ຕາມນະໂຍບາຍພາສີໃໝ່, ແຕ່ວັນທີ 5 ເມສາ, ອາເມລິກາ ຈະຈັດວາງອັດຕາພາສີພື້ນຖານ 10% ສຳລັບທຸກສິນຄ້ານຳເຂົ້າຈາກບັນດາຄູ່ຮ່ວມມືດ້ານການຄ້າ. ນອກຈາກນັ້ນແລ້ວ, ນັບແຕ່ວັນທີ 9 ເມສາ, ອັດຕາພາສີນຳເຂົ້າ ຈະສູງກວ່າ, ແຕ່ 20% ຫາ 54% ຈະໄດ້ຈັດວາງສຳລັບກວ່າ 60 ປະເທດ, ໃນນັ້ນ ອັດຕາພາສີສິນຄ້າ ຫວຽດນາມ ແມ່ນ 46%.

ທ່ານປະທານາທິບໍດີ ອາເມລິກາ Donald Trump ປະກາດບັນຊີລາຍຊື່ບັນດາປະເທດຖືກຈັດວາງອັດຕາພາສີ ໃໝ່ (ພາບ: Reuters)

        ດ້ວຍອັດຕາພາສີດັ່ງກ່າວ, ມີຫຼາຍຂະແໜງອາຊີບຂອງ ຫວຽດນາມ ຄື ໄມ້ເຟີນີເຈີ, ຕ່ຳແຜ່ນຕັດຫຍິບ, ເຄື່ອງອາໄຫຼ່ເອເລັກໂຕນິກ ຫຼື ສິນໃນນ້ຳ ຈະຖືກຜົນກະທົບຢ່າງໃຫຍ່ຫຼວງ. ທ່ານ ເກີ່ນວັນລຶກ ນັກຊ່ຽວຊານດ້ານເສດຖະກິດ ໄດ້ໃຫ້ຂໍ້ສັງເກດແບບທາງບວກທີ່ວ່າ:

        “ພວກເຮົາອາດຈະຖືກຜົນກະທົບ ແລະ ແນ່ນອນວ່າຕ້ອງມີປະຕິກິລິຍາ. ເຖິງຢ່າງໃດກໍຕາມ, ກໍບໍ່ແມ່ນຫຼາຍເກີນໄປ. ພວກເຮົາຕ້ອງຈື່ໄວ້ວ່າ ປັດຈຸບັນ, ຄວາມຕ້ອງການຂອງປະຊາຊົນສຳລັບສິນຄ້າຢູ່ພາຍໃນປະເທດແມ່ນນັບມື້ນັບເພີ່ມຂຶ້ນ, ພິເສດແມ່ນເມື່ອເສດຖະກິດຂອງ ຫວຽດນາມ ມີການເຕີບໂຕທີ່ດີ, ລາຍຮັບຂອງປະຊາຊົນກໍຈະເພີ່ມຂຶ້ນ, ຕ້ອງມີຄວາມໝັ້ນໃຈເພື່ອເພີ່ມທະວີການບໍລິໂພກ.”

ທ່ານ ເກີ່ນວັນລຶກ ນັກຊ່ຽວຊານດ້ານເສດຖະກິດ (ພາບ: VOV)

         ໃນຂະນະນັ້ນ, ການນຳຫຼາຍປະເທດໄດ້ມີປະຕິກິລິຍາໃນເບື້ອງຕົ້ນ ຕໍ່ນະໂຍບາຍພາສີໃໝ່ນີ້. ທ່ານ Mark Carney ນາຍົກລັດຖະມົນຕີ ການາດາ ຖະແຫຼງວ່າ ຈະໂຕ້ຕອບບັນດາມາດຕະການພາສີຂອງ ອາເມລິກາ ເພື່ອແນໃສ່ປົກປ້ອງແຮງງານຂອງ ການາດາ.

ທ່ານນາຍົກລັດຖະມົນຕີ ອົດສະຕາລີ Anthony Albanese ຖືວ່າ:

        “ນະໂຍບາຍພາສີໂຕ້ຕອບຂອງອຳນາດການປົກຄອງ ອາເມລິກາ ແມ່ນບໍ່ມີພື້ນຖານ ແລະ ພວມໄປຝືນກັບພື້ນຖານການພົວພັນຄູ່ຮ່ວມມືລະຫວ່າງສອງປະເທດ. ນີ້ບໍ່ແມ່ນການກະທຳຂອງຜູ້ເປັນເພື່ອນ. ການກະທຳຂອງ ອາເມລິກາ ໃນມື້ນີ້ ຈະເຮັດໃຫ້ເພີ່ມຄວາມຂາດສະຖຽນລະພາບໃນພື້ນຖານເສດຖະກິດໂລກ ແລະ ເພີ່ມລາຍຈ່າຍຂອງບັນດາຄອບຄົວຢູ່ ອາເມລິກາ. ປະຊາຊົນ ອາເມລິກາ ຈະແມ່ນເປົ້າໝາຍທີ່ຕ້ອງຊົດໃຊ້ແພງກວ່າໝູ່ສຳລັບນະໂຍບາຍພາສີທີ່ຂາດຄວາມຍຸຕິທຳນີ້”.