អគ្គនាយិកា UNESCO លោកស្រី Audrey Azoulay ទទួលជួបឯកអគ្គរដ្ឋទូត ប្រធានស្ថានបេសកកម្មអចិន្ត្រៃយ៍វៀតណាមនៅ UNESCO លោកស្រី Le Thi Hong Van។ (រូបថត៖ VOV)

នៅក្នុងជំនួបនេះ អគ្គនាយិកា UNESCO លោកស្រី  Audrey Azoulay បាន សង្កត់ធ្ងន់ថា វៀតណាមជានិច្ចកាលអះអាងនូវតួនាទីជាសមាជិកដ៏សកម្ម មានការ ទទួលខុសត្រូវ ដែលជាប្រទេសឈានមុខគេមួយក្នុងការអនុវត្តប្រកបដោយប្រសិទ្ធ ភាពនូវកម្មវិធី និងសកម្មភាពរបស់ UNESCO។

លោកស្រីអគ្គនាយិកាអង្គការយូណេស្កូបានអបអរសាទរចំពោះប្រទេសវៀតណាមដែលបានជាប់ឆ្នោតជាសមាជិកគណៈកម្មាធិការបេតិកភណ្ឌពិភពលោកសម្រាប់អាណត្តិឆ្នាំ ២០២៣ - ២០២៧ ជាមួយនឹងចំនួនសំឡេងគាំទ្រច្រើនជាងគេនៅតំបន់ អាស៊ីប៉ាស៊ីហ្វិក។ លោកស្រីបានអះអាងថា លទ្ធផលនេះបង្ហាញឱ្យឃើញពីជំនឿជាក់ និងទំនុកចិត្តអន្តរជាតិចំពោះវៀតណាម ដែលជាគំរូមួយក្នុងការអភិរក្ស ថែរក្សា និង លើកកំពស់តម្លៃបេតិកភណ្ឌ។ ទាក់ទិននឹងកិច្ចសហប្រតិបត្តិការនាពេលខាងមុខ លោកស្រីអគ្គនាយិកា Audrey Azoulay បានសន្យាថា UNESCO នឹងបន្តជួយឧបត្ថម្ភ វៀតណាមក្នុងការកសាង និងជំរុញសំណុំឯកសារបេតិកភណ្ឌ ក៏ដូចជាជួយឧបត្ថម្ភ ដល់ការអភិរក្ស និងលើកកំពស់តម្លៃនៃបេតិកភណ្ឌពិភពលោកនានាដែលត្រូវបាន UNESCO ទទួលស្គាល់ ក្នុងនោះមានគម្រោងអភិរក្ស ជួសជុលនិងលើកកំពស់តម្លៃ នៃមជ្ឈមណ្ឌលព្រះបរមរាជវាំងថាំងឡុង - ហាណូយ។

រីឯខ្លួនវិញ លោកស្រីឯកអគ្គរដ្ឋទូត Le Thi Hong Van បានអះអាងថា វៀតណាម យកចិត្តទុកដាក់យ៉ាងខ្លាំងចំពោះកិច្ចសហប្រតិបត្តិការជាមួយ UNESCO; សង្ឃឹមថា UNESCO នឹងបន្តជួយឧបត្ថម្ភ រួមដំណើរ និងចែករំលែកជាមួយវៀតណាម ជាពិសេស ចំណេះដឹង គំនិត បទពិសោធន៍ គំរូ និងកិត្តិនាម រួមចំណែកប្រកបដោយប្រសិទ្ធភាព ក្នុងការអភិវឌ្ឍសេដ្ឋកិច្ចសង្គមប្រកបដោយចីរភាព និងបរិយាប័ន្ននៅវៀតណាម៕