(vovworld) - ຕອນເຊົ້າວັນທີ 20/4, ຢູ່ນະຄອນ ເກີນເທີ, ທ່ານ Dinh The Huynh, ກຳມະການກົມການເມືອງ, ເລຂາສູນກາງພັກກອມມູນິດຫວຽດນາມ, ຫົວໜ້າຄະນະໂຄສະນາສຶກສາສູນກາງ ໄດ້ເປັນປະທານກອງປະຊຸມແລກປ່ຽນວຽກງານລະຫວ່າງ ບັນດາແຂວງ, ນະຄອນທາງພາກໃຕ້ ກ່ຽວກັບການຜັນຂະຫຍາຍການປະຕິບັດຄຳສັ່ງເລກທີ 03 – CT/TW ຂອງກົມການເມືອງກ່ຽວກັບການສືບຕໍ່ຍູ້ແຮງການຮ່ຳຮຽນ ແລະ ປະຕິບັດຕາມແບບຢ່າງຄຸນສົມບັດປະທານໂຮ່ຈີມິນ. ກ່າວຄຳເຫັນໄຂກອງປະຊຸມ, ທ່ານ Dinh The Huynh ເນັ້ນໜັກວ່າ: ກອງປະຊຸມຄັ້ງນີ້ແມ່ນເພື່ອແນໃສ່ຕີລາຄາໝາກຜົນໃນເບື້ອງຕົ້ນພາຍຫຼັງ 1 ປີ ແຫ່ງການປະຕິບັດຄຳສັ່ງເລກທີ 03, ພ້ອມທັງເພື່ອເພີ່ມທະວີວຽກງານກວດກາ, ຊຸກຍູ້ ແລະ ຄົ້ນຄ້ວາສະພາບການຕົວຈິງ, ແກ້ໄຂບັນດາຄວາມຫຍູ້ງຍາກ, ຂໍ້ຕິດຂັດ, ເພື່ອສືບຕໍ່ຍູ້ແຮງ, ຍົກສູງຄຸນນະພາບ, ປະສິດທິຜົນວຽກງານຈັດຕັ້ງຜັນຂະຫຍາຍປະຕິບັດຄຳສັ່ງເລກທີ 03 ໃນໄລຍະຈະມາເຖິງ.
ຕາມບົດລາຍງານຂອງບັນດາແຂວງ, ນະຄອນທາງພາກໃຕ້, ເຖິງວ່າໃນເບື້ອງຕົ້ນຍັງມີຄວາມຫຍູ້ງຍາກ, ຂໍ້ຕິດຂັດໃນການຜັນຂະຫຍາຍ, ປະຕິບັດ, ແຕ່ວ່າການຮ່ຳຮຽນ ແລະ ປະຕິບັດຕາມແບບຢ່າງຄຸນສົມບັດປະທານໂຮ່ຈີມິນ ຕາມຈິດໃຈຄຳສັ່ງ 03 ຂອງກົມການເມືອງ ຢູ່ບັນດາທ້ອງຖີ່ນໃນໄລຍະຜ່ານມາຍັງສືບຕໍ່ໄດ້ຮັບການຍູ້ແຮງ, ຜັນຂະຫຍາຍຢ່າງເລິກເຊິ່ງ ກ້ວາງຂວາງ, ສ້າງກຳລັງແຜ່ຂະຫຍາຍຈາກພະນັກງານ, ສະມາຊິກພັກ ຕະຫຼອດຮອດມະຫາຊົນ. ທ່ານ Nguyen Manh Hung, ຮອງເລຂາຄະນະພັກແຂວງ ບິນທ້ວນໃຫ້ຮູ້ວ່າ:
“ຜ່ານການສະຫຼຸບ ໝາກຜົນທີ່ຮັບຮູ້ໄດ້ຄືແນວນີ້: ຈິດໃຈ, ທ່າທີຮັບໃຊ້ຂອງປະຊາຊົນ ແລະ ຄວາມຮັບຜິດຊອບຕໍ່ໜ້າທີ່ໄດ້ຮັບການມອບໝາຍໃຫ້ໄດ້ຮັບການຍົກສູງຂຶ້ນ, ບັນດາບັນຫາຮ້ອນເຮັ່ງ, ຄວາມມຸ້ງມາດປາດຖະໜາອັນຊອບທຳຂອງປະຊາຊົນໄດ້ຮັບການແກ້ໄຂຫຼາຍກ່ວາ, ສະຕິຮັກສາຄຸນນະທາດຄຸນສົມບັດປະຕິວັດໄດ້ຖືກປະຕິບັດເປັນປະຈຳ, ທ່າທີເຮັດວຽກໄດ້ຮັບການປ່ຽນໃໝ່ເທຶ່ອລະກ້າວ”