(vovworld) - ໃນຂອບເຂດການຢ້ຽມຢາມ ແລະ ເຮັດວຽກຢູ່ ໂອຕຣິດ ໃນລະຫວ່າງວັນທີ 11 – 13/9, ຄະນະສະມາຊິກສະພາແຫ່ງຊາດ ຫວຽດນາມ ໂດຍທ່ານຮອງປະທານສະພາແຫ່ງຊາດ ຮີ່ງງອກເຊີນ ນຳໜ້າ, ເຈລະຈາກັບປະທານຜູ້ທີ 2 ສະພາຕຳ່ ໂອຕຣິດ ທ່ານ Karlheinz Kopf ກ່ຽວກັບບັນດາບັນຫາທີ່ທັງ 2 ຝ່າຍຕ່າງມີຄວາມສົນໃຈ. ທີ່ການເຈລະຈາ, ທ່ານຮອງປະທານສະພາແຫ່ງຊາດ ຮີ່ງງອກເຊີນ ສະເໜີໃຫ້ສະພາຕຳ່ ໂອຕຣິດ ສືບຕໍ່ເອົາໃຈໃສ່ ແລະ ສະໜັບສະໜູນເລື່ອງບຸລິມະສິດ ODA ສຳລັບ ຫວຽດນາມ ໃນໄລຍະຈະມາເຖິງ. ທ່ານ ຮີ່ງງອກເຊີນ ເນັ້ນໜັກວ່າ: ຫວຽດນາມ ປາດຖະໜາວ່າ: ສ. ໂອຕຣິດ ເອົາໃຈໃສ່ກ່ວາອີກເຖິງສະຖຽນລະພາບໃນພາກພື້ນ, ຄວາມປອດໄພໃນການເດີນທະເລຢູ່ທະເລຕາເວັນອອກ, ສະໜັບສະໜູນທັດສະນະຂອງ ຫວຽດນາມ ໃນການແກ້ໄຂບັນດາຄວາມຂັດແຍ້ງກັນບົນທະເລໂດຍສັນຕິວິທີ, ບົນພື້ນຖານກົດໝາຍສາກົນ, ໃນນັ້ນມີສົນທິສັນຍາຂອງ ສປຊ ກ່ຽວກັບກົດໝາຍວ່າດ້ວຍທະເລປີ 1982, ຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC), ມຸ່ງໄປເຖິງການສ້າງປະມວນຂໍ້ກຳນົດກ່ຽວກັບການປະພຶດຢູ່ທະເລຕາເວັນອອກ (COC). ທ່ານຮອງປະທານສະພາແຫ່ງຊາດ ຮີ່ງງອກເຊີນ ກໍ່ສະເໜີໃຫ້ ໂອຕຣິດ ດ້ວຍຖານະເປັນປະເທດມີທ່າແຮງ ກ່ຽວກັບກົດໝາຍສາກົນ ແບ່ງປັນບົດຮຽນ ແລະ ໃຫ້ຄຳປຶກສາກ່ຽວກັບກົດໝາຍໃຫ້ ຫວຽດນາມ. ປະກອບສ່ວນຍົກສູງການພົວພັນລະຫວ່າງ 2 ປະເທດ, 2 ສະພາແຫ່ງຊາດ. ທ່ານຮອງປະທານສະພາແຫ່ງຊາດ ຮີ່ງງອກເຊີນ ສະເໜີໃຫ້ເພີ່ມທະວີການແລກປ່ຽນຄະນະຜູ້ແທນທຸກຂັ້ນລະຫວ່າງສະພາແຫ່ງຊາດ ຫວຽດນາມ ແລະ ສະພາຕຳ່ ໂອຕຣິດ ເວົ້າສະເພາະ ແລະ ລັດຖະສະພາ ໂອຕຣິດ ເວົ້າລວມ, ສືບຕໍ່ເສີມຂະຫຍາຍກົນໄກທາບທາມຄວາມເຫັນ ແລະ ສົມທົບກັນຢ່າງແໜ້ນແຟ້ນຢູ່ບັນດາເວທີປາໄສຫຼາຍຝ່າຍ... ທ່ານຮອງປະທານສະພາແຫ່ງຊາດ ກໍ່ສະເໜີລັດຖະສະພາ ໂອຕຣິດ ໃຫ້ສັດຕະຍາບັນສັນຍາຄູ່ຮ່ວມມື, ຮ່ວມມືຮອບດ້ານ (PCA) ທີ່ໄດ້ລົງນາມລະຫວ່າງ ຫວຽດນາມ ແລະ ອີຢູ ໃນເດືອນ 6/2012 ໂດຍໄວ, ຊຸກຍູ້ເພື່ອໃຫ້ສັນຍາການຄ້າເສລີ (FTA) ລະຫວ່າງ ຫວຽດນາມ ແລະ ອີຢູ ສາມາດສິ້ນສຸດໃນເດືອນ 10/2014, ສະໜັບສະໜູນເລື່ອງ ອີຢູ ຮັບຮອງກົດລະບຽບເສດຖະກິດການຕະຫຼາດຂອງ ຫວຽດນາມ.