ភូមិ Huoi Hoc មើលពីខាងលើ (រូបថត៖ Ngọc Anh/VOV5)

ភូមិ Huoi Hoc ត្រូវបានបង្កើតឡើងដោយឈរលើមូលដ្ឋាន “គម្រោងរៀបចំ ស្ថេរភាពប្រជាជន អភិវឌ្ឍន៍សេដ្ឋកិច្ច-សង្គម ធានាការពារជាតិនិងសន្តិសុខនៅស្រុក Muong Nhe” ដែលត្រូវបានលោកនាយករដ្ឋមន្រ្តីអនុម័តកាលពីថ្ងៃទី ១២ ខែមករា ឆ្នាំ ២០១២ (ហៅកាត់ថាគម្រោង ៧៩)។

គ្រួសារដែលផ្លាស់ទីលំនៅទៅកន្លែងថ្មីត្រូវបានរដ្ឋជួយសាងសង់ផ្ទះនិងជួយឧបត្ថម្ភ ផលិតកម្មក្រោមកម្មវិធីគោលដៅជាតិដើម្បីធានាដល់ជីវភាពរស់នៅរបស់ប្រជាជន។ លោក Nguyen Quang Hung លេខាគណៈ កម្មាធិការបក្សស្រុក Muong Nhe បានឲ្យដឹងថា៖ “ស្រុក Muong Nhe អនុវត្តយ៉ាងសកម្មនូវកម្មវិធីគោល ដៅជាតិស្តីពីការលុបបំបាត់ភាពអត់ឃ្លាននិងកាត់បន្ថយភាពក្រីក្រ កម្មវិធីកសាងជនបទថ្មី កម្មវិធីអភិវឌ្ឍន៍សេដ្ឋកិច្ច-សង្គម សម្រាប់ឃុំដែលជួបការលំបាក នៅតំបន់ព្រៃភ្នំនិងតំបន់ឆ្ងាយដាច់ស្រយាល។ កម្មវិធីទាំងនេះ បានជះឥទ្ធិពលយ៉ាងខ្លាំងទៅលើការកែលំអជីវភាពរស់នៅ និងបង្កើតការងារធ្វើសម្រាប់ប្រជាជន។ យ៉ាងណាមិញ ជីវភាពរស់នៅរបស់ប្រជាជន មានការផ្លាស់ប្តូរជាជំហានៗ ជាពិសេសអត្រាគ្រួសារក្រីក្រមានការថយចុះគួរឲ្យកត់សម្គាល់។ Muong Nhe គឺជាស្រុកក្រីក្រមួយក្នុងចំណោមស្រុកក្រីក្របំផុតចំនួន ៦២ នៅទូទាំងប្រទេស។ មុននេះ មានចំនួនគ្រួសារក្រីក្រជាង ៨០% ប៉ុន្តែឥឡូវមានជាង ៦០% ជាពិសេស មានឃុំខ្លះបានធ្វើអោយអត្រាភាពក្រីក្រធ្លាក់ចុះនៅត្រឹម ៣៨% ប៉ុណ្ណោះ”។

កុមារទៅសាលារៀននៅលើស្ពានឆ្លងចូលភូមិ Huoi Hoc (រូបថត៖ Ngọc Anh/VOV5)

នាថ្ងៃទី ៤ ខែតុលាឆ្នាំ ២០១៩ ខេត្ត Dien Bien បានចេញនូវផែនការជួយទ្រទ្រង់ការកសាងផ្ទះដល់គ្រួសារក្រីក្រនៅស្រុក Muong Nhe។ គំរូផ្ទះចំនួនពីរត្រូវបានជ្រើសរើសសម្រាប់ការសាងសង់ ដែលស្របតាមលក្ខខណ្ឌអាកាសធាតុ ដីធ្លីនិងទំនៀមទម្លាប់ ជាពិសេស សម្រាប់ជនជាតិភាគតិចដែលរស់នៅតំបន់ភ្នំនៃព្រំដែនភាគខាងជើង។ អង្គភាពសំខាន់ៗនៃកងកម្លាំងប្រដាប់អាវុធ (ប៉ូលីស កងទ័ព) បានបង្កើតក្រុមការងារដោយផ្ទាល់ ដើម្បីចុះមូលដ្ឋានត្រួតពិនិត្យនិងចូលរួមកសាងផ្ទះនីមួយៗ ជូនប្រជាជន។ លោកវរសេនីយ៍ឯក Vu Van Hung ប្រធាននគរបាលស្រុក Muong Nhe បានឲ្យដឹងថា៖ “គម្រោងលេខ ៧៩ ដែលបានរៀបចំនៅក្នុងភូមិ Huoi Hoc មាន ៣២ គ្រួសារ។ ចាប់តាំងពីឆ្នាំ ២០១៧ មក កម្លាំងសមត្ថកិច្ចបានសាងសង់រួចរាល់ចំនួនផ្ទះ ៣២/៣២ ខ្នង ពោលគឺ សម្រេចការកសាងបានផ្ទះ ១០០%។ ក្នុងចំណោម ៣២ គ្រួសារនេះ មាន ១៩ គ្រួសារទទួលបានការជួយឧបត្ថម្ភ យោងតាមសេចក្តីសម្រេចរបស់រដ្ឋមន្រ្តីក្រសួងនគរបាល ក្នុងតម្លៃ ៥០ លាន/ខ្នង។ លក្ខណៈវិនិច្ឆ័យទទួលបានផ្ទះ១ខ្នង  គឺដោយអ្នកភូមិដាក់ចេញ ពោលគឺ អ្នកដែលមានស្ថានភាពលំបាកខ្លាំងនឹងទទួលបានផ្ទះឧបត្ថម្ភ។ នៅក្នុងភូមិ ប៉ូលីសនឹងជួយសាងសង់ផ្លូវថ្នល់ អគ្គិសនី ទឹកនិងផ្តល់ដីកសិកម្មដល់គ្រួសារនីមួយៗ ដែលមានផ្ទៃដី ២ ហិកតាលើគ្រួសារមួយ”។

កម្មាភិបាលប៉ូលីសចុះសួរសុខទុក្ខអ្នកភូមិ Huoi Hoc (រូបថត៖ Ngoc Anh/VOV5)

ប្រជាជននៅភូមិ Huoi Hoc គឺពឹងផ្អែកលើកសិកម្មនិងព្រៃឈើ ធ្វើស្រែចំការ ចិញ្ចឹមសត្វ ការដាំបន្លែ ដាំដំណាំកៅស៊ូ និងដើមឈើហូបផ្លែជាដើម។ យ៉ាងណាមិញ អាជ្ញាធរមូលដ្ឋានបានផ្សព្វផ្សាយនិងណែនាំឲ្យប្រជាជនធ្វើស្រែចំការ កែលម្អដីផលិតកម្ម។ ហេតុដូច្នេះ ជីវភាពរស់នៅរបស់ប្រជាជននៅភូមិ Huoi Hoc ត្រូវបានកែលម្អពីមួយថ្ងៃទីមួយថ្ងៃ។ លោក Vu A Tu នៅភូមិ Huoi Hoc បានរៀបរាប់ថា៖ “កាលពីមុនខ្ញុំរស់នៅក្នុងស្រុក Tuan Chau ខេត្ត Son La ហើយបានធ្វើចំណាកស្រុកទៅភូមិ Nam Po ស្រុក Muong Nhe បន្ទាប់មក មកដល់ទីនេះតាមរយៈគម្រោងលេខ ៧៩ តាំងពីឆ្នាំ ២០១៧។ គ្រួសារខ្ញុំមាន ៧ នាក់ រស់នៅក្នុងផ្ទះតែមួយ។ រដ្ឋបានជួយប្រជាជនពូជរុក្ខជាតិ និងសត្វគោក្របី ហើយកម្មាភិបាលប៉ូលីសជួយសាងសង់ផ្ទះសម្រាប់ភូមិទាំងមូល។ ខ្ញុំធ្វើការជាកម្មករជ័រកៅស៊ូ ដែលមានប្រាក់ខែ ៤ លានដុងក្នុងមួយខែ។ ផ្ទះមានដីស្រែ ២ ហិកតា ហើយក្នុងមួយឆ្នាំប្រមូលផលដំណាំបាន១ដង។ កាលពីមុនគ្រួសារចិញ្ចឹមសត្វជ្រូក ប៉ុន្តែដោយសារជំងឺ យើងចិញ្ចឹមតែមាន់និងទាប៉ុណ្ណោះ។ ពេលគ្មានដីសម្រាប់ផលិតគឺមានការលំបាកខ្លាំងណាស់ ប៉ុន្តែឥឡូវនេះ ជីវភាពបានផ្លាស់ប្តូរ ហើយការធ្វើផលិតកម្មកាន់តែមានស្ថិរភាព។ ដូច្នេះ យើងនឹងនរចិត្តរស់នៅទីនេះដោយគ្មានបំណងចេញទៅណាទៀតឡើយ”។

ដោយមានការយកចិត្តទុកដាក់និងជំនួយពីរដ្ឋ រួមជាមួយកិច្ចខិតខំប្រឹងប្រែងក្នុងការផលិតរបស់ប្រជា ជនជនជាតិភាគតិច Mong នៅភូមិ Huoi Hoc បានឈាបទៅទំព័រថ្មីនិងមានការផ្លាស់ប្តូរជាច្រើន។ ប្រជា ជននៅភូមិ Huoi Hoc អារម្មណ៍ថាមានសុវត្ថិភាពក្នុងការផលិត។ ជីវភាពសុខសាន្តត្រាន សុភមង្គល បានវិលត្រឡប់មករកប្រជាជននៅភូមិ Huoi Hoc ពិតប្រាកដ្ឋហើយ៕