ນຳການພົວພັນຮ່ວມມືລະຫວ່າງຫວຽດນາມ-ສິງກະໂປນັບມື້ນັບແທດຈິງ,ມີປະສິດທິຜົນ
ທ່ານນາຍົກລັດຖະມົນຕີ ຫງວຽນເຕີນຢຸງ ພົບປະກັບ
ທ່ານນາງປະທານສະພາແຫ່ງຊາດ ສິງກາໂປ Halimah Yacob
(ພາບ: TTXVN)
(vovworld) – ຕອນບ່າຍວັນທີ 2/4, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ພົບປະກັບທ່ານນາງປະທານສະພາແຫ່ງຊາດ ສິງກະໂປ Halimah Yacob ພວມຢ້ຽມຢາມ ຫວຽດນາມ ຢ່າງເປັນທາງການ. ທ່ານນາຍົກລັດຖະມົນຕີ ຫງວຽນເຕີນຢຸງ ຢັ້ງຢືນນະໂຍບາຍສະເໜີຕົ້ນສະເໜີປາຍຂອງ ຫວຽດນາມ ແມ່ນຖືເປັນສຳຄັນ ແລະ ຈະມານະພະຍາຍາມຈົນສຸດຄວາມສາມາດຂອງຕົນ ພ້ອມກັບ ສິງກະໂປ ສືບຕໍ່ນຳການພົວພັນຮ່ວມມືລະຫວ່າງ 2 ປະເທດໃນທຸກຂົງເຂດ ໃຫ້ນັບມື້ນັບກ້າວເຂົ້າສູ່ລວງເລິກ, ແທດຈິງ, ມີປະສິດທິຜົນ, ນຳມາເຊິ່ງຜົນປະໂຫຍດໃຫ້ປະຊາຊົນ 2 ປະເທດ ແລະ ປະກອບສ່ວນເຂົ້າໃນການກໍ່ສ້າງປະຊາຄົມອາຊຽນ. ບົນພື້ນຖານຄວາມສາມາດບົ່ມຊ້ອນໃນການຮ່ວມມືລະຫວ່າງ 2 ປະເທດຍັງໃຫຍ່ຫຼວງຢູ່, ທ່ານນາຍົກລັດຖະມົນຕີປາດຖະໜາວ່າ 2 ຝ່າຍສະຫງວນບຸລິມະສິດໃຫ້ ການເຄື່ອນໄຫວຮ່ວມມືດ້ານເສດຖະກິດ, ການຄ້າ, ລົງທຶນ; ສະເໜີໃຫ້ຝ່າຍ ສິງກະໂປ ເອົາໃຈໃສ່ເພື່ອໃຫ້ 2 ຝ່າຍລົງມືກໍ່ສ້າງເຂດອຸດສາຫະກຳ ຫວຽດນາມ - ສິງກາໂປ (VSIP) ເລກທີ 6 ຢູ່ ເງະອານ ແລະ ເລກທີ 7 ຢູ່ຫາຍເຢືອງໂດຍໄວ. ທ່ານນາຍົກລັດຖະມົນຕີກໍ່ປາດຖະໜາຢາກໃຫ້ທັງ 2 ປະເທດຊຸກຍູ້ການເຄື່ອນໄຫວຮ່ວມມືກ່ຽວກັບດ້ານແຮງງານ, ການສຶກສາ, ບຳລຸງສ້າງແຫຼ່ງຊັບພະຍາກອນມະນຸດ, ວັດທະນະທຳ, ພົບປະແລກປ່ຽນປະຊາຊົນ, ປ້ອງກັນຊາດ, ປ້ອງກັນຄວາມສະຫງົບກວ່າອີກ. ທ່ານນາງປະທານສະພາແຫ່ງຊາດ Halimah Yacob ຢືນຢັນວ່າ: ສະພາແຫ່ງຊາດ ສິງກະໂປ ສະໜັບສະໜູນບັນດາຄວາມມານະພະຍາຍາມເພີ່ມທະວີການພົວພັນຮ່ວມມື 2 ຝ່າຍ, ພິເສດແມ່ນການຮ່ວມມືດ້ານເສດຖະກິດ, ການຄ້າ, ການລົງທຶນ, ເຊິ່ງ VSIP ເປັນແບບຢ່າງທີີ່ບັນລຸຜົນສຳເລັດ ໃນການຮ່ວມມືລະຫວ່າງ 2 ປະເທດ. ທ່ານນາງປະທານສະພາແຫ່ງຊາດກໍ່ເນັ້ນໜັກວ່າ, ການສຶກສາ-ບຳລຸງສ້າງແມ່ນຂົງເຂດສຳຄັນທີ່ສຸດ ແລະ ສິງກະໂປ ປາດຖະໜາຢາກຮ່ວມມືກັບ ຫວຽດນາມ; ພ້ອມກັນນັ້ນ, ທັງ 2 ຝ່າຍຕ້ອງແລກປ່ຽນຄະນະຜູ້ແທນ, ພົບປະແລກປ່ຽນປະຊາຊົນເປັນປະຈຳ ເພື່ອເພີ່ມທະວີຄວາມເຂົ້າອົກເຂົ້າໃຈລະຫວ່າງ 2 ຊາດ ແລະ ປະຊາຊົນ 2 ປະເທດ. ທ່ານນາງສະພາແຫ່ງຊາດ ສິງກະໂປ ກໍ່ປາດຖະໜາຢາກຮ່ວມມືກັບ ຫວຽດນາມ ໃນວຽກງານສ້າງປະຊາຄົມອາຊຽນ ແລະ ອວຍພອນ ຫວຽດນາມ ທີ່ໄດ້ຈັດຕັ້ງກອງປະຊຸມໃຫຍ່ສະຫະພັນລັດຖະສະພາສາກົນ IPU-132 ສຳເລັດຜົນ.