ການນຳບັນດາປະເທດ ກູບາ, ໄທ, ຍີ່ປຸ່ນ, ສ. ເກົາຫຼີ ແລະ ການນຳພັກກອມມູນິດ ເກຼັກ ໄດ້ສົ່ງໂທລະເລກແບ່ງເບົາຄວາມເສົ້າສະຫຼົດໃຈເຖິງການນຳ ພັກ, ລັດ, ລັດຖະບານ, ສະພາແຫ່ງຊາດ, ປະຊາຊົນ ຫວຽດນາມ ແລະ ຄອບຄົວທ່ານອະດີດເລຂາທິການໃຫຍ່ ໂດ໊ເມື່ອຍ.

        ໃນນັ້ນ, ທ່ານ Miguel Diaz Canel, ປະທານສະພາແຫ່ງລັດ ແລະ ສະພາລັດຖະມົນຕີປະເທດ ສ. ກູບາ ໄດ້ສົ່ງຄຳແບ່ງເບົາຄວາມເສົ້າສະຫຼົດໃຈເຖິງທ່ານນາຍົກລັດຖະມົນຕີ ຫງວຽນຊວນຟຸກ ແລະ ທ່ານນາງຮັກສາການປະທານປະເທດ ດັ້ງທິງອັກທິ້ງ. ເນື້ອໃນໂທລະເລກມີຕອນຂຽນວ່າ: “ໂດຍຕາງໜ້າໃຫ້ປະຊາຊົນ ແລະ ລັດຖະບານ ກູບາ, ຂ້າພະເຈົ້າຂໍຝາກຄຳແບ່ງເບົາຄວາມເສົ້າສະຫຼົດໃຈທີ່ສຸດຊືງຕໍ່ການຈາກໄປຂອງທ່ານອະດີດເລຂາທິການໃຫຍ່ ໂດ໊ເມື່ອຍ. ພວກຂ້າພະເຈົ້າຍາມໃດກໍ່ຈົດຈຳການປະກອບສ່ວນຂອງທ່ານອະດີດເລຂາທິການໃຫຍ່ ໂດ໊ເມື່ອຍ ໃຫ້ແກ່ການພັດທະນາຂອງການພົວພັນປະຫວັດສາດມິດຕະພາບ ແລະ ຖານອ້າຍນ້ອງອັນຍາວນານລະຫວ່າງ ຫວຽດນາມ ແລະ ກູບາ.”

        ທ່ານນາຍົກລັດຖະມົນຕີ ລາຊະອານາຈັກ ໄທ ປຣາຢຸດ ຈັນໂອຊາ ກໍ່ໄດ້ສົ່ງໂທລະເລກແບ່ງເບົາຄວາມເສົ້າສະຫຼົດໃຈມາຍັງທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ. ແລະ ກໍ່ໃນວັນດຽວກັນ, ລັດຖະມົນຕີມົນຕີການຕ່າງປະເທດ ໄທ ກໍ່ໄດ້ສົ່ງໂທລະເລກມາຍັງລັດຖະມົນຕີການຕ່າງປະເທດ ຫວຽດນາມ. ໃນໂທລະເລກ, ການນຳໄທ ໄດ້ຕີລາຄາສູງບັນດາການປະກອບສ່ວນອັນໃຫຍ່ຫຼວງຂອງທ່ານອະດີດເລຂາທິການໃຫຍ່ ໂດ໊ເມື່ອຍ ໃຫ້ແກ່ພາລະກິດແຫ່ງການປ່ຽນແປງໃໝ່ຂອງ ຫວຽດນາມ ແລະ ສ້າງພື້ນຖານຢ່າງໝັ້ນຄົງໜັກແໜ້ນໃຫ້ແກ່ການພົວພັນຄູ່ຮ່ວມມືຍຸດທະສາດລະຫວ່າງ ຫວຽດນາມ ແລະ ໄທໃນປະຈຸບັນ.

        ການນຳ ຍີ່ປຸ່ນ ກໍ່ໄດ້ສົ່ງໂທລະເລກແບ່ງເບົາຄວາມເສົ້າສະຫຼົດໃຈເຖິງການນຳ ຫວຽດນາມ, ໃນໂທລະເລກໄດ້ຂຽນວ່າ: ການນຳ ຍີ່ປຸ່ນ ໄດ້ຕີລາຄາທ່ານອະດີດເລຂາທິການໃຫຍ່ ໂດ໊ເມື່ອຍ ແມ່ນການນຳຜູ້ທີ່ມີຄວາມປີຊາສາມາດ, ມີຄຸນງາມຄວາມດີອັນໃຫຍ່ຫຼວງໃນການພັດທະນາປະເທດ ຫວຽດນາມ, ສະຫງວນຄວາມເອົາໃຈໃສ່ຢ່າງເລິກເຊິ່ງຕໍ່ການພັດທະນາໃນການພົວພັນລະຫວ່າງ ຫວຽດນາມ ແລະ ຍີ່ປຸ່ນ.

        ການນຳ ສ. ເກົາຫຼີ; ຄະນະບໍລິຫານງານສູນກາງພັກກອມມູນິດ ເກຼັກ, ການນຳ ມຽນມາ ກໍ່ໄດ້ສົ່ງໂທລະເລກແບ່ງເບົາຄວາມເສົ້າສະຫຼົດໃຈມາຍັງການນຳພັກ, ລັດ, ລັດຖະບານ, ສະພາແຫ່ງຊາດ, ປະຊາຊົນ ຫວຽດນາມ ແລະ ຄອບຄົວທ່ານອະດີດເລຂາທິການໃຫຍ່ ໂດ໊ເມື່ອຍ ເຊັ່ນດຽວກັນ.