ກອງປະຊຸມສຳມະນາ“ຊອກຫາມາດຕະການສັນຕິພາບໃຫ້ບັນດາການຂັດແຍ້ງຢູ່ທະເລຕາເວັນອອກຈາກທັດສະນະຂອງອາຊຽນ”
(ພາບປະກອບ)
(vovworld) - ວັນທີ 01/09, ຢູ່ນະຄອນຫຼວງ ຈາກາຕາ, ປະເທດອິນໂດເນເຊຍ, ໄດ້ດຳເນີນກອງປະຊຸມສຳມະນາສາກົນຄັ້ງທີ 2 ດ້ວຍຫົວຂໍ້ວ່າ “ຊອກຫາມາດຕະການສັນຕິພາບໃຫ້ບັນດາການຂັດແຍ້ງຢູ່ທະເລຕາເວັນອອກຈາກທັດສະນະຂອງອາຊຽນ”. ເຫດການໂດຍສູນຄົ້ນຄວ້າອາຊີຕາເວັນອອກສ່ຽງໃຕ້ ຈັດຕັ້ງ, ດ້ວຍການເຂົ້າຮ່ວມຂອງນັກຮຽນຮູ້, ນັກຊ່ຽວຊານ, ບັນດານັກຄົ້ນຄວ້າ ທີ່ມາຈາກບັນດາສູນ, ສະຖາບັນຄົ້ນຄວ້າຂອງບັນດາປະເທດອາຊີຕາເວັນອອກ ແລະ ອາຊີຕາເວັນອອກສ່ຽງໃຕ້. ກ່າວຄຳເຫັນໄຂກອງປະຊຸມສຳມະນາ, ທ່ານ Siswo Pramono, ຫົວໜ້າກົມພັດທະນາ ແລະ ໄຈ້ແຍກນະໂຍບາຍ, ສັງກັດກະຊວງການຕ່າງປະເທດ ອິນໂດເນເຊຍ ເນັ້ນໜັກເຖິງສະພາບຕົວຈິງຂອງບັນດາການຜັນແປທີ່ສັບສົນຢູ່ທະເລຕາເວັນອອກ, ພວມຮຽກຮ້ອງໃຫ້ບັນດາປະເທດສະມາຊິກອາຊຽນ ຕ້ອງເພີ່ມທະວີຄວາມສາມັກຄີ ເພື່ອຈຸດໝາຍພັດທະນາລວມ.
ກ່ຽວກັບບົດບາດຂອງອາຊຽນ ໃນບັນຫາທະເລຕາເວັນອອກ, ທ່ານຮອງສາດສະດາຈານ, ປະລິຍາເອກ Ralf Emmers, ສັງກັດມະຫາວິທະຍາໄລເຕັກໂນໂລຊີ Nanyang, ສິງກະໂປ ໃຫ້ຮູ້ວ່າ, ອາຊຽນ ພວມມານະພະຍາຍາມແກ້ໄຂບັນຫາທະເລຕາເວັນອອກ ແລະ ນີ້ຈະແມ່ນໜຶ່ງໃນບັນດາເນື້ອໃນສຳຄັນທີ່ໄດ້ປຶກສາຫາລືທີ່ກອງປະຊຸມສຸດຍອດອາຊຽນ ຄັ້ງທີ 28 – 29 ເຊິ່ງຖືກຈັດຂຶ້ນຢູ່ລາວ ໃນໄລຍະຈະມາເຖິງ.