(ທ່ານປະທານສະພາແຫ່ງຊາດ ຫວຽດນາມ ຫງວຽນຊິງຮຸ່ງ
ແລະ ທ່ານເລຂາທິການໃຫຍ່, ປະທານປະເທດ ສີືຈິ້ນຜິງ)
(vovworld) – ໃນຂອບເຂດການຢ້ຽມຢາມມິດຕະພາບ ຈີນ ຢ່າງເປັນທາງການ, ຕອນບ່າຍວັນທີ 23/12, ຢູ່ຫໍສະພາປະຊາຊົນ ນະຄອນຫລວງ ປັກກິ່ງ, ທ່ານປະທານສະພາແຫ່ງຊາດ ຫວຽດນາມ ຫງວຽນຊິງຮຸ່ງ ແລະ ຄະນະຜູ້ແທນຂັ້ນສູງສະພາແຫ່ງຊາດ ຫວຽດນາມ ໄດ້ພົບປະກັບທ່ານ ສີຈິ້ນຜິງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຈີນ, ປະທານປະເທດ ສາທາລະນະລັດປະຊາຊົນ ຈີນ. ທີ່ການຕ້ອນຮັບ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ເນັ້ນໜັກວ່າ: ການຢ້ຽມຢາມມິດຕະພາບ ຈີນ ຄັ້ງນີ້ຂອງຄະນະຜູ້ແທນຂັ້ນສູງ ຫວຽດນາມ ເພື່ອແນໃສ່ຜັນຂະຫຍາຍການຫັນບັນດາຂໍ້ຕົກລົງຂັ້ນສູງຂອງ 2 ປະເທດໃນໄລຍະຜ່ານມາເປັນລະອຽດ. ທ່ານປະທານສະພາແຫ່ງຊາດ ຫງວຽນຊິງຮຸ່ງ ຢືນຢັນວ່າ: ພັກ, ລັດ ແລະ ປະຊາຊົນ ຫວຽດນາມ ຖືເປັນສຳຄັນທີ່ສຸດການພັດທະນາສາຍພົວພັນຖານບ້ານໃກ້ເຮືອນຄຽງມິດຕະພາບ, ຄູ່ຮ່ວມມືຍຸດທະສາດຮອບດ້ານກັບພັກ, ລັດ ແລະ ປະຊາຊົນ ຈີນ ບົນພື້ນຖານຢືດໝັ້ນແນວທາງພົວພັນຕ່າງປະເທດສັນຕິພາບ, ເອກະລາດ, ເປັນເຈົ້າຕົນເອງ.
ກ່ຽວກັບບັນດາບັນຫາບົນທະເລ, ທ່ານປະທານສະພາແຫ່ງຊາດ ຫວຽນຊິງຮຸ່ງ ຢືນຢັນວ່າ: ທັດສະນະຂອງພັກ, ລັດ ຫວຽດນາມ ແມ່ນເຫັນດີເປັນເອກະສັນພ້ອມກັບພັກ, ລັດ ຈີນ ເພີ່ມທະວີການເຂົ້າອົກເຂົ້າໃຈເຊິ່ງກັນ ແລະ ກັນ, ຢືດໝັ້ນການເຈລະຈາ, ປຶກສາຫາລືດ້ານການເມືອງ. ສຳລັບເລື່ອງແກ້ໄຂບັນຫາບົນທະເລ ຄວນມີວິໄສທັດຍຸດທະສາດອັນຍາວນານ, ເໝາະສົມກັບກົໝາຍສາກົນ, ເຄົາລົບຜົນປະໂຫຍດອັນຊອບທຳຂອງແຕ່ລະປະເທດ ແລະ ການພົວພັນ ຫວຽດນາມ - ຈີນ ຢ່າງຄົບຖ້ວນ. ແກ້ໄຂບັນຫາບົນທະເລໃຫ້ດີ ແມ່ນເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ ແລະ ສ້າງຄວາມສະດວກເພື່ອຍູ້ແຮງການຮ່ວມມືຍຸດທະສາດຮອບດ້ານລະຫວ່າງ 2 ປະເທດກ່ວາອີກ.
ທີ່ການຕ້ອນຮັບ, ທ່ານເລຂາທິການໃຫຍ່, ປະທານປະເທດ ສີືຈິ້ນຜິງ ຢືນຢັນວ່າ: ພັກ ແລະ ລັດ ຈີນ ຍາມໃດກໍຖືເປັນສຳຄັນ ແລະ ສະໜັບສະໜູນເລື່ອງເພີ່ມທະວີການພົບປະແລກປ່ຽນການຮ່ວມມືລະຫວ່າງສະພາແຫ່ງຊາດ ຈີນ ແລະ ສະພາແຫ່ງຊາດ ຫວຽດນາມ ກໍຄືການພົບປະແລກປ່ຽນມິດຕະພາບລະຫວ່າງປະຊາຊົນ 2 ປະເທດ, ທ່ານເລຂາທິການໃຫຍ່, ປະທານປະເທດ ສີຈິ້ນຜິງ ຖືວ່າ: ນີ້ແມ່ນປັດໃຈສຳຄັນຂອງການພົວພັນຄູ່ຮ່ວມມືຍຸດທະສາດຮອບດ້ານ ຈີນ - ຫວຽດນາມ.
ທ່ານປະທານສະພາແຫ່ງຊາດ ຫງວຽນຊິງຮຸ່ງ ແລະ ທ່ານເລຂາທິການໃຫຍ່, ປະທານປະເທດ ສີຈິ້ນຜິງ ເຫັນດີເປັນເອກະສັນສືບຕໍ່ເພີ່ມທະວີການພົບປະຂັ້ນສູງລະຫວ່າງ 2 ປະເທດ ເພື່ອແນໃສ່ຊີ້ນຳ, ຊຸກຍູ້ການພົວພັນ 2 ຝ່າຍໃຫ້ພັດທະນາຢ່າງໝັ້ນຄົງ.