GDP លើមនុស្សម្នាក់របស់វៀតណាមមានកំណើនគួរឲ្យចាប់អារម្មណ៍បំផុតក្នុងចំណោមប្រទេសទាំងអស់នៅលើពិភពលោក។ និន្នាការនេះឆ្លុះបញ្ចាំងពីភាពស្វាហាប់នៃខឿនសេដ្ឋកិច្ចវៀតណាម និងការអភិវឌ្ឍ លេចធ្លោរបស់ប្រទេសនេះក្នុងប៉ុន្មានឆ្នាំថ្មីៗនេះ។ អត្ថបទដែលបានចេញផ្សាយនៅថ្ងៃទី ២៣ ខែវិច្ឆិកានៅលើគេហទំព័រ forbes.com (សហរដ្ឋអាមេរិក) បានសង្កត់ធ្ងន់ដូច្នេះ។

យោងតាមអ្នកនិពន្ធ ក្នុងដំណាក់កាល ២០០៦ - ២០២១ GDP លើមនុស្សម្នាក់របស់វៀតណាមគិតជាដុល្លារក្នុងតម្លៃបច្ចុប្បន្នបានកើនឡើងជិត ៣៧១% (កើនឡើងជិត ៥ ដង)។ ក្នុងឆ្នាំ ២០០៦ GDP លើមនុស្សម្នាក់របស់វៀតណាម គឺ ជាង ៧៨០ ដុល្លារ/ម្នាក់។ ក្នុងឆ្នាំ ២០២១ គឺជិត ៣៧០០ ដុល្លារ/ម្នាក់។ នេះគឺជាកំណើនគួរឱ្យចាប់អារម្មណ៍។

ដោយបានដកស្រង់ទិន្នន័យពី OEC សម្រាប់ការវិភាគ អ្នកនិពន្ធជឿជាក់ថា ការផ្លាស់ប្តូរក្នុងខឿនសេដ្ឋកិច្ចវៀតណាមក្នុងរយៈពេល ១៥ ឆ្នាំកន្លងទៅ ភាគច្រើនគឺដោយសារខឿនសេដ្ឋកិច្ចវៀតណាមបានធ្វើពិពិធកម្ម។ ក្នុងឆ្នាំ ២០០៦ ផលិតផលនាំចេញធំជាងគេរបស់វៀតណាមគឺប្រេងឆៅដែលមានចំនួន ១៦,៩% នៃតម្លៃប្រាក់នាំចេញដែលស្មើនឹង ៧,៧២ ពាន់លានដុល្លារ។ ទោះជាយ៉ាងណាក៏ដោយ នៅឆ្នាំ ២០២០ ប្រេងឆៅនឹងមានត្រឹមតែ ០,៥៤% នៃតម្លៃប្រាក់នាំចេញរបស់វៀតណាម ដែលស្មើនឹង ១,៦៧ ពាន់លានដុល្លារអាមេរិក។ ផ្ទុយទៅវិញ ឧបករណ៍ផ្សាយសម្លេង និងទូរទស្សន៍បានក្លាយទៅជាមុខទំនិញនាំចេញធំជាងគេរបស់វៀតណាម ដែលស្មើនឹង ១៤% នៃតម្លៃប្រាក់នាំចេញ ស្មើនឹង ៤២ ពាន់លានដុល្លារអាមេរិក។ បន្ទាប់មកគឺទូរសព្ទ និងការនាំចេញគ្រឿងអេឡិចត្រូនិក។

យោងតាមអង្គការ OEC ក្នុងរយៈពេល ២០ ឆ្នាំកន្លងមកនេះ ចំណាត់ថ្នាក់របស់វៀតណាមលើសន្ទស្សន៍សេដ្ឋកិច្ចស្មុគស្មាញ(ECI) ដែលជារង្វាស់រួមនៃសមត្ថភាពផលិតរបស់ទីក្រុង តំបន់ ឬប្រទេសមួយក៏បានកើនឡើងផងដែរពីចំណាត់ថ្នាក់ទី ៨៣ ដល់ចំណាត់ថ្នាក់ទី ៦១ នៅលើពិភពលោក។

និន្នាការកំណើនដ៏គួរឱ្យចាប់អារម្មណ៍នៃ GDP លើមនុស្សម្នាក់របស់វៀតណាម បានឆ្លុះបញ្ចាំងពីភាពស្វាហាប់នៃសេដ្ឋកិច្ច និងការអភិវឌ្ឍ លេចធ្លោរបស់វៀតណាមក្នុងរយៈពេលប៉ុន្មានឆ្នាំកន្លងមកនេះ៕