(vovworld) – ວັນທີ 27/5, ໃນຂອບເຂດການຢ້ຽມຢາມ ແລະ ເຮັດວຽກຢູ່ ອີຢິບ, ຄະນະຜູ້ແທນກົມໃຫຍ່ທ່ອງທ່ຽວ ຫວຽດນາມ, ໂດຍທ່ານຫົວໜ້າກົມໃຫຍ່ ຫງວຽນວັນຕວນ ນຳໜ້າ, ໄດ້ມີການເຮັດວຽກກັບປະທານອົງການທ່ອງທ່ຽວ ອີຢິບ Naser Hamdy ຢູ່ນະຄອນຫຼວງ ກາຍໂຣ ເພື່ອແນໃສ່ຊຸກຍູ້ການຮ່ວມມືດ້ານການທ່ອງທ່ຽວລະຫວ່າງ 2 ປະເທດ. 2 ຝ່າຍເຫັນດີເປັນເອກະພາບນຳກັນກ່ຽວກັບຄວາມຈຳເປັນຕ້ອງເພີ່ມທະວີບັນດາການເຄື່ອນໄຫວ 2 ຝ່າຍຕາມຈິດໃຈຂອງບົດບັນທຶກຊ່ວຍຈຳຮ່ວມມືການທ່ອງທ່ຽວເຊິ່ງ 2 ປະເທດໄດ້ລົງນາມເມື່ອປີ 2006, ພ້ອມທັງແລກປ່ຽນບັນດາມາດຕະການລະອຽດເພື່ອແນໃສ່ແກ້ໄຂບັນດາຄວາມຫຍຸ້ງຍາກ, ຂໍ້ຕິດຂັດໃຫ້ແກ່ບັນດາວິສາຫະກິດທ່ອງທ່ຽວ 2 ປະເທດ. ການນຳກົມໃຫຍ່ທ່ອງທ່ຽວ ຫວຽດນາມ ສະເໜີໃຫ້ຂະແໜງທ່ອງທ່ຽວ ອີຢິບສົບທົບກັບບໍລິສັດການບິນແຫ່ງຊາດ ອີຢິບ (Egypt Air) ຜັນຂະຫຍາຍສາຍການບິນໂດຍກົງມາຍັງ ຮ່າໂນ້ຍ ແລະ ນະຄອນ ໂຮ່ຈີມິນ ໂດຍໄວ ພາຍຫຼັງບໍລິສັດນີ້ໄດ້ເປີດຫ້ອງການຕາງໜ້າຢູ່ ຫວຽດນາມ.