​​(vovworld) – ​ໂຄສົກ​ຂອງ​ປະທານ​ກຸ່ມ​ບັນດາ​ລັດຖະມົນຕີ​ການ​ເງິນ ​ພາກ​ພື້ນ​ນຳ​ໃຊ້​ສະກຸນ​ເງິນ​ລວມ ​ເອີ​ລົບ (Eurogroup) Michel Reijns, ວັນ​ທີ 12/08, ຢັ້ງຢືນ​ວ່າ ບັນດາ​ລັດຖະມົນຕີ​ການ​ເງິນ​ຂອງ​ກຸ່ມນີ້ ຈະ​ຈັດ​ກອງ​ປະຊຸມ​ໃນ​ວັນ​ທີ 14/08, ​ເພື່ອ​ຕົກລົງບ້ວງ​ເງິນ​ກູ້​ຊ່ວຍທີ 3 ​ໃຫ້​ເກຼັກ. ຕາມ​ທ່ານ Reijns ​ແລ້ວ, ບັນດາ​ລັດຖະມົນຕີ​ການ​ເງິນ 19 ປະ​ເທດ Eurozone ຈະ​ດຳ​ເນີນ​ກອງ​ປະຊຸມຜິດ​ປົກກະຕິ ​ໃນ​​ເວລາ 13 ​ໂມງ GMT ຢູ່​ບຣຸດ​ແຊນ, ປະ​ເທດ​​ແບນຊິກ ​ເພື່ອ​ຕົກລົງ​ກ່ຽວ​ກັບ​ບ້ວງ​ເງິນ​ກູ້​ຊ່ວຍ​ໃຫ້ Athens ພາຍຫຼັງ​ທີ່​ປະ​ເທດ​ນີ້ ​ແລະ ບັນດາ​ເຈົ້າ​ໜີ້​ສາກົນ​ບັນລຸ​ໄດ້​ຂໍ້​ຕົກລົງ​ຕັກ​ນິກ ຢູ່ Athens ກ່ຽວ​ກັບ​ບ້ວງ​ເງິນ​ກູ້​ຊ່ວຍ​ດ້ວຍ​ຍອດ​ມູນ​ຄ່າ 85 ຕື້​ເອີ​​ໂລ ​ໃນ​ຮອບ​ເວລາ 3 ປີ.

        ຖ້າ​ຫາກ​ Eurozone ​ເຫັນ​ດີ, ​ເກຼັກ ອາດ​ຈະ​ໄດ້​ຮັບ​ບ້ວງ​ເງິນໜູນ​ຊ່ວຍ​ທຳ​ອິດ​ມີ​ມູນ​ຄ່າ​ປະມານ 10 ຕື້​ເອີ​​ໂລ ​ເພຶ່ອຊຳລະ​ໜີ້​ສິນ 3,2 ຕື້​ເອີ​ໂລ ​ໃຫ້​ທະ​ນາຄາ​ນສູນ​ກາງ​ເອີ​ລົບ ​ໃນ​ວັນ​ທີ 20/08 ຈະ​ມາ​ເຖິງ.