ເນື່ອງໃນໂອກາດສະເຫຼີມສະຫຼອງ 45 ປີ ແຫ່ງວັນສ້າງຕັ້ງການພົວພັນທາງການທູດ (24/6/1967-24/6/2012) ແລະ ”ປີແຫ່ງຄວາມມິດຕະພາບຫວຽດນາມ - ກຳປູເຈ 2012”. ການນຳຂັ້ນສູງສອງປະເທດໄດ້ສົ່ງສານຊົມເຊີຍນຳກັນ.
ເນື້ອໃນສານຊົມເຊີຍຂອງການນຳຂັ້ນສູງຫວຽດນາມ ໄດ້ສະແດງຄວາມພາກພູມໃຈຕໍ່ການພັດທະນາອັນດີງາມຂອງສາຍພົວພັນສາມັກຄີມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານລະຫວ່າງສອງປະເທດໃນ 45 ປີ ທີ່ຜ່ານມາ. ການນຳຫວຽດນາມກໍ່ສະແດງຄວາມເຊື່ອໝັ້ນວ່າ, ສາຍພົວພັນຖານບ້ານໃກ້ເຮືອນຄຽງອັນດີງາມ, ຄວາມມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານ, ໝັ້ນຄົງ, ຍາວນານລະຫວ່າງສອງປະເທດຈະໄດ້ຮັບການພັດທະນາຢ່າງບໍ່ຢຸດຢັ້ງ ເພື່ອຜົນປະໂຫຍດລວມຂອງປະຊາຊົນສອງປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາໃນພາກພື້ນ ແລະ ຢູ່ໃນໂລກ.
ສ່ວນເນື້ອໃນສານຊົມເຊີຍຂອງການນຳຂັ້ນສູງກຳປູເຈຍກໍ່ຢືນຢັນວ່າ ຍາມໃດກໍ່ຖືສາຍພົວພັນສາມັກຄີ, ມິດຕະພາບທີ່ເປັນມູນເຊື້ອລະຫວ່າງກຳປູເຈຍ - ຫວຽດນາມ ແມ່ນຊັບສົມບັດອັນລ້ຳຄ່າ ຂອງປະຊາຊົນສອງປະເທດ. ການນຳກຳປູເຈຍ ກໍ່ສະແດງຄວາມຮູ້ບູນຄຸນຢ່າງເລິກເຊິ່ງຕໍ່ການຊ່ວຍເຫຼືອຂອງລັດຖະບານ ແລະ ປະຊາຊົນຫວຽດນາມ ເພື່ອກູ້ເອົາປະຊາຊົນ ກຳປູເຈຍ ຫຼຸດພົ້ນອອກຈາກລະບອບດັບສູນເຊື້ອຊາດຂອງ ໂປນປົດ ເມື່ອປີ 1979, ພ້ອມທັງອວຍພອນບັນດາຜົນງານອັນໃຫຍ່ຫຼວງເຊິ່ງປະຊາຊົນຫວຽດນາມຍາດມາໄດ້ໃນໄລຍະຜ່ານມາ.