(vovworld) - ຫວ່າງແລ້ວນີ້, ສື່ເອລັກໂຕນິກ cogitASIA ສັງກັດລາຍການອາຊີ ຂອງສູນຄົ້ນຄວ້າຍຸດທະສາດ ແລະ ສາກົນ (CSIS), ເຊິ່ງມີສຳນັກງານຕັ້ງຢູ່ອາເມລິກາ ໄດ້ລົງພິມບົດຂຽນຂອງທ່ານສາດສະດາຈານຄົ້ນຄວ້າລະບົບຊີວະພາບ ແລະ ຊີວະວິທະຍາທະເລ ຢູ່ມະຫາວິທະຍາໄລ Miami, ອາເມລິກາ John McManus ດ້ວຍຫົວຂໍ້ວ່າ “ຈີນ ໄດ້ກໍ່ສ້າງເກາະທຽມຄືແນວໃດ”. ໃນບົດຂຽນນັກປະພັນໄດ້ໄຈ້ແຍກວິທີເຊິ່ງຈີນ ໄດ້ຖົມດິນ, ກໍ່ສ້າງບັນດາເກາະທຽມຢ່າງຜິດກົດໝາຍຢູ່ໝູ່ເກາະ ເຈື່ອງຊາ ຂອງຫວຽດນາມ ທີ່ໄດ້ທຳລາຍລະບົບຊີວະພາບຢ່າງຮ້າຍແຮງ, ພິເສດແມ່ນລະບົບປະກາລັງທີ່ສວຍງາມຢູ່ທະເລຕາເວັນອອກ. ຕາມບົດຂຽນແລ້ວ, ບັນດານັກຄົ້ນຄວ້າໄດ້ຊີ້ໃຫ້ເຫັນວ່າ, ບັນດາການເຄື່ອນໄຫວບູລະນະຂຸດຖົມດິນແມ່ນບັນດາການເຄື່ອນໄຫວກໍ່ຄວາມອັນຕະລາຍຫຼາຍທີ່ສຸດສຳລັບລະບົບປະກາລັງ. ກ່ອນໜ້ານັ້ນ, ບັນດາການເຄື່ອນໄຫວຖົມດິນເປັນເກາະພຽງແຕ່ເປັນການທຳລາຍລະບົບປະກາລັງຢູ່ບັນດາເຂດຂຸດຖົມດິນເທົ່ານັ້ນ, ຫາກຍັງສົ່ງຜົນສະທ້ອນເຖິງລະບົບປະກາລັງທີ່ຢູ່ອ້ອມແອ້ມຢ່າງຫຼວງຫຼາຍອີກດ້ວຍ. ນອກນັ້ນ, ການຟື້ນຟູຂອງລະບົບປະກາລັງທີ່ຖືກຜົນກະທົບໂດຍກົງ ຫຼື ທາງອ້ອມຈາກການເຄື່ອນໄຫວຂຸດຖົມດິນນັ້ນແມ່ນຊັກຊ້າທີ່ສຸດ, ຊ້ຳບໍ່ໜຳບໍ່ສາມາດຟື້ນຟູໄດ້. ສະນັ້ນ, ການປົກປ້ອງບັນດາລະບົບປະກາລັງ ແມ່ນຄວາມຕ້ອງການອັນຮີບດ່ວນ, ແມ່ນໜ້າທີ່ຮັບຜິດຊອບຂອງທຸກຄົນ ແລະ ຕ້ອງມີການຮ່ວມແຮງຮ່ວມໃຈຂອງໝົດທຸກຝ່າຍທີ່ມີຄວາມຂັດແຍ້ງກັນຢູ່ທະເລຕາເວັນອອກ.