ນາຍົກລັດຖະມົນຕີ Nguyen Tan Dung ພົບປະກັບ ຜູ້ນຳສະພາ ແຫ່ງຊາດ ສປປ ເກົາຫລີ
ທ່ານປະທານຄະນະປະຈຳສະພາແຫ່ງຊາດ ສປປ ເກົາຫຼີ Kim Yong Nam
ແລະ ທ່ານນາຍົກລັດຖະມົນຕີ Nguyen Tan Dung
(vovworld) - ວັນທີ 7/8, ຢູ່ສຳນັກງານລັດຖະບານ ຢູ່ຮ່າໂນ້ຍ, ທ່ານນາຍົກລັດຖະມົນຕີຫວຽດນາມ Nguyen Tan Dung ໄດ້ມີການພົບປະກັບທ່ານປະທານຄະນະປະຈຳສະພາແຫ່ງຊາດ ສປປ ເກົາຫຼີ Kim Yong Nam ທີ່ພວມຢ້ຽມຢາມສັນຖະວະໄມຕີຫວຽດນາມ ຢ່າງເປັນທາງການ. ທ່ານນາຍົກລັດຖະມົນຕີ Nguyen Tan Dung ຕີລາຄາສູງ ການຢ້ຽມຢາມຫວຽດນາມ ຢ່າງເປັນທາງການຂອງທ່ານ ປະທານ Kim Yong Nam ໃນຄັ້ງນີ້ ແລະ ຢືນຢັນວ່າ: ລັດຖະບານຫວຽດນາມ ຈະຜັນຂະຫຍາຍປະຕິບັດບັນດາຂໍ້ຕົກລົງທີ່ບັນລຸໄດ້ທີ່ການພົບປະເຈລະຈາ, ລະຫວ່າງທ່ານ ປະທານ Kim Yong Nam ກັບບັນດາການນຳຫວຽດນາມ ໃນການຢ້ຽມຢາມຄັ້ງນີ້ຢ່າງມີປະສິດທິຜົນ. ທ່ານນາຍົກລັດຖະມົນຕີ Nguyen Tan Dung ເນັ້ນໜັກວ່າ: ຍາມໃດຫວຽດນາມ ກໍຖືການພົວພັນຮ່ວມມືກັບ ສປປ ເກົາຫຼີ ເປັນສຳຄັນ, ປາດຖະໜາຢາກພ້ອມກັບ ສປປ ເກົາຫຼີ ເພີ່ມທະວີ ແລະ ຊຸກຍູ້ການພົວພັນຮ່ວມມືລະຫວ່າງ 2 ປະເທດໃຫ້ດີກ່ວາອີກ, ພິເສດແມ່ນການຮ່ວມມືທາງດ້ານເສດຖະກິດ, ການຄ້າ, ການລົງທຶນ, ວັດທະນະທຳ... ກ່ຽວກັບບັນຫາໃນແຫຼມເກົາຫຼີ, ທ່ານນາຍົກລັດຖະມົນຕີ Nguyen Tan Dung ຢືນຢັນວ່າ: ຫວຽດນາມ ມີທັດສະນະສະເໝີຕົ້ນສະເໝີປາຍສະໜັບສະໜູນການສ້າງແຫຼມ ເກົາຫຼີ ແຫ່ງສັນຕິພາບ, ສະຖຽນລະພາບ ແລະ ພັດທະນາ, ສະໜັບສະໜູນການສົນທະນາ, ໄກ່ເກ່ຍ, ສັນຕິພາບເອກະພາບລະຫວ່າງ 2 ພາກເກົາຫຼີ.
ສ່ວນທ່ານປະທານ Kim Yong Nam ຢືນຢັນວ່າ: ຍາມໃດ ສປປ ເກົາຫຼີ ກໍຖືເປັນສຳຄັນ ແລະ ປາດຖະໜາຢາກປັບປຸງ ແລະ ເພີ່ມທະວີການພົວພັນມິດຕະພາບ ແລະ ການຮ່ວມມືຫຼາຍດ້ານກັບຫວຽດນາມ ຢ່າງບໍ່ຢຸດຢັ້ງ. ພ້ອມທັງປາດຖະໜາຢາກໃຫ້ ຫວຽດນາມ ແບ່ງປັນບັນດາບົດຮຽນທີ່ດີ, ຮູບແບບທີ່ດີໃນການສ້າງສາ ແລະ ພັດທະນາເສດຖະກິດ - ສັງຄົມຂອງປະເທດຊາດ. ທ່ານປະທານ Kim Yong Nam ຂໍຂອບອົກຂອບໃຈຫວຽດນາມ ທີ່ໄດ້ມອບເຂົ້າສານ 5.000 ໂຕນເພື່ອແນໃສ່ແບ່ງປັນ ແລະ ຊ່ວຍເຫຼືອປະຊາຊົນ ສປປ ເກົາຫຼີ ແລະ ເນັ້ນໜັກວ່າ: ການໜູນຊ່ວຍນີ້ຂອງຫວຽດນາມ ແມ່ນແຫຼ່ງລະດົມກຳລັງໃຈທີ່ໃຫຍ່ຫຼວງຊ່ວຍປະຊາຊົນ ສປປ ເກົາຫຼີ ແກ້ໄຂຄວາມຫຍຸ້ງຍາກພາຍຫຼັງໄພພິບັດທຳມະຊາດ. ກ່ຽວກັບບັນຫາທະເລຕາເວັນອອກ, ທ່ານປະທານ Kim Yong Nam ຢືນຢັນຫຼັກໝັ້ນຂອງ ສປປ ເກົາຫຼີ ແມ່ນສະໜັບສະໜູນເລື່ອງແກ້ໄຂບັນດາການພິພາດກັນຢູ່ທະເລຕາເວັນອອກດ້ວຍສັນຕິວິທີບົນພື້ນຖານກົດໝາຍສາກົນ, ພິເສດແມ່ນສົນທິສັນຍາກົດໝາຍວ່າດ້ວຍທະເລຂອງ ສະຫະປະຊາຊາດ.