(vovworld) – ວັນທີ 19/5, ສະເຫຼີມສະຫຼອງ 122 ປີແຫ່ງວັນຄ້າຍວັນເກີດປະທານໂຮ່ຈີມິນ - ນັກວິລະຊົນປົດປ່ອຍຊາດ, ນັກວັດທະນະທຳຂອງໂລກ. ໃນຊຸມວັນນີ້, ມີການເຄື່ອນໄຫວຕ່າງໆຖືກດຳເນີນໄປໃນໂລກ ກໍຄືຢູ່ບັນດາແຂວງ, ນະຄອນທົ່ວປະເທດຂອງຫວຽດນາມ.
ທີ່ນະຄອນ ໂຮ່ຈີມິນ, ຕອນຄ່ຳວັນທີ 18/5, ໄດ້ດຳເນີນຮອບຊິງສະຫຼະເລີດ ແລະ ມອບລາງວັນການເສັງຊອກຮູ້ລັດທິ ມາກ - ເລນິນ ແລະ ແນວຄິດ ໂຮ່ຈີມິນ ໂດຍຄະນະຊາວໜຸ່ມນະຄອນ ໂຮ່ຈີມິນຈັດຕັ້ງເນື່ອງໃນໂອກາດສະເຫຼີມສະຫຼອງ 122 ປີແຫ່ງວັນຄ້າຍວັນເກີດປະທານ ໂຮ່ຈີມິນ. ນ້ອງ Le Huu Trang, ນັກສຶກສາ ສັງກັດມະຫາວິທະຍາໄລປ້ອງກັນຄວາມສະຫງົບປະຊາຊົນ ຍາດໄດ້ລາງວັນທີ່ 1 ໃນການເສັງສ່ວນບຸກຄົນຜ່ານເຄືອຂ່າວ ອິນເຕີເນັດ ແບ່ງປັນວ່າ:
“ຂ້າພະເຈົ້າມ່ວນຊື່ນທີ່ສຸດເມື່ອບັນລຸໄດ້ລາງວັນທີ 1 ຂອງການເສັງນີ້, ຜ່ານບັນດາຄວາມຮູ້ໂດຍພື້ນຖານທີ່ໄດ້ຮຽນຢູ່ໂຮງຮຽນ ແລະ ຜ່ານການເສັງຄັ້ງນີ້, ຂ້າພະເຈົ້າຮັບເອົາຄວາມຮູ້ໄດ້ຫຼາຍຢ່າງກ່ວາເພື່ອຊ່ວຍໃຫ້ຂ້າພະເຈົ້າມີຄວາມຮູ້ກ່ຽວກັບລັດທິ ມາກ, ເລນິນ ແລະ ແນວຄິດໂຮ່ຈີມິນ ຢ່າງສົມບູນກ່ວາ. ແລະ ບັນດາຄວາມຮູ້ດັ່ງກ່າວຈະຊ່ວຍໃຫ້ຂ້າພະເຈົ້າຮຽນດີກ່ວາໃນ 5 ປີທີ່ຮຽນຢູ່ມະຫາວິທະຍາໄລປ້ອງກັນຄວາມສະຫງົບປະຊາຊົນ”
ສະຖານທູດຫວຽດນາມ ປະຈຳ ຝຣັ່ງ ໄດ້ວາງພວງມາລາ ຢູ່ອະນຸສາວະລີລຸງໂຮ່
ຢູ່ຝຣັ່ງ, ວັນທີ 18/5, ສະຖານທູດຫວຽດນາມ ປະຈຳ ຝຣັ່ງ, ບັນດາອົງການຕາງໜ້າຂອງຫວຽດນາມ ຢູ່ຝຣັ່ງ ແລະ ພໍ່ແມ່ພີ່ນ້ອງຊາວຫວຽດນາມ ອາໄສຢູ່ຝຣັ່ງ ແລະ ເພື່ອນມິດ ຝຣັ່ງທີ່ຮັກແພງກັບ ຫວຽດນາມ ໄດ້ຈັດຕັ້ງພິທີຖະຫວາຍທູບທຽນ ຢູ່ຮ້ານບູຊາປະທານ ໂຮ່ຈີມິນ ໃນບໍລິເວນຂອງສະຖານທູດ, ວາງພວງມາລາ, ອາໄລຫາຢູ່ບ່ອນທີ່ປະທານໂຮ່ຈີມິນ ຢູ່ອາໄສ ໃນຕະຫຼອດໄລຍະດຳລົງຊີວິດ, ເຮັດວຽກ ແລະ ເຄື່ອນໄຫວປະຕິວັດຢູ່ ຝຣັ່ງ. ແລະກໍໃນວັນດຽວກັນ, ພະນັກງານ, ພາລະກອນສະຖານທູດຝຣັ່ງ, ບັນດາອົງການຕາງໜ້າຂອງຫວຽດນາມ ປະຈຳ ຝຣັ່ງ ໄດ້ວາງພວງມາລາ ຢູ່ອະນຸສາວະລີລຸງໂຮ່ ທີ່ສວນສະທາລະນະ Montreuil, ຢູ່ນະຄອນ Montreuil, ຊານນະຄອນ ປາຣີ. ກ່າວຄຳເຫັນຢູ່ທີ່ນີ້, ທ່ານເອກອັກຄະລັດຖະທູດ Duong Chi Dung ເວົ້າວ່າ:
“ຄາວຍັງມີຊີວິດຢູ່, ປະທານ ໂຮ່ຈີມິນ ຍາມໃດກໍສູ້ຊົນ ເພື່ອຄວາມມິດຕະພາບ ແລະ ການຮ່ວມມືລະຫວ່າງຫວຽດນາມ - ຝຣັ່ງ ແລະ ລະຫວ່າງປະຊາຊົນ 2 ປະເທດພວກເຮົາ. ໃນເຂດດິນນີ້, ກ່ອນນີ້ 100 ປີ, ປະທານ ໂຮ່ຈີມິນ ໄດ້ມາຊອກຫາເສັ້ນທາງປົດປ່ອຍຊາດໃຫ້ແກ່ປະເທດຊາດ ແລະ ປະຊາຊົນຫວຽດນາມ. ໃນເຂດດິນນີ້, ເພີ່ມໄດ້ປະໄວ້ບັນດາອະນຸສອນທີ່ບໍ່ອາດຫຼົງລືມໄດ້. ຂ້າພະເຈົ້າຫວັງວ່າ: ໃນບັນຍາກາດສັນຕິພາບ, ມິດຕະພາບ ແລະ ການຮ່ວມມື ເຊິ່ງປະທານໂຮ່ຈີມິນ ໄດ້ສູ້ຊົນປະຕິບັດ, ພວກເຮົາຈະເປີດໄລຍະໃໝ່ໃຫ້ແກ່ການພົວພັນສະໜິດຕິດພັນລະຫວ່າງ 2 ຊາດພວກເຮົາ.”
ເນື່ອງໃນໂອກາດນີ້, ສະຖານທູດຫວຽດນາມປະຈຳຈີນ ແລະ Angieri ກໍຈັດຕັ້ງພິທີສະເຫຼີມສະຫຼອງ 122 ປີແຫ່ງວັນຄ້າຍວັນເກີດປະທານ ໂຮ່ຈີມິນ.
ຢູ່ເຂດອະນຸສອນສະຖານ ເລນິນ ຢູ່ນະຄອນ Ulianopxco, ແຂວງ Ulianopxco, ສະຫະພັນ ລັດເຊຍ ໄດ້ໄຂງານວາງສະແດງ “ໂຮ່ຈີມິນ - ນັກວິລະຊົນປົດປ່ອຍຊາດຫວຽດນາມ, ນັກວັດທະນະທຳທີ່ດີເດັ່ນ”. ງານວາງສະແດງໄດ້ວາງສະແດງ 120 ຮູບພາບ, ເອກະສານ, ວັດຖຸພັນ ແລະ ຟິບຮູບເງົາເອກະສານແນະນຳກ່ຽວກັບປະທານໂຮ່ຈີມິນ ແລະ ແນະນຳກ່ຽວກັບຄວາມສາມັກຄີ, ມິດຕະພາບ ແລະ ການຮ່ວມມືຮອງດ້ານລະຫວ່າງຫວຽດນາມ ແລະ ໂຊວຽດໃນເມື່ອກ່ອນ...
ຕອນເຊົ້າວັນທີ 18/5, ສະມາຄົມຊາວກຳປູເຈຍ ເຊື້ອຊາດຫວຽດນາມ ຢູ່ນະຄອນຫຼວງ ພະນົມເປັນກໍຈັດຕັ້ງພິທີສະເຫຼີມສະຫຼອງ 122 ປີແຫ່ງວັນຄ້າຍວັນເກີດປະທານ ໂຮ່ຈີມິນ.
ແລະກໍໃນວັນທີ 19/5, ສະມາຄົມຊາວຫວຽດນາມ ອາໄສຢູ່ແຂວງ ອູດອນທານີ ໄດ້ສົມທົບກັບສະຖານທູດຫວຽດນາມປະຈຳໄທ ແລະ ອຳນາດການປົກຄອງທ້ອງຖີ່ນ ໄດ້ເປີດສະຫຼອງເຮືອນວາງສະແດງກ່ຽວກັບການເຄື່ອນໄຫວຂອງລຸງໂຮ່ ຢູ່ໄທ.
ເນື່ອງໃນໂອກາດສະເຫຼີມສະຫຼອງ 122 ປີແຫ່ງວັນຄ້າຍວັນເກີດປະທານ ໂຮ່ຈີມິນ, ບັນດາໜັງສືພິມຂອງລາວ ໄດ້ມີບົດຂຽນຫຼາຍບົດກ່ຽວກັບບັນດາຄຸນງາມຄວາມດີອັນໃຫຍ່ຫຼວງຕໍການປະຕິວັດຫວຽດນາມ ແລະ ປະຕິວັດລາວ ແລະ ແບບຢ່າງຄຸນສົມບັດຂອງເພີ່ນ.