ເພີ່ມພູນຄູນສ້າງສາຍພົວພັນມິດຕະພາບທີ່ເປັນມູນເຊື້ອ,ການຮ່ວມມືຮອບດ້ານຫວຽດນາມ-ລາວ
ທ່ານເລຂາທິການໃຫຍ່ ຫງວຽນຟູ້ຈ້ອງ ຕ້ອນຮັບ
ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີລາວ
(ພາບ: TTXVN)
(vovworld)- ຕອນບ່າຍ ວັນທີ 19/10 ຢູ່ຮ່າໂນ້ຍ, ທ່ານເລຂາທິການໃຫຍ່ຄະນະບໍລິຫານງານສູນກາງພັກຄອມມູນິດຫວຽດນາມ ຫງວຽນຟູ້ຈ້ອງ, ທ່ານຮອງນາຍົກລັດຖະມົນຕີ ຫງວຽນຊວນຟຸກ, ໄດ້ໃຫ້ການຕ້ອນຮັບ ແລະ ເຮັດວຽກກັບຄະນະຜູ້ແທນຂັ້ນສູງລາວ ໂດຍທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີລາວ ເປັນຫົວໜ້າຄະນະ, ທີ່ພວມຢ້ຽມຢາມ ແລະ ເຮັດວຽກຢູ່ຫວຽດນາມ. ທ່ານເລຂາທິການໃຫຍ່ ຫງວຽນຟູ້ຈ້ອງ ແລະ ທ່ານຮອງນາຍົກລັດຖະມົນຕີ ຫງວຽນຊວນຟຸກ ຢັ້ງຢືນວ່າ: ຫວຽດນາມຈະພ້ອມກັບລາວປົກປັກຮັກສາ ແລະ ເພີ່ມພູນຄູນສ້າງ ສາຍພົວພັນສາມັກຄີພິເສດ ຫວຽດນາມ-ລາວ ໃຫ້ນັບມື້ນັບພັດທະນາ, ກ້າວເຂົ້າສູ່ລວງເລິກ, ແທດຈິງ ແລະ ມີປະສິດທິຜົນໃນທຸກຂົງເຂດ, ປະກອບສ່ວນເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ໃນໂລກ. ບັນດາການນຳຫວຽດນາມໄດ້ແລກປ່ຽນກັບຄະນະບາງບັນຫາກ່ຽວກັບສະພາບການຂອງຫວຽດນາມ, ວຽກງານການກະກຽມກອງປະຊຸມໃຫຍ່ຄັ້ງທີ 12 ຂອງພັກ ແລະ ສະເໜີສອງຝ່າຍ ສົມທົບກັນຢ່າງແໜ້ນແຟ້ນໃນການຜັນຂະຫຍາຍການປະຕິບັດຂໍ້ຕົກລົງ ລະຫວ່າງການນຳຂັ້ນສູງສອງພັກ, ສອງລັດ ໃຫ້ມີປະສິດທິຜົນ ແລະ ກະກຽມກອງປະຊຸມສະໄໝສາມັນ ຄັ້ງທີ 38 ຄະນະກຳມາທິການລັດຖະບານ ຫວຽດນາມ-ລາວ ທີ່ຈະມາເຖິງໃຫ້ເປັນຢ່າງດີ. ສ່ວນທ່ານຮອງນາຍົກລັດຖະມົນຕີລາວ ສົມສະຫວາດ ເລັ່ງສະຫວັດ ຢັ້ງຢືນວ່າ: ລາວຈະເຮັດຈົນສຸດຄວາມສາມາດຂອງຕົນພ້ອມກັບຫວຽດນາມ ປົກປັກຮັກສາ, ເພີ່ມພູນຄູນສ້າງສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງລາວ-ຫວຽດນາມ ໃຫ້ນັບມື້ນັບພັດທະນາ. ທ່ານຮອງນາຍົກລັດຖະມົນຕີລາວ ສົມສະຫວາດ ເລັ່ງສະຫວັດ ຢັ້ງຢືນ ລາວຈະສົມທົບກັນກັບຫວຽດນາມ ຢ່າງແໜ້ນແຟ້ນ ແນໃສ່ປະຕິບັດບັນດາຂໍ້ຕົກລົງຂັ້ນສູງ ລະຫວ່າງການນຳສອງພັກ, ສອງລັດໃຫ້ເປັນຢ່າງດີ ເພື່ອນຳມາເຊິ່ງຜົນປະໂຫຍດທີ່ແທດຈິງໃຫ້ປະຊາຊົນສອງປະເທດລາວ-ຫວຽດນາມ.