(vovworld) – ວັນທີ 16/8 ຢູ່ ຮ່າໂນ້ຍ, ອົງການກວດກາລັດຖະບານສົມທົບກັບທະນາຄານໂລກ (ຫຼື WB) ແລະ ບັນດານັກອຸປະຖຳໄດ້ຈັດຕັ້ງກອງປະຊຸມສຳມະນາກາງສະໄໝໂຄງການຂໍ້ລິເລີ່ມປ້ອງກັນ, ຕ້ານການສໍ້ລາດບັງຫຼວງ (ຫຼື VACI) 2011. ກອງປະຊຸມສຳມະນາລວມມີ 3 ວາລະປຶກສາຫາລື, ຕີລາຄາເລື່ອງປະຕິບັດບັນດາໂຄງການທີ່ຍາດໄດ້ລາງວັນຂອງ VACI 2011, ຜ່ານນັ້ນໄດ້ສະເໜີບັນດາມາດຕະການໜູນຊ່ວຍ, ເພີ່ມທະວີຄວາມສາມາດປະຕິບັດໂຄງການ, ກໍຄືນຳສະເໜີບັນດາແນວຄວາມຄິດ ກ່ຽວກັບການທະວີຄຸນບັນດາຂໍ້ລິເລີ່ມທີ່ມີປະສິດທິຜົນຢ່າງແທດຈິງ. ການນຳອົງການກວດກາລັດຖະບານ ແລະ ທະນາຄານໂລກ ເນັ້ນໜັກລະດັບສໍ້ລາດບັງຫຼວງພວມມີທ່າອ່ຽງເພີ່ມຂຶ້ນໃນບັນດາຂົງເຂດເສດຖະກິດ, ສັງຄົມ ຢູ່ຫວຽດນາມ. ບົດຮຽນຂອງຫວຽດນາມ ແລະ ໂລກໃຫ້ເຫັນວ່າ: ຍັງສາມາດຈຳກັດໄພສໍ້ລາດບັງຫຼວງ ດ້ວຍການເປີດເຜີຍ ແລະ ກະຈ່າງແຈ້ງ, ໃນນັ້ນມອບສິດໃຫ້ແກ່ປະຊາຊົນເຂົ້າຮ່ວມການປ້ອງກັນ, ຕ້ານໄພສໍ້ລາດບັງຫຼວງ ແມ່ນໜຶ່ງໃນບັນດາມາດຕະການສຳຄັນ. ທ່ານຮອງຫົວໜ້າອົົງການກວດກາລັດຖະບານຫວຽດນາມ Nguyen Duc Hanh ໃຫ້ຮູ້ວ່າ:
“ຜ່ານກ່ວາ 1 ປີແຫ່ງການຜັນຂະຫຍາຍປະຕິບັດໂຄງການ VACI 2011 ໄດ້ເສີມຂະຫຍາຍບົດບາດ ແມ່ນຂົວເຊື່ອມຕໍ່ເພື່ອໃຫ້ບັນດາແນວຄວາມຄິດຂອງວົງຄະນະຍາດ ສາມາດມາສູ່ກັບບັນດາອົງການຄຸ້ມຄອງຂອງລັດ, ກໍຄືບັນດາຄວາມຮູ້ດ້ານກົດໝາຍ ກ່ຽວກັບການປ້ອງກັນ, ຕ້ານການສໍ້ລາດບັງຫຼວງ. ກອງປະຊຸມສຳມະນາໃນມື້ນີ້ ແມ່ນ ໂອກາດເພື່ອໃຫ້ອົງການກວດກາລັດຖະບານ, ທະນາຄານໂລກ, ບັນດານັກອຸປະຖຳ ແລະ ບັນດາເຈົ້າຂອງໂຄງການພ້ອມກັນປຶກສາຫາລື, ຍົກໃຫ້ເຫັນແນວຄວາມຄິດອອກແບບໃຫ້ແກ່ໂຄງການ VACI 2013, 2015 ບົນຈິດໃຈປ່ຽນແປງໃໝ່, ເສີມຂະຫຍາຍບັນດາຈຸດແຂງແຮງ, ດັດປັບບັນດາຈຸດທີ່ບໍ່ທັນມີປະສິດທິຜົນຂອງ VACI 2011. ພວກຂ້າພະເຈົ້າເຊື່ອໝັ້ນວ່າ: ຜ່ານກອງປະຊຸມສຳມະນານີ້, ບັນດາເຈົ້າຂອງໂຄງການສາມາດຮັບຮູ້ບັນດາບົດຮຽນຕົວຈິງເປັນຢ່າງດີ ເພື່ອໃຫ້ບັນດາໂຄງການມີຫົວຄິດປະດິດສ້າງ ແລະ ຄຸນນະພາບກ່ວາ.”