ພິທີຕ້ອນຮັບທ່ານປະທານປະເທດເຈືອງເຕີນຊາງຖືກຈັດຂຶ້ນຢ່າງສົມກຽດຢູ່ວັງ Istanal Nurul Iman
(ພາບ: VGP/Nguyễn Kim)
(vovworld) - ຕອນບ່າຍວັນທີ 27/11, ທ່ານປະທານປະເທດເຈືອງເຕີນຊາງແລະຄະນະຜູ້ແທນຫວຽດນາມໄດ້ເດີນທາງໄປຮອດນະຄອນຫຼວງ Bandar Seri Begawan, ເລີ່ມຕົ້ນການຢ້ຽມຢາມທາງລັດຖະກິດ ບຮູໄນ, ຕາມຄຳເຊີນຂອງພະເຈົ້າມະຫາຊີວິດ ບຮູໄນ Hassanal Bolkiah. ທີ່ການເຈລະຈາພາຍຫຼັງພິທີຕ້ອນຮັບ, ການນຳສອງທ່ານໄດ້ຢັ້ງຢືນຈະສືບຕໍ່ຮັກສາການຢ້ຽມຢາມ ແລະ ພົບປະຂັ້ນສູງ, ພ້ອມທັງຍູ້ແຮງການພົບປະແລກປ່ຽນປະຊາຊົນ ເພື່ອແນໃສ່ຮັດແໜ້ນຄວາມເຂົ້າອົກເຂົ້າໃຈ ແລະ ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ, ຕົກລົງນຳກັນຈະຈັດຕັ້ງກອງປະຊຸມຄັ້ງທີ 1 ຄະນະກຳມະການຮ່ວມມືສອງຝ່າຍ ເພື່ອແນໃສ່ວາງອອກບັນດາມາດຕະການເພີ່ມທະວີການຮ່ວມມືໃນບັນດາຂົງເຂດລະອຽດ, ພິເສດແມ່ນໃນຂົງເຂດເສດຖະກິດ, ການຄ້າ ແລະ ການລົງທຶນ. ບົນຈິດໃຈນັ້ນ, ການນຳສອງປະເທດຊົມເຊີຍເລື່ອງລົງນາມໃນ ”ບົດບັນທຶກກ່ຽວກັບການຮ່ວມມືລະຫວ່າງທະນາຄານແຫ່ງລັດຫວຽດນາມ ແລະ ອົງການຄຸ້ມຄອງເງິນຕາ ບຮູໄນ” ແລະ ”ຂໍ້ຕົກລົງຮ່ວມມືກ່ຽວກັບນ້ຳມັນອາຍແກດລະຫວ່າງກຸ່ມບໍລິສັດນ້ຳມັນອາຍແກດຫວຽດນາມ ແລະ ບໍລິສັດນ້ຳມັນອາຍແກດແຫ່ງຊາດ ບຮູໄນ”.
ກ່ຽວກັບບັນດາບັນຫາພາກພື້ນ ແລະ ສາກົນ, ການນຳທັງສອງໄດ້ເຫັນດີເປັນເອກະພາບຈະສືບຕໍ່ສົມທົບກັນ ແລະ ສະໜັບສະໜູນເຊິ່ງກັນ ແລະ ກັນໃນບັນດາເວທີປາໄສພາກພື້ນ ແລະ ສາກົນພິເສດແມ່ນໃນອາຊຽນ ແລະ ສະຫະປະຊາຊາດ.
ການນຳທັງສອງປະເທດກໍ່ເຫັນດີເປັນເອກະພາບກ່ຽວກັບຫຼັກໝັ້ນທີ່ມີລັກສະນະຫຼັກການ ນັ້ນແມ່ນຮັບປະກັນສັນຕິພາບ, ສະຖຽນລະພາບຢູ່ພາກພື້ນ, ຄວາມສະຫງົບປອດໄພ ແລະ ຄວາມເສລີໃນການເດີນທະເລຢູ່ທະເລຕາເວັນອອກ, ແກ້ໄຂບັນດາຄວາມພິພາດດ້ວຍສັນຕິວິທີ ບົນພື້ນຖານເຄົາລົບກົດໝາຍສາກົນ.