ອາເມລິກາ ແລະ ລັດເຊຍ ເຫັນດີສືບຕໍ່ ປັບປຸງການພົວພັນສອງຝ່າຍຄືນໃຫມ່
ທ່ານ Barack Obama ແລະ ທ່ານ Vladimia Putin
ພາບ: baomoi.com
|
(vovworld) - ເກືອບ 1 ອາທິດພາຍຫລັງທີ່ທ່ານນາຍົກລັດຖະມົນຕີລັດເຊຍ Vladimia Putin ຍາດໄດ້ໄຊຊະນະ, ວັນທີ 9/3, ທ່ານປະທານາທິບໍດີ ອາເມລິກາ Barac Obama ໄດ້ໂທລະສັບອວຍພອນທ່ານ Putin ທີ່ຍາດໄດ້ໄຊຊະນະນໃນການເລືອກຕັ້ງປະທານາທິບໍດີລັດເຊຍໃນວັນທີ 4/3 ຜ່ານມາ. ໃນຖະແຫລງການ, ທຳນຽບຂາວໃຫ້ຮູ້ວ່າ ປະທານາທິບໍດີ Obama ແລະ ປະທານາທິບໍດີຄົນໃຫມ່ຂອງລັດເຊຍ Putin ໄດ້ເຫັນດີຈະເສີມຂະຫຍາຍມາດຕະການປັບປຸງການພົວພັນສອງຝ່າຍຄືນໃຫມ່. ໂຄສົກຂອງປະທານາທິບໍດີ ອາເມລິກາ, ທ່ານ Josh Earnest ໃຫ້ຮູ້ວ່າ: ຜູ້ນຳສອງທ່ານໄດ້ຊີ້ໃຫ້ເຫັນບັນດາຜົນງານຊຶ່ງການພົວພັນລະຫວ່າງ ອາເມລິກາ ແລະ ລັດເຊຍບັນລຸໄດ້ໃນ 3 ປີຜ່ານມາພາຍໃຕ້ສະໄໝຂອງທ່ານປະທານາທິບໍດີລັດເຊຍ Dmitry Medvedev ໃນນັ້ນມີການຮ່ວມມືໃນບັນຫາອາບການິສະຖານ ແລະ ອີຣານ, ເລື່ອງສຳເລັດ ແລະ ໃຫ້ສັດຕະຍາບັນສົນທິສັນຍາຫລຸດຜ່ອນອາວຸດບຸກໂຈມຕີຍຸດທະສາດໃຫມ່ ແລະ ເລື່ອງລັດເຊຍເຂົ້າເປັນສະມາຊິກຂອງອົງການການຄ້າໂລກໃນໄລຍະມໍ່ໆມານີ້.