ທ່ານຮອງນາຍົກລັດຖະມົນຕີຫວຽດນາມ Nguyen Thien Nhan ກ່າວຄຳເຫັນໄຂກອງປະຊຸມ
(vovworld) - ເພື່ອສະເຫລີມສະຫລອງ 45 ປີແຫ່ງການສ້າງຕັ້ງ ອາຊຽນ ແລະ 21 ປີແຫ່ງການສ້າງຕັ້ງການພົວພັນເຈລະຈາຍຸດທະສາດ ອາຊຽນ - ຈີນ, ຕອນເຊົ້າວັນທີ 16/8 ຢູ່ ຮ່າໂນ້ຍ, ກອງປະຊຸມບັນດາອົງການມິດຕະພາບປະຊາຊົນ ອາຊຽນ - ຈີນ ຄັ້ງທີ 7 ຖືກຈັດຂຶ້ນຢ່າງສົມກຽດ ໂດຍມີການເຂົ້າຮ່ວມຂອງທ່ານ Nguyen Thien Nhan ຮອງນາຍົກລັດຖະມົນຕີ ຫວຽດນາມ ແລະ ທ່ານນາງ ກູຊາວຫລຽນ, ຫົວຫນ້າສະມາຄົມ ຈີນ - ອາຊຽນ ແລະ ຫົວຫນ້າຄະນະຜູ້ແທນປະຊາຊົນ 10 ປະເທດສະມາຊິກອາຊຽນ ພ້ອມດ້ວຍຜູ້ແທນກວ່າ 100 ຄົນທີ່ຕາງຫນ້າໃຫ້ແກ່ປະຊາຊົນບັນດາປະເທດອາຊຽນ.
ກ່າວຄຳປາໄສໄຂກອງປະຊຸມ, ທ່ານຮອງນາຍົກລັດຖະມົນຕີ ຫວຽດນາມ Nguyen Thien Nhan ໄດ້ເນັ້ນຫນັກວ່າ: 45 ປີ ຜ່ານມາ ອາຊຽນ ໄດ້ເຕີບໃຫຍ່ຢ່າງບໍ່ຢຸດຢັ້ງ. ປະຈຸບັນ ອາຊຽນ ພວມມຸ່ງໄປສູ່ການສ້າງປະຊາຄົມໃນປີ 2015, ຍິ່ງກວ່າເວລາໃດໝົດ ອາຊຽນ ພວມມານະພະຍາຍາມເສີມຂະຫຍາຍບັນດາຜົນງານທີ່ບັນລຸໄດ້, ຍູ້ແຮງການຮ່ວມສຳພັນກັບບັນດາຄູ່ຮ່ວມມື, ພິເສດແມ່ນຮ່ວມກັບຈີນ. ທ່ານຮອງນາຍົກລັດຖະມົນຕີ Nguyen Thien Nhan ເວົ້າວ່າ:
“ ອາດຢືນຢັນໄດ້ວ່າ: ການພົວພັນລະຫວ່າງ ອາຊຽນ ແລະ ຈີນ ແມ່ນຫນຶ່ງໃນບັນດາການພົວພັນທີ່ຂະຫຍັນຂັນເຄື່ອນ ແລະ ມີປະສິດທິຜົນທີ່ສຸດ ລະຫວ່າງອາຊຽນ ແລະ ບັນດາຄູ່ເຈລະຈາ. ເພີ່ມທະວີການພົວພັນທີ່ມີລັກສະນະສ້າງສັນ ແລະ ຮອບດ້ານ ອາຊຽນ - ຈີນ ບໍ່ພຽງແຕ່ມີຜົນປະໂຫຍດໃຫ້ແກ່ສັນຕິພາບ, ຄວາມວັດທະນາຖາວອນຢູ່ພາກພື້ນອາຊີຕາເວັນອອກສຽງໃຕ້ເທົ່ານັ້ນ ຫາກຍັງປະກອບສ່ວນໃຫ້ແກ່ສັນຕິພາບ, ສະຖຽນລະພາບ ແລະ ການພັດທະນາໃນພາກພື້ນ. ຫວຽດນາມ ຈະສືບຕໍ່ມານະພະຍາຍາມພ້ອມກັບບັນດາປະເທດ ອາຊຽນ ພ້ອມກັບຈີນ ຊຸກຍູ້ການພົວພັນຮ່ວມມືມິດຕະພາບສອງຝ່າຍໃຫ້ພັດທະນາຢ່າງແຂງແຮງໃນທຸກຂົງເຂດ.”
ຕາງຫນ້າໃຫ້ຄະນະຜູ້ແທນພັກປະຊາຊົນ ຈີນ, ທ່ານນາງ ກູຊາວຫລຽນ, ຫົວຫນ້າສະມາຄົມມິດຕະພາບ ຈີນ - ອາຊຽນ ໄດ້ຢືນຢັນວ່າ:
“ຈີນ ຖືການພັດທະນາການພົວພັນກັບບັນດາປະເທດບ້ານໃກ້ເຮືອນຄຽງແມ່ນ ທີ່ຕັ້ງບົດບາດສຳຄັນໃນການພົວພັນຕ່າງປະເທດ, ໃນນັ້ນ ມີບັນດາປະເທດອາຊຽນ. ຈີນ ບໍ່ປ່ຽນແປງແນວທາງພັດທະນາສັນຕິພາບຂອງຈີນ, ບໍ່ປ່ຽນແປງທິດນຳການຕ່າງປະເທດ “ໃກ້ຊິດສະຫນິດສະຫນົມ ແລະ ເປັນເພື່ອນກັບປະເທດບ້ານໃກ້ເຮືອນຄຽງ”, ເອົາໃຈໃສ່ເປັນພິເສດເຖິງການເພີ່ມທະວີການຮ່ວມມືຕ່າງຝ່າຍຕ່າງມີຜົນປະໂຫຍດກັບ ອາຊຽນ. ການພັດທະນາຂອງຈີນ ແມ່ນກາລະໂອກາດຂອງອາຊຽນ ແລະ ການພັດທະນາຂອງ ອາຊຽນ ກໍແມ່ນກາລະໂອກາດສຳລັບປະເທດຈີນ.”