ທ່ານປະທານປະເທດເຈືອງເຕີ້ນຊາງ ຕ້ອນຮັບ ຮອງນາຍົກລັດຖະມົນຕີ ກຳປູເຈຍ
ທ່ານປະທານປະເທດຫວຽດນາມ ເຈືອງເຕີ້ນຊາງ ໃຫ້ການຕ້ອນຮັບ ທ່ານ ຮອງນາຍົກລັດຖະມົນຕີ ກຳປູເຈຍ Sar Kheng
|
Vovworld- ຕອນບ່າຍວັນທີ 4/1, ຢູ່ຮ່າໂນ້ຍ, ທ່ານປະທານປະເທດຫວຽດນາມ ເຈືອງເຕີ້ນຊາງ ໄດ້ໃຫ້ການ ຕ້ອນຮັບ ທ່ານ Sar Kheng ຮອງນາຍົກລັດຖະມົນຕີ ທັງເປັນລັດຖະມົນຕີກະຊວງພາຍໃນກຳປູເຈຍພ້ອມດ້ວຍຄະນະ ເນື່ອງໃນໂອກາດມາຢ້ຽມຢາມ ແລະ ເຊັນສັນຍາຮ່ວມມືກັບກະຊວງຕຳຫຼວດຫວຽດນາມ. ທີ່ການຕ້ອນຮັບ, ທ່ານປະທານປະເທດຫວຽດນາມ ເຈືອງເຕີ້ນຊາງ ຖືວ່າ ໃນໄລຍະທີ່ຜ່ານມາ, ສະພາບການໂລກມີການຜັນແປໄປຢ່າງສັບສົນ, ແຕ່ ກຳປູເຈຍ ຍັງຄົງແມ່ນປະເທດສາມາດຮັກສາສະຖຽນລະພາບ ແລະ ພັດທະນາເສດຖະກິດສັງຄົມ. ທ່ານປະທານປະເທດຫວຽດນາມ ເຈືອງເຕີ້ນຊາງ ຢືນຢັນວ່າ ຫວຽດນາມສ້າງທຸກເງື່ອນໄຂສະດວກເພື່ອຊຸກຍູ້ການຮ່ວມມືລະຫວ່າງ 2 ຝ່າຍ ແລະ ເຊື່ອໝັ້ນວ່າ ບັນດາເນື້ອໃນໃນສັນຍາຮ່ວມມືທີ່ໄດ້ຮັບການລົງນາມລະຫວ່າງ ກະຊວງຕຳຫຼວດຫວຽດນາມ ແລະ ກະຊວງພາຍໃນກຳປູເຈຍ ຈະສ້າງປະຖົມປັດໄຈເພື່ອໃຫ້ 2 ຝ່າຍປະຕິບັດໜ້າທີ່ຊຶ່ງພັກ ແລະ ລັດມອບໝາຍໃຫ້ເປັນຢ່າງດີ. ທ່ານປະທານປະເທດຫວຽດນາມ ເຈືອງເຕີ້ນຊາງ ໄດ້ອວຍພອນໃຫ້ການເລືອກຕັ້ງທົ່ວປະເທດກຳປູເຈຍໃນເວລາໃກ້ຈະມາເຖິງນີ້ຈະປະສົບຜົນສຳເລັດຢ່າງຈົບງາມ ແລະ ກຳປູເຈຍ ສືບຕໍ່ມີບາດກ້າວຂະຫຍາຍຕົວໃນໄລຍະທີ່ຈະມາເຖິງ.
ສ່ວນທ່ານ Sar Kheng ຮອງນາຍົກລັດຖະມົນຕີ ທັງເປັນລັດຖະມົນຕີກະຊວງພາຍໃນກຳປູເຈຍ ສະແດງຄວາມຫວັງວ່າ ໃນປີ 2013, 2 ຝ່າຍສືບຕໍ່ຮ່ວມມືຢ່າງແໜ້ນແຟ້ນກ່ວາອີກ, ໂດຍສະເພາະແມ່ນການຊ່ວຍເຫຼືອກຳປູເຈຍ ກໍ່ສ້າງແຫຼ່ງຊັບພະຍາກອນມະນຸດ ເພືອ່ຕອບສະໜອງຄວາມຮຽກຮ້ອງຕ້ອງການຂອງວຽກງານປ້ອງກັນ ແລະ ຕ້ານອາດສະຍາກຳ, ຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ເພື່ອຮັບໃຊ້ການພັດທະນາຂອງປະເທດຊາດ