(ພາບ:infonet.vn)
(vovworld) - ເນື່ອງໃນໂອກາດສະເຫຼີມສະຫຼອງ 40 ປີແຫ່ງວັນສ້າງຕັ້ງສາຍ ພົວພັນທາງການທູດລະຫວ່າງຫວຽດນາມ-ອິນເດຍ, 5 ປີແຫ່ງວັນສ້າງຕັ້ງການພົວພັນຄູ່ຮ່ວມມືຍຸດທະສາດລະຫວ່າງຫວຽດນາມ-ອິນເດຍ, ຕອນເຊົ້າວັນທີ 3/1, ຢູ່ນະຄອນດ່ານັງ, ສະຖານທູດອິນເດຍ ປະຈຳຫວຽດນາມ ສົມທົບກັບຫ້ອງການການຄ້າ ແລະ ອຸດສາຫະກຳຫວຽດນາມ ແລະ ຫ້ອງການການຄ້າ ແລະ ອຸດສາຫະກຳອິນເດຍ ໄດ້ຈັດກອງປະຊຸມສຳມະນາແລກປ່ຽນດ້ານການຄ້າຫວຽດນາມ-ອິນເດຍ.
ມາຮອດປະຈຸບັນ, ອິນເດຍ ແມ່ນໜຶ່ງໃນ 10 ປະເທດຄູ່ຮ່ວມມືການຄ້າໃຫ່ຍຂອງຫວຽດນາມ ດ້ວຍກ່ວາ 60 ໂຄງການລົງທຶນເຂົ້າຫວຽດນາມ. ຮອດປີ 2015, ສອງປະເທດສູ້ຊົນຈະຍົກຍອດວົງເງິນການຄ້າຂຶ້ນ 7 ຕື້ USD. ກ່າວຄຳເຫັນທີ່ກອງປະຊຸມສຳມະນາ, ທ່ານຮ່ວາງວັນຢຸງ ຮອງປະທານຫ້ອງການການຄ້າ ແລະ ອຸດສາຫະກຳຫວຽດນາມ ເນັ້ນໜັກວ່າ:
“ພວກຂ້າພະເຈົ້າຕີລາຄາສູງບົດບາດຂອງບັນດາອົງການສຳນັກງານ, ກະຊວງ, ຂະແໜງການ, ສະຫະສະມາຄົມອິນເດຍ ແລະ ຫວຽດນາມ ໃນການເພີ່ມທະວີ, ຊຸກຍູ້ການພົວພັນດ້ານການຄ້າ, ການລົງທຶນ ແລະ ການພົວພັນແລກປ່ຽນດ້ານເສດຖະກິດ, ວັດທະນະທຳ, ການສຶກສາ….ລະຫວ່າງສອງປະເທດ. ການພົວພັນລະຫວ່າງອິນເດຍ ແລະ ຫວຽດນາມ ຍັງມີຄວາມສາມາດບົ່ມຊ້ອນພັດທະນາໃນໄລຍະຈະມາເຖິງ. ພື້ນຖານຂອງການພົວພັນອັນເປັນມູນເຊື້ອຍາວນານລະຫວ່າງອິນເດຍ ແລະ ຫວຽດນາມ, ນະໂຍບາຍມຸ້ງໄປເຖິງເຂດຕາເວັນອອກຂອງອິນເດຍ ກໍ່ຄືພາລະກິດປ່ຽນແປງໃໝ່ຂອງຫວຽດນາມ ແມ່ນບັນດາປັດໄຈສະດວກນຳມາເຊິ່ງກາລະໂອກາດຊຸກຍູ້ການພົວພັນລະຫວ່າງສອງປະເທດ“