(vovworld) – ຕອນບ່າຍວັນທີ 13/06, ຢູ່ຮ່າໂນ້ຍ, ຄະນະກຳມະການສູນກາງແນວໂຮມປະເທດຊາດຫວຽດນາມ ໄດ້ຮັບຈຳນວນເງິນສະໜັບສະໜູນ 4 ຕື້ດົງຈາກກຸ່ມບໍລິສັດຕຳແຜ່ນຕັດຫຍິບຫວຽດນາມ ແລະ ຄະນະກຳມະການແນວໂຮມປະເທດຊາດແຂວງຮ່ວາບິ່ງ. ກ່າວຄຳເຫັນທີ່ພິທີ, ທ່ານ ຫງວຽນທ້ຽນເຍີນ, ກຳມະການກົມການເມືອງ, ປະທານຄະນະກຳມະການສູນກາງແນວໂຮມປະເທດຊາດຫວຽດນາມ ເນັ້ນໜັກວ່າ, ການປະກອບສ່ວນ, ສະໜັບສະໜູນຂອງບັນດາອົງການ, ບຸກຄົນແມ່ນຂອງຂວັນທີ່ລ້ຳຄ່າໄດ້ປະກອບສ່ວນແບ່ງປັນ, ປຸກລະດົມ, ເຮັດໃຫ້ຊາວປະມົງ, ກຳລັງກວດກາການປະມົງ, ຕະຫຼວດທະເລພວມປະຕິບັດໜ້າທີ່ຢູ່ທະເລມີຄວາມອຸ່ນອ່ຽນໃຈ.
ໃນຂະນະນັ້ນ, ພະນັກງານ, ພາລະກອນ, ຄົນງານ ແລະ ປະຊາຊົນແຂວງດົ່ງທ໋າບ ໄດ້ສະໜັບສະໜູນກອງທຶນ “ເພື່ອອະທິປະໄຕສັກກະລະບູຊາຂອງປະເທດຊາດ” ດ້ວຍຈຳນວນເງິນກວ່າ 2 ຕື້ດົງ ເພື່ອຊ່ວຍໃຫ້ຊາວປະມົງແກ້ໄຂຄວາມຫຍຸ້ງຍາກ, ຕິດພັນກັບທະເລເພື່ອປົກປັກຮັກສາອະທິປະໄຕທະເລ, ໝູ່ເກາະຂອງປະເທດຊາດ.
ວັນທີ 13/06, ຢູ່ຫໍພິພິທະພັນແຂວງລ້າງເຊີນ ໄດ້ຈັດງານວາງສະແດງດ້ວຍຫົວຂໍ້ວ່າ “ອະທິປະໄຕຊາຍແດນ - ທະເລ, ໝູ່ເກາະຂອງບ້ານເກີດເມືອງນອນຫວຽດນາມ” ເຊິ່ງລວມມີບັນດາຮູບຖ່າຍ, ວັດຖຸພັນ, ວັດຖຸບູຮານ, ເອກະສານບູຮານ ກ່ຽວກັບອະທິປະໄຕຢູ່ເຂດດິນຕໍ່ແຜນ ແລະ ອະທິປະໄຕເຂດທະເລ, ໝູ່ເກາະຂອງຫວຽດນາມ. ໃນນັ້ນໄດ້ວາງສະແດງບາງຮູບຖ່າຍກ່ຽວກັບເລື່ອງຈີນ ຕັ້ງຮ້ານເຈາະນ້ຳມັນໄຮ່ຢາງ 981 ຢ່າງຜິດກົດໝາຍໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ. ງານວາງສະແດງຈະເປີດປະຕູຮອດວັນທີ 30/06/2014 ຈຶ່ງຈະອັດລົງ.
ຕອນຄໍ່າວັນທີ 13/06, ຢູ່ນະຄອນໂຮ່ຈິມິນ, ໄດ້ຈັດງານພົບປະແລກປ່ຽນ ແລະ ໂຄສະນາບັນດາຮູບເງົາດ້ວຍຫົວຂໍ້ “ມຸ່ງໄປສູ່ເຂດທະເລ, ໝູ່ເກາະຂອງບ້ານເກີດເມືອງນອນ”. ລາຍການໄດ້ແນະນຳຟິມຮູບເງົາເອກະສານອັນລ້ຳຄ່າບາງເລື່ອງກ່ຽວກັບເຂດທະເລ, ໝູ່ເກາະຂອງປະເທດຊາດ.