(vovworld) – ຕອນເຊົ້າວັນທີ 17/5, ນັກຮຽນ, ນັກສຶກສາ ແລະ ປະຊາຊົນຊາວ ຫວຽດນາມ ພວມດຳລົງຊີວິດ, ຮຳ່ຮຽນ ແລະ ເຮັດວຽກຢູ່ແບນຊິກ ໄດ້ແຫ່ຂະບວນປະທ້ວງຕໍ່ໜ້າສະຖານທູດ ຈີນ ປະຈຳ ບຣຸກແຊນ ເພື່ອຄັດຄ້ານເລື່ອງ ບັງກິ່ງ ຕັ້ງຮ້ານເຈາະນ້ຳມັນໄຮຢາງ 981 ຜິດກົດໝາຍຢູ່ເຂດໄຫຼ່ທະວີບ, ເຂດເສດຖະກິດຈຳເພາະຂອງ ຫວຽດນາມ. ໃນຈຳນວນຜູ້ເຂົ້າຮ່ວມການແຫ່ຂະບວນປະທ້ວງ, ມີເດັກນ້ອຍ ແລະ ເພື່ອນມິດແບນຊິກທີ່ສະໜິດສະໜົມກັບ ຫວຽດນາມ ຫຼາຍຄົນ. ໂດຍຕາງໜ້າໃຫ້ປະຊາຄົມຊາວ ແບນຊິກ ເວົ້າພາສາຝຣັ່ງ, ທ່ານ Baudouimd de Crombrugghe ເນັ້ນໜັກວ່າ: ເລ່ື່ອງ ຈີນ ຕັ້ງຮ້ານເຈາະນ້ຳມັນ ຢູ່ເຂດໄຫຼ່ທະວີບ, ເຂດເສດຖະກິດຈຳເພາະຂອງ ຫວຽດນາມ ແລະ ເລື່ອງກຳປັ່ນຂອງ ຈີນ ບຸກໂຈມຕີ ກຳປັ່ນຕຳຫຼວດທະເລ ຫວຽດນາມ ແມ່ນການກະທຳລະເມີດອະທິປະໄຕ ແລະ ສິດອຳນາດສານຂອງ ຫວຽດນາມ ຢ່າງຮຸນແຮງ, ລະເມີດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ແລະ ບັນດາຂໍ້ຕົກລົງທີ່ກ່ຽວຂ້ອງອື່ນໆລະຫວ່າງການນຳຂັ້ນສູງ 2 ປະເທດ. ການກະທຳນີ້ເຮັດໃຫ້ສະພາບການຢູ່ທະເລຕາເວັນອອກສັບສົນຂຶ້ນຕື່ມ, ກໍ່ຄວາມຫຍຸ້ງຍາກໃຫ້ແກ່ການເຈລະຈາ ແກ້ໄຂການຂັດແຍ້ງກ່ຽວກັບອະທິປະໄຕບົນທະເລດ້ວຍສັນຕິວິທີ, ນາບຂູ່ຄວາມສະຫງົບ, ຄວາມປອດໄພໃນການເດີນທະເລ, ກໍ່ຄວາມຂາດສະຖຽນລະພາບຢູ່ພາກພື້ນ ແລະ ຢູ່ໃນໂລກ.
ໃນຂະນະນັ້ນ, ທ່ານ ຮິ່ງກົງໝີ, ປະທານສະມາຄົມໃຫຍ່ຊາວ ຫວຽດນາມ ປະຈຳ ແບນຊິກ, ໃຫ້ຮູ້ວ່າ: ສະມາຄົມໃຫຍ່ຊາວ ຫວຽດນາມ ຢູ່ ແບນຊິກ ຈະສືບຕໍ່ຈັດຕັ້ງງານໂຮມຊຸມນູມມິດຕິງຕໍ່ໜ້າສຳນັກງານສະພາເອີລົບ, ພ້ອມກັບສະມາຄົມມິດຕະພາບ ຫວຽດນາມ ຢູ່ບັນດາປະເທດຈັດຕັ້ງການເດີນຂະບວນຂະໜາດໃຫຍ່ເພື່ອແນໃສ່ຮຽກຮ້ອງໃຫ້ປະຊາຄົມໂລກອອກສຽງ ສະໜັບສະໜູນ ຫວຽດນາມ.
ຢູ່ປະເທດສະວິດ, ທ່ານນາງ Anjuska Weil, ອະດີດກຳມະການຄະນະປະທານພັກແຮງງານ ສະວິດ, ຢັ້ງຢືນຄຳຖະແຫຼງຂອງ ຈີນ ກ່ຽວກັບອະທິປະໄຕຢູ່ທະເລຕາເວັນອອກແມ່ນຜິດກົດໝາຍສາກົນ. ປະຊາຄົມໂລກຄວນອອກສຽງຮຽກຮ້ອງໃຫ້ ຈີນ ຢຸດຕິການກະທຳຜິດກົດໝາຍຂອງເຂົາເຈົ້າ ສຳລັບບັນດາປະເທດບ້ານໃກ້ເຮືອນຄຽງໃນທັນທີ, ພ້ອມກັນຮ່ວມມືເພື່ອສັນຕິພາບ ແລະ ສະຖຽນລະພາບຢູ່ທະເລຕາເວັນອອກ.
ຢູ່ ອີຕາລີ, ບັນດາສະມາຊິກສະພາແຫ່ງຊາດຂອງ ປະເທດນີ້ໄດ້ອອກຖະແຫຼງການຢັ້ງຢືນວ່າ: ເພື່ອແກ້ໄຂບັນດາຄວາມເຄັ່ງຕຶງຢູ່ທະເລຕາເວັນອອກ, ຄວນຊຸກຍູ້ບັນດາຝ່າຍຕ້ອງຊອກຫາ “ມາດຕະການສັນຕິພາບ ແລະ ຮ່ວມມື, ສອດຄ່ອງກັບກົດໝາຍສາກົນ, ພິເສດແມ່ນສົນທິສັນຍາ ສປຊ ກ່ຽວກົດໝາຍວ່າດ້ວຍທະເລ”.
ໃນຂະນະນັ້ນ, ຢູ່ Sydney, ໜັງສືພິມ The Sydney Morning Herad (ຜູ້ໃຫ້ຂ່າວ Sydney ຕອນເຊົ້າ) ຂອງອົດສະຕາລີ, ໄດ້ລົງພິມບົດຂຽນຮັບຮູ້ບັນດາການກະທຳຂອງ ປັກກິ່ງ “ເຮັດໃຫ້ຄວາມເຄັ່ງຕຶງເພີ່ມຂຶ້ນຢ່າງເປັນອັນຕະລາຍຢູ່ທະເລຕາເວັນອອກ”