( vovworld.vn ) ວັນທີ 5 ກຸມພາ, ປະຊາຊົນ ຊີຣີ ນັບພັນໆຄົນໄດ້ເຕົ້າໂຮມກັນຢູ່ສະໜາມຫຼວງ Xaba’a Bahrat ຢູ່ໃຈກາງນະຄອນຫຼວງ Damascus ຂອງ ຊີຣີ ເພື່ອສະແດງການສະໜັບສະໜູນຕໍ່ປະທານາທິບໍດີຂອງປະເທດນີ້ທ່ານ Bashar al Assad, ພາຍຫຼັງມື້ໜື່ງເມື່ອສະພາຄວາມໝັ້ນຄົງສະຫະປະຊາຊາດບໍ່ອານຸມັດຜ່ານຮ່າງມະຕິກ່ຽວກັບ ຊີຣີ. ບັນດາຜູ້ແຫ່ຂະບວນປະທ້ວງໄດ້ຈັບທຸງຊາດຂອງ ຊີຣີ ແລະ ໂຮ່ຮ້ອງຄຳຂວັນທີ່ວ່າ ພ້ອມແລ້ວຈະເສຍຊີວິດເພື່ອທ່ານ Assad, ບໍ່ຢາກພາຍນອກແຊກແຊງເຂົ້າວຽກງານພາຍໃນຂອງ ຊີຣີ ແລະ ຢືນຢັນວ່າ ປະຊາຊົນ ຊີຣີ ສາມາດແກ້ໄຂບັນຫາບັນກາດ້ອຍຕົນເອງໄດ້.
ແລະກໍໃນວັນດຽວກັນ, ສັນນິບາດ AL ໃຫ້ຮູ້ວ່າ ຈະສືບຕໍ່ບັນດາຄວາມມານະພະຍາຍາມເພື່ອຢຸດຕິການໃຊ້ຄວາມຮຸນແຮງດ້ານການທະຫານຢູ່ ຊີຣີ ເພື່ອສະກັດກັ້ນການແຊກແຊງການທະຫານຈາກພາຍນອກ. ກ່າວຄຳເຫັນພາຍຫຼັງ ລັດເຊຍ ແລະ ຈີນ ຢັບຢັ້ງຮ່າງມະຕິກ່ຽວກັບ ຊີຣີ ຢູ່ສະພາຄວາມໝັ້ນຄົງສະຫະປະຊາຊາດ, ທ່ານເລຂາທິການໃຫຍ່ AL Nabil al Arabi ໃຫ້ຮູ້ວ່າ ເຖິງວ່າຮ່າງມະຕິບໍ່ໄດ້ຮັບການອະນຸມັດຜ່ານ, ແຕ່ເປັນທີ່ຈະແຈ້ງແລ້ວວ່າໄດ້ມີການສະໜັບສະໜູນຈາກສາກົນທີ່ສະຫງວນໃຫ້ແກ່ບັນດາຂໍ້ຕົກລົງຂອງ AL, ເພາະສະນັ້ນ AL ຈະສືບຕໍ່ມານະພະຍາຍາມສົມທົບກັບອຳນາດການປົກຄອງ ແລະ ຝ່າຍຄ້ານຢູ່ ຊີຣີ, ຜຸກຮັດບັນດາຝ່າຍທີ່ກ່ຽວຂ້ອງເພື່ອບັນລຸຈຸດໝາຍສຸດທ້າຍແມ່ນຢຸດຕິການໃຊ້ຄວາມຮຸນແຮງ, ປົກປ້ອງພົນລະເມືອງ ຊີຣີ. ຄາດວ່າ, AL ຈະຈັດກອງປະຊຸມໃນວັນທີ 11 ກຸມພາທີ່ຈະມາເຖິງຢູ່ ກາຍໂຣ ( ອີຍີບ ) ເພື່ອຕີລາຄາພາລະກຳຂອງນັກສັງເກດການຂອງ AL ຢູ່ ຊີຣີ ຄືນໃໝ່.