ຂໍ້ຕົກລົງຢຸດຍິງຢູ່ຊີຣີ ຖືກທຳລາຍ
(ພາບ:viet.rfi.fr)
(VOV)- ວັນທີ 28/10, ຊີຣີ ສືບຕໍ່ຕົກເຂົ້າສູ່ສະພາບການໃຊ້ຄວາມຮຸນແຮງດ້ວຍບັນດາເຫດວາງລະເບີດລົດໂອໂຕ, ການບຸກໂຈມຕີທາງອາກາດ, ການປະທະກັນລະຫວ່າງກຳລັງລັດຖະບານ ແລະ ກຳລັງຝ່າຍຄ້ານ. ນີ້ແມ່ນມື້ທີ 3 ຢ່າງລຽນຕິດທີ່ຂໍ້ຕົກລົງຢຸດຍິງໃນໂອກາດງານບຸນ Eid al Adha ຖືກລະເມີດ. ໃນສະພາບການທີ່ຂໍ້ຕົກລົງຢຸດຍິງເປັນເວລາ 4 ວັນໃນໂອກາດງານບຸນ Eid al Adha ຖືກທຳລາຍໂດຍໄວນັ້ນ, ວົງການນັກການທູດໃຫ້ຮູ້ວ່າ: ທູດພິເສດສາກົນ Brahimi ພວມຊອກຫາບັນດາຄວາມມານະພະຍາຍາມໃໝ່ເພື່ອແກ້ໄຂວິກິດການທີ່ໄດ້ແກ່ຍາວໃນ 19 ເດືອນຜ່ານມາຢູ່ຊີຣີ.
ຕາມການສະຖິຕິຂອງອົງການຕິດຕາມກວດກາສິດທິມະນຸດຊີຣີ (SOHR) ຊື່ງມີສຳນັກງານຕັ້ງຢູ່ປະເທດອັງກິດ, ໃນວັນທີ 28/10, ໃນທົ່ວເຂດດິນແດນຊີຣີ ມີຢ່າງໜ້ອຍສຸດ 99 ຄົນເສຍຊີວິດ, ໃນນັ້ນມີທະຫານ 35 ຄົນ, ມືປືນຝ່າຍຄ້ານ 35 ຄົນ ແລະ ສາມັນຊົນ 30 ຄົນ. ກອງທັບຊີຣີ ໄດ້ຍົກອອກຄຳກ່າວຫາຢ່າງແຮງວ່າ: ບັນດາພາກສ່ວນຫົວຮຸນແຮງໄດ້ລະເມີດຂໍ້ຕົກລົງຢຸດຍິງຢ່າງຮ້າຍແຮງ, ສະນັ້ນ, ກອງທັບມີໜ້າທີ່ຕ້ອງບຸກໂຈມຕີ “ກຸ່ມກໍ່ການຮ້າຍ“ ນີ້ຢ່າງຂ້ຽວຂາດ.