( vovworld ) - ວັນທີ 19/6, ຢູ່ຮ່າໂນ້ຍ, ກະຊວງປ້ອງກັນປະເທດ ໄດ້ຈັດກອງປະຊຸມກ່ຽວກັບວຽກງານພົວພັນດ້ານປ້ອງກັນຊາດກັບຕ່າງປະເທດໃນ 6 ເດືອນຕົ້ນປີ 2012. ພາຍໃຕ້ການຊີ້ນຳ, ນຳພາຂອງຄະນະພັກການທະຫານສູນກາງ, ການນຳກະຊວງປ້ອງກັນປະເທດ, ການເຄື່ອນໄຫວພົວພັນດ້ານປ້ອງກັນຊາດກັບຕ່າງປະເທດໃນ 6 ເດືອນຕົ້ນປີ 2012 ໄດ້ຮັບການຜັນຂະຫຍາຍຖືກຕາມແຜນການນັບທັງຂອບເຂດສອງຝ່າຍ ແລະ ຫຼາຍຝ່າຍ, ນຳມາເຊິ່ງປະສິດທິຜົນຢ່າງແທດຈິງ. ກອງທັບປະຊາຊົນຫວຽດນາມ ໄດ້ຕັ້ງໜ້າເປັນເຈົ້າການຊຸກຍູ້ການພົວພັນມິດຕະພາບ, ການຮ່ວມມືກັບບັນດາປະເທດ, ຍົກສູງທີ່ຕັ້ງ ແລະ ບົດບາດຂອງປະເທດຊາດ, ບົດບາດຂອງກອງທັບບົນເວທີສາກົນ ແລະ ພາກພື້ນ. ວຽກງານຖະແຫຼງຂ່າວ, ໂຄສະນາການປ້ອງກັນຊາດຕໍ່ຕ່າງປະເທດ ໄດ້ມີບາດກ້າວຫັນປ່ຽນຢ່າງຈະແຈ້ງ ດ້ວຍເນື້ອໃນໂຄສະນາຢ່າງທັນການ ແລະ ຊັດເຈນ ດ້ວຍຫຼາຍຮູບຫຼາຍແບບທີ່ອຸດົມສົມບຸນ.
ສະຫຼຸບກອງປະຊຸມ, ທ່ານພົນໂທ Nguyen Chi Vinh, ຮອງລັດຖະມົນຕີກະຊວງປ້ອງກັນປະເທດ ໄດ້ເນັ້ນໜັກວ່າ, ໃນ 6 ເດືອນທ້າຍປີ 2012, ການເຄື່ອນໄຫວຕົວພັນດ້ານປ້ອງກັນຊາດກັບຕ່າງປະເທດ ຄວນໄດ້ຮັບການຜັນຂະຫຍາຍໃນທຸກຂົງເຂດຢ່າງມີປະສິດທິຜົນ, ເພື່ອແນໃສ່ປະຕິບັດຈຸດໝາຍສູງສຸດແມ່ນເອກະລາດເປັນເຈົ້າຕົນເອງ, ປົກປັກຮັກສາອະທິປະໄຕ, ຜືນແຜ່ນດິນອັນຄົບຖ້ວນ, ລະບອບສັງຄົມນິຍົມ, ຮັກສາໄດ້ສະພາບແວດລ້ອມສັນຕິພາບ ແລະ ສະຖຽນລະພາບເພື່ອພັດທະນາ, ກໍຄືເພີ່ມທະວີຄວາມໄວ້ເນື້ອເຊື່ອໃຈ, ຍົກສູງພາບພົດ ແລະ ທີ່ຕັ້ງບົດບາດຂອງກອງທັບປະຊາຊົນ ແລະ ປະເທດຫວຽດນາມ ບົນເວທີສາກົນ.