ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຫວຽດນາມ ບຸຍແທັງເຊີນ ແລະ ທ່ານ Sergey Lavrov ລັດຖະມົນຕີການຕ່າງປະເທດ ສະຫະພັນລັດເຊຍ

ໂດຍຕອບຮັບຄຳເຊື້ອເຊີນຂອງທ່ານ Sergey Lavrov ລັດຖະມົນຕີການຕ່າງປະເທດ ສະຫະພັນລັດເຊຍ, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຫວຽດນາມ ບຸຍແທັງເຊີນ ຈະໄປຢ້ຽມຢາມສະຫະພັນ ລັດເຊຍ ໃນລະຫວ່າງວັນທີ 2 – 4 ເມສາ.

ໃນມື້ເຮັດວຽກທຳອິດໃນວັນທີ 2 ເມສາ, ທ່ານລັດຖະມົນຕີການຕ່າງປະເທດສອງປະເທດ ໄດ້ພົບປະເຈລະຈາ ຢູ່ນະຄອນຫຼວງ ມົດສະກູ. ສອງຝ່າຍໄດ້ເຫັນດີເປັນເອກະພາບເພີ່ມທະທະວີການແລກປ່ຽນຄະນະຜູ້ແທນທຸກຂັ້ນ, ເປັນຕົ້ນແມ່ນການຢ້ຽມຢາມຂອງການນຳຂັ້ນສູງໃນບັນດາຊ່ອງທາງພັກ, ລັດ, ສະພາແຫ່ງຊາດ ແລະ ພົບປະແລກປ່ຽນປະຊາຊົນ, ເປີດກວ້າງ ແລະ ເຮັດໃຫ້ການຮ່ວມມືໃນບັນດາຂົງເຂດເລິກເຊິ່ງກ່ວາອີກ.

ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຫວຽດນາມ ບຸຍແທັງເຊີນ ເນັ້ນໜັກວ່າ ຫວຽດນາມ ຖື ລັດເຊຍແມ່ນໜຶ່ງໃນບັນດາຄູ່ຮ່ວມມືບຸລິມະສິດສຳຄັນ, ມີລະດັບຍຸດທະສາດ ແລະ ມີຄວາມໄວ້ເນື້ອເຊື່ອໃຈແຖວໜ້າໃນນະໂຍບາຍການຕ່າງປະເທດຂອງ ຫວຽດນາມຢ່າງສະເໝີຄົ້ນສະເໝີປາຍ. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຫວຽດນາມ ບຸຍແທັງເຊີນ ສະເໜີລັດເຊຍສືບຕໍ່ສ້າງຄວາມສະດວກໃຫ້ແກ່ປະຊາຄົມຊາວຫວຽດນາມ ທີ່ພວມຮ່ຳຮຽນ, ອາໄສ ແລະ ເຮັດວຽກຍາວນານຢູ່ ລັດເຊຍ. ສ່ວນທ່ານລັດຖະມົນຕີ Sergey Lavrov ກໍ່ຢັ້ງຢືນວ່າ ຫວຽດນາມ ແມ່ນຄູ່ຮ່ວມມືບຸລິມະສິດໃນນະໂຍບາຍການຕ່າງປະເທດຂອງລັດເຊຍ ຢູ່ພາກພື້ນ ອາຊີ - ປາຊີຟິກ.