(vovworld) - ວັນທີ 13/8, ຫົວໜ້າຄະນະຜູ້ສັງເກດການຂອງສະຫະປະຊາຊາດ, ທ່ານນາຍພົນ Babacar Gaye ໃຫ້ຮູ້ວ່າບັນດາເຫດໃຊ້ຄວາມຮຸນແຮງທີ່ເກີດຂຶ້ນຢູ່ທົ່ວປະເທດ ຊີຣີ ນັບມື້ນັບຮ້າຍແຮງ, ໃນນັ້ນສາມັນຊົນແມ່ນເປົ້າໝາຍຖືກຮັບຜົນສະທ້ອນຍ້ອນອາວຸດໜັກຂອງທັງຝ່າຍລັດຖະບານ ແລະ ຝ່າຍຄ້ານ. ອົງການຕິດຕາມກວດກາສິດທິມະນຸດຊີຣີ ທີ່ມີສຳນັກງານຕັ້ງຢູ່ ອັງກິດໃຫ້ຮູ້ວ່າ: ການປະທະກັນຢູ່ບັນດາເມືອງທາງທິດໃຕ້ຂອງນະຄອນຫຼວງ Damacus ໃນຮອບເວລາ 48 ຊົ່ວໂມງຜ່ານມາ ໄດ້ເຮັດໃຫ້ມີຜູ້ເສຍຊີວິດກ່ວາ 45 ຄົນ.
ມາຮອດປະຈຸບັນ, ມີຜູ້ສັງເກດການສະຫະປະຊາຊາດ 21 ຄົນໄດ້ເດີນທາງອອກຈາກ ຊີຣີ ໃນສະພາບການພາລະກຳຂອງເຂົາເຈົ້າຢູ່ປະເທດນີ້ໝົດກຳນົດເວລາໃນວັນທີ 20/8 ຈະມາເຖິງ. ເຖິງວ່າເຫດຜົນຂອງຄຳຕັດສິນນີ້ບໍ່ທັນໄດ້ຮັບການປະກາດຢ່າງເປັນທາງການເທື່ອ. ແລະກໍໃນວັນດຽວກັນ, ຫົວໜ້າອົງການມະນຸດສະທຳຂອງສະຫະປະຊາຊາດ ທ່ານນາງ Valerie Amos ໃຫ້ຮູ້ວ່າ: ທ່ານນາງຈະໄປຢ້ຽມຢາມ ຊີຣີ ແລະ Lebanon ແຕ່ວັນທີ 14 – 16/8, ໃນສະພາບການທີ່ “ສະພາບການມະນຸດສະທຳຢູ່ ຊີຣີນັບມື້ນັບຊົ່ວຮ້າຍລົງ”.