ຫວຽດນາມຖືເປັນສຳຄັນສາຍພົວພັນມິດຕະພາບແລະການຮ່ວມມືຮອບດ້ານກັບລາວ
ທ່ານຮອງນາຍົກລັດຖະມົນຕີ ຝ້າມບິງມິນ ຕ້ອນຮັບ
ລັດຖະມົນຕີຊ່ວຍວ່າການກະຊວງການຕ່າງປະເທດ ລາວ
(ພາບ: baomoi.com)
|
(vovworld) - ໃນວັນທີ 20/7 ຢູ່ຮ່າໂນ້ຍ, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຝ້າມບິງມິນ ໄດ້ຕ້ອນຮັບທ່ານ ອາລຸນແກ້ວ ກິດຕິຄຸນ ລັດຖະມົນຕີຊ່ວຍວ່າການກະຊວງການຕ່າງປະເທດ ລາວ ແລະ ຄະນະຜູ້ແທນກະຊວງການຕ່າງປະເທດ ລາວ ເນື່ອງໃນໂອກາດການຢ້ຽມຢາມ ຫວຽດນາມ ແລະ ເປັນປະທານຮ່ວມກອງປະຊຸມທາບທາມການເມືອງຄັ້ງທີ 1 ຂັ້ນ ລັດຖະມົນຕີຊ່ວຍວ່າການລະຫວ່າງກະຊວງການຕ່າງປະເທດຂອງສປປລາວ ແລະ ຫວຽດນາມ. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຝ້າມບິງມິນ ຢືນຢັນວ່າ ຫວຽດນາມຖືເປັນສຳຄັນທີ່ສຸດ ແລະ ຍາມໃດກໍໃຫ້ບຸລິມະສິດຢ່າງສູງສຸດໃຫ້ແກ່ການປັບປຸງສາຍພົວພັນມິດຕະພາບ, ນ້ຳໃຈສາມັກຄີແບບພິເສດ ແລະການຮ່ວມມືຮອບດ້ານ ລະຫວ່າງຫວຽດນາມແລະລາວ. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຝ້າມບິງມິນ ຕີລາຄາສູງໝາກຜົນ ຂອງກອງປະຊຸມທາບທາມການເມືອງຄັ້ງທີ 1 ຂັ້ນລັດຖະມົນຕີຊ່ວຍວ່າການລະຫວ່າງກະຊວງການຕ່າງປະເທດ ຫວຽດນາມ ແລະ ລາວ ແລະ ສະເໜີ້ໃຫ້ທັງສອງຝ່າຍຈົ່ງປະຕິບັດຂໍ້ຕົກລົງລະດັບສູງລະຫວ່າງການນໍາຂອງສອງປະເທດແລະຂໍ້ຕົກລົງກ່ຽວກັບການຮ່ວມມືລະຫວ່າງ 2 ກະຊວງການຕ່າງປະເທດຫວຽດນາມແລະລາວໃນໄລຍະປີ 2014-2020 ຊຶ່ງໄດ້ລົງນາມໃນເດືອນທັນວາ 2014.
ກ່ອນໜ້ານັ້ນ, ລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມ ເລຮ່ວາຍຈຸງ ແລະ ທ່ານ ອາລຸນແກ້ວ ກິດຕິຄຸນ ລັດຖະມົນຕີຊ່ວຍວ່າການກະຊວງການຕ່າງປະເທດ ລາວ ໄດ້ເປັນປະທານຮ່ວມກອງປະຊຸມທາບທາມການເມືອງຄັ້ງທີ 1 ລະຫວ່າງກະຊວງການຕ່າງປະເທດຂອງສປປລາວ ແລະ ຫວຽດນາມ.