កញ្ចប់ស្បៀងត្រូវបានចែកជូនប្រជាពលរដ្ឋ និងភ្ញៀវដែលមកចូលរួមក្នុងពិធី។ រូបថត៖ Nhat Anh/TTXVN

កាលពីយប់ថ្ងៃទី ១៧ ខែកុម្ភៈ គណៈកម្មាធិការប្រជាជនស្រុក Ly Nhan (ខេត្ត Ha Nam) បានបើកពិធីបុណ្យចែកស្បៀងនៅប្រាសាទ Tran Thuong។ នេះជាសកម្មភាពប្រពៃណីមួយដើម្បីបួងសួងសុំឲ្យអាកាសធាតុអំណោផល ប្រមូលផលបានល្អ មនុស្សគ្រប់រូបមានសុខភាពល្អ រកស៊ីមានបាន។ ទន្ទឹមនឹងនោះ រំលឹកដល់មនុស្សជំនាន់ក្រោយៗនូវសីលធម៌ “ផឹកទឹក នឹកដល់ប្រភព” រំលឹកគុណូបការៈរបស់ព្រះបាទ Hung Dao Dai Vuong Tran Quoc Tuan ដែលមានគុណប្រយុទ្ធប្រឆាំងនឹងសត្រូវបរទេសឈ្លានពាន ដើម្បីការពារប្រទេសជាតិ។

កម្មវិធីសម្ដែងគង់ឃ្មោះនៅក្នុងពិធីរបស់ជនជាតិ Muong។ (រូបថត៖ TTXVN)

កាលពីថ្ងៃទី ១៧ ខែកុម្ភៈ ពិធីសែនដើម Neu របស់ជនជាតិ Muong បានប្រព្រឹត្តទៅនៅឃុំ Phong Phu ស្រុក Tan Lac ខេត្ត Hoa Binh។ នេះជាពិធីបុណ្យប្រជាប្រិយដ៏ធំបំផុត ដែលបានក្លាយទៅជាសកម្មភាពវប្បធម៌ និងសាសនាដែលមិនអាចខ្វះបានក្នុងបុណ្យតេតរបស់ជនជាតិ Muong។ ពិធីបុណ្យនេះគឺសំដៅសម្ដែងការគោរពបូជាចំពោះព្រះអាទិទេព រំលឹកគុណូបការៈដល់អ្នកគាស់រានដី ស្ថាបនិកភូមិ ព្រមទាំងបួងសួងសុំឱ្យមានការរីកចំរើនគ្រប់ប្រការ រដូវអំណោយផល ជីវភាពសម្បូរធូធារ សុភមង្គលផងដែរ។

នៅខេត្ត Ha Nam កាលពីថ្ងៃទី ១៧ ខែកុម្ភៈ អ្នកចំបាប់ចំនួន ២០០ នាក់មកពី ស្រុក ទីរួមខេត្តនិងទីក្រុងចំនួន ៦ បានចូលរួមក្នុងការប្រកួតកីឡាចំបាប់និទាឃរដូវលើកទី ២៧។ ការប្រកួតកីឡាចំបាប់ប្រចាំឆ្នាំដែលធ្វើឡើងនៅដើមនិទាឃរដូវ គឺជាលក្ខណៈវប្បធម៌ដ៏ស្រស់ស្អាតមួយដើម្បីលើកតម្កើងស្មារតីអង់អាចក្លាហានរបស់ប្រជាជាតិ។

នៅថ្ងៃដដែល មនុស្សរាប់ពាន់នាក់បានមកគាំទ្រការប្រណាំងទូកដ៏គគ្រឹកគគ្រេងនៅ ខេត្ត Khanh Hoa។ នេះជាសកម្មភាពវប្បធម៌ប្រពៃណីដែលជួយថែរក្សា និងលើកតម្កើងភាពស្រស់ស្អាតនៃអរិយធម៌ស្រូវសើម។

ចាប់ពីថ្ងៃទី ១៧ ដល់ថ្ងៃទី ២០ ខែកុម្ភៈ នៅសារមន្ទីរ-បណ្ណាល័យខេត្ត Kon Tum បានរៀបចំកម្មវិធី "វប្បធម៌ប្រពៃណីនិទាឃរដូវឆ្នាំ២០២៤"។ កម្មវិធីគឺសំដៅឧទ្ទេសនាមអំពីអត្តសញ្ញាណវប្បធម៌ និងសិប្បកម្មប្រពៃណីរបស់បណ្ដាជនជាតិភាគតិចក្នុងខេត្ត Kon Tum; ទន្ទឹមនឹងនោះ បង្កើតលក្ខខណ្ឌសម្រាប់សិប្បករជនជាតិភាគតិចដើម្បីមកសម្ដែង ជួបប្រាស្រ័យទាក់ទងគ្នា និងមានឱកាសនាំយកវប្បធម៌ប្រពៃណីខិតមកជិតសាធារណៈជនផងដែរ៕