ກອງປະຊຸມ “ການພົວພັນຮ່ວມມື ລະຫວ່າງສະພາແຫ່ງຊາດ ຫວຽດນາມ-ລາວ“
(ພາບ:daibieunhandan.vn
)
( vovworld ) – ຕອນເຊົ້າວັນທີ 23/4, ຢູ່ແຂວງ Son La ຊື່ງແມ່ນແຂວງເຂດພູດອຍທາງພາກເໜືອຫວຽດນາມ, ໄດ້ໄຂກອງປະຊຸມລະດັບຊາດທີ່ມີຫົວຂໍ້ວ່າ: “ການພົວພັນຮ່ວມມືລະຫວ່າງສະພາແຫ່ງຊາດຫວຽດນາມ-ລາວ, ສາມັກຄີ-ມິດຕະພາບ“. ທ່ານປະທານສະພາແຫ່ງຊາດຫວຽດນາມ Nguyen Sinh Hung, ທ່ານນາງປະທານສະພາແຫ່ງຊາດລາວ ປານີ ຢາທໍ່ຕູ້ ພ້ອມດ້ວຍຜູ້ແທນ 600 ທ່ານ ຕາງໜ້າໃຫ້ການນຳສອງພັກ, ສອງສະພາແຫ່ງຊາດ ແລະ ບັນດາແຂວງທີ່ມີເສັ້ນຊາຍແດນຮ່ວມລະຫວ່າງສອງປະເທດໄດ້ເຂົ້າຮ່ວມກອງປະຊຸມ.
ກ່າວຄຳເຫັນໄຂກອງປະຊຸມ, ທ່ານປະທານສະພາແຫ່ງຊາດຫວຽດນາມ Nguyen Sinh Hung ເນັ້ນໜັກວ່າ: ກອງປະຊຸມແມ່ນຈຸດເນັ້ນໜັກກ່ຽວກັບການພົວພັນຮ່ວມມືລະຫວ່າງສະພາແຫ່ງຊາດຫວຽດນາມ-ລາວ ໃນ “ປີແຫ່ງຄວາມສາມັກຄີມິດຕະພາບຫວຽດນາມ-ລາວ 2012“. ທ່ານ Nguyen Sinh Hung ເວົ້າວ່າ: “ນີ້ແມ່ນໂອກາດເພື່ອໃຫ້ພວກເຮົາທົບທວນຄືນ ແລະ ເຮັດໃຫ້ນ້ຳໃຈມິດຕະພາບ ຄວາມສາມັກຄີແບບພິເສດລະຫວ່າງຫວຽດນາມ-ລາວ ເລິກເຊີ່ງຂຶ້ນຕື່ມ, ພ້ອມກັນນັ້ນກໍ່ພ້ອມກັນແລກປ່ຽນທິດທາງ, ມາດຕະການຊຸກຍູ້ການພັດທະນາການພົວພັນຮ່ວມມືລະຫວ່າງສອງສະພາແຫ່ງຊາດ ແລະ ການຮ່ວມມືຮອບດ້ານລະຫວ່າງສອງປະເທດ. ການມີໜ້າຂອງບັນດາຜູ້ແທນຂັ້ນສູນກາງ, ຂັ້ນແຂວງ ແລະ ນະຄອນເຂດຊາຍແດນສອງປະເທດທີ່ກອງປະຊຸມແຫ່ງປະຫວັດສາດນີ້ ໄດ້ພິສູດໃຫ້ເຫັນອາລົມຈິດຄວາມຮັກແພງຢ່າງມີຊີວິດຊີວາ ແລະ ເຈດຈຳນົງຕັດສິນໃຈ ຈະສືບຕໍ່ເພີ່ມພູນຄູນສ້າງ ແລະ ພັດທະນານ້ຳໃຈສາມັກຄີລະຫວ່າງຫວຽດນາມ-ລາວ“
ສ່ວນທ່ານນາງ ປານີ ຢາທໍ່ຕູ້ , ກຳມະການກົມການເມືອງ, ປະທານສະພາແຫ່ງຊາດລາວ ໄດ້ເນັ້ນໜັກວ່າ ການພົວພັນແບບພິເສດລະຫວ່າງສອງປະເທດໃນຕະຫຼອດຫຼາຍທົດສະວັດຜ່ານມາ ໄດ້ກາຍເປັນມໍລະດົກອັນລ້ຳຄ່າຂອງສອງຊາດ. ທ່ານນາງ ປານີ ຢາທໍ່ຕູ້ ໄດ້ຕີລາຄາສູງການຊ່ວຍເຫຼືອທີ່ສຳຄັນຂອງ ຫວຽດນາມ ຕໍ່ພາລະກິດປົດປ່ອຍ ແລະ ສ້າງສາປະເທດລາວ: “ໃນທຸກໆໄຊຊະນະຂອງການປະຕິວັດລາວ ລ້ວນແຕ່ໄດ້ຕິດພັນກັບການຊ່ວຍເຫຼືອ, ການສະໜັບສະໜູນຢ່າງແຂງແຮງ, ການເສຍສະຫຼະອັນໃຫ່ຍຫຼວງຂອງປະຊາຊົນ ຫວຽດນາມ ອ້າຍນ້ອງ. ເລື່ອງເຂົ້າຮ່ວມກອງປະຊຸມຄັ້ງນິ້ຢູ່ ຫວຽດນາມ ແມ່ນໂອກາດເພື່ອໃຫ້ພວກຂ້າພະເຈົ້າເຫັນໄດ້ບັນດາຜົນງານຂອງ ຫວຽດນາມ ເວົ້າລວມ ແລະ ຂອງບັນດາແຂວງເຂດຊາຍແດນເວົ້າສະເພາະ. ພວກຂ້າພະເຈົ້າໃຫ້ຄຳໝັ້ນສັນຍາວ່າ ຈະພ້ອມກັບ ຫວຽດນາມ ສືບຕໍ່ເພີ່ມພູນຄູນສ້າງ, ຮັກສາສາຍພົວພັນທີ່ຍິ່ງໃຫ່ຍ, ຄວາມສາມັກຄີແບບພິເສດລະຫວ່າງສອງພັກ, ສອງລັດ ແລະ ປະຊາຊົນສອງປະເທດ.“