដែលរស់នៅភូមិ Amon ស្រុក Chanthabuly ទីក្រុងវៀងច័ន្ទ នៃប្រទេសឡាវបានចាប់ផ្ដើមការងារលាងសម្អាតស្លឹក Dong ដើម្បីវេចនំអន្សម លាងអង្ក ចំហុយសម្ដែកខៀវ និងស្ងោមាន់ ដើម្បីត្រៀមរៀបចំទទួលអំណរឆ្នាំថ្មី។ នៅបន្ទប់បាយវិញ កូនចៅគ្រប់ជំនាន់របស់លោក Tuyen  កំពុងមមាញឹកចម្អិនម្ហូបអាហារដើម្បីរៀបចំថាសបាយសែនជីដូនជីតា។ ជាមនុស្សម្នាក់ដែលបានកើត និងធំដឹងក្ដីនៅទីក្រុងវៀងច័ន្ទនោះ លោក Bui Quang Cuong (ឈ្មោះឡាវ ថា Bunlan Butdee) ដែលមានអាយុ ៤២ ឆ្នាំ ជាកូនប្រុសច្បងក្នុងគ្រួសារ កំពុងអង្គុយវេចនំអន្សមនៅខាងមុខផ្ទះបាយចែករំលែកថា៖

“មុនពេលចូលឆ្នាំថ្មី បងប្អូនសាច់ញាតិក្នុងក្រុមគ្រួសារតែងតែជួបជុំគ្នា ដើម្បី ពិភាក្សាការងារសម្រាប់ឆ្នាំថ្មី បែងចែកការងារគ្នា រៀបចំគ្រឿងសំណែននៅផ្ទះ ឪពុកម្តាយ។ មុខម្ហូប ដែលមិនអាចខ្វះបានក្នុងបុណ្យតេតគឺ នំអន្សម មាន់ស្ងោ និងម្ហូបចៀននានា ឲ្យគ្រប់ ៥ មុខ។ ឪពុកម្តាយបានបង្ហាត់បង្រៀនឲ្យខ្ញុំនូវរបៀបវេចនំអន្សម តាំងពីពេលខ្ញុំមានអាយុត្រឹមតែ ១០ ឆ្នាំប៉ុណ្ណោះ។ ក្រោយមក ឪពុកម្តាយក៏បានប្រគល់ការងារវេចនំអន្សមឲ្យខ្ញុំផងដែរ”។

ទន្ទឹមនឹងនេះ នៅខាងក្នុងផ្ទះ លោក Tuyen និងភរិយាកំពុងយកចិត្តទុកដាក់ លើការរៀបចំអាសនៈដូនតា រៀបចំថាសផ្លែឈើ ៥ មុខ រៀបចំមែកផ្កាម៉ាក់ខៃ និងមែកផ្កាអង្គាសីលនៅក្បែរ អាសនៈដូនតា ។ នេះគឺជាការងារ ដែលលោកតែងតែធ្វើនៅពេលបុណ្យតេតមកដល់ម្ដងៗ។ លោក Tuan បានចែករំលែកថា៖

“ខ្ញុំបានទៅតាម ឪពុកម្តាយរស់នៅឡាវអស់រយៈពេលជាង ៧០ ឆ្នាំហើយ។ នាបច្ចុប្បន្ននេះ គឺជាជំនាន់ទី ៥ ហើយ។ ខ្ញុំតែងតែបង្ហាត់បង្រៀនឲ្យកូនចៅត្រូវបន្តប្រពៃណីមរតករបស់ដូនតា។ ក្នុងអំឡុងបុណ្យតេត ខ្ញុំតែងតែណែនាំឲ្យកូនចៅត្រៀមរៀបចំម្ហបអាហារក្នុងបុណ្យតេត និងររបៀបវេចនំអន្សម។ ដោយសារកូនចៅរបស់ខ្ញុំបានកើត និងធំដឹងក្ដីនៅឡាវ បានជាខ្ញុំមិនត្រឹមតែបង្រៀនកូនចៅនូវរបៀបធ្វើម្ហូបវៀតណាម ប៉ុណ្ណោះទេ ថែមទាំងបានបង្រៀនភាសាវៀតណាម និងជូនពួកគេទៅសិក្សារៀនសូត្រនៅតាមមហាវិទ្យាល័យនៅវៀតណាមទៀតផង”។

នាវេលាម៉ោង ១២ ថ្ងៃត្រង់ ក្រោយពេលរៀបចំម្ហូបរួចជាស្រេចនោះ សមាជិកគ្រួសារលោក Tuyen បានរៀបចំថាសម្ហូប សស្រាប់សែនដូនតា។ ថាសម្ហូបនេះមាន ច្រើនមុខដូចជា៖ នំអន្សម សម្ល សណ្ដែកខៀវឆា និងបាយដំណើបជាដើម។

ក្រោយមកលោក Tuyen បានជូនពរកូនចៅ ឲ្យមានសុខភាពល្អ សុភមង្គលក្នុងឱកាសបុណ្យតេត ហើយថែមទាំងជូនអាំងប៉ាវដល់មនុស្សគ្រប់រូបទៀតផង។ កញ្ញា Nipavan Butee ចៅស្រីរបស់លោក Tuyen ដែលជានិស្សិតនៅមហាវិទ្យាល័យបច្ចេកវិទ្យា ព័ត៌មាននៅខេត្ត Thai Nguyen ក៏បានមកប្រទេសឡាវវិញ ដើម្បីទទួលអំណរបុណ្យតេតជាមួយគ្រួសារ។ កញ្ញាបានសំណេះសំណាលថា៖

“ខ្ញុំតែងតែធ្វើមាតុភូមិនិវត្តមកប្រទេសឡាវវិញ ដើម្បីទទួលអំណរបុណ្យតេត។ នៅពេលបុណ្យតេតមកដល់ម្ដងៗនោះ ទោះបីជាកំពុងរស់នៅ និងសិក្សារៀនសូត្រនៅទីណាក៏ដោយ គឺសុទ្ធតែមានបំណងចង់មកផ្ទះវិញ ដើម្បីជួបជុំជាមួយក្រុមគ្រួសារ។ ក្នុងឱកាសបុណ្យតេត ខ្ញុំចូលចិត្តនំអន្សម និងណែមចៀនណាស់។ លើសពីនេះទៅទៀត ខ្ញុំក៏បានទទួលអាំងព៉ាវទៀតផង”

ដោយសារកូនចៅជាច្រើនជំនាន់របស់លោក Tuyen គឺសុទ្ធតែបានកើត និងធំដឹងក្ដីនៅឡាវ បានជាសកម្មភាពទាំងនេះក៏បានរួមចំណែកទៅក្នុងការអប់រំកូនចៅឲ្យយល់ដឹងថែមទៀតអំពីទំនៀមទំលាប់ប្រពៃណីរបស់ប្រទេសជាតិ ក៏ដូចជារក្សា និងធ្វើត្រាប់តាមផងដែរ។

នាដើមឆ្នាំថ្មី ក្រៅពីសហគមន៍ជនវៀតណាមនោះ ប្រជាជនឡាវ ដែលមានទំនាក់ទំនងជិតស្និទ្ធិ ក៏បានទៅជូនពរបុណ្យតេត ដល់គ្រសារអាណិកជនវៀតណាម និងជូនអាំងប៉ាវឲ្យគ្នាតៅវិញទៅមក ក៏ដូចជាជូនពរលាភសំណាងគ្នាដែរ។ ស្នាមញញឹម និងពាក្យសម្ដី Sabaidii Pimay (សួរស្ដីឆ្នាំថ្មី) របស់ប្រជាជនឡាវ ក៏ជួយប្រជាអាណិកជនវៀតណាមកាត់បន្ថយក្ដីនឹករលឹកស្រុកកំណើតក្នុងឱកាសបុណ្យតេតផងដែរ៕