ຈັດການປະຊຸມຂ່າວງານຕະຫຼາດນັດວາງສະແດງກໍ່ສ້າງ ແລະ ພັດທະນາ ເຂດທົ່ງພຽງແມ່ນ້ຳຂອງ
( ພາບ: baodientu.chinhphu.vn)
|
( vovworld ) - ຕອນບ່າຍວັນທີ 8/3, ຢູ່ນະຄອນເກີນເທີ, ຄະນະຊີ້ນຳເຂດຕາເວັນຕົກຂອງພາກໃຕ້ຫວຽດນາມ ໄດ້ຈັດກອງປະຊຸມຂ່າວງານຕະຫຼາດນັດວາງສະແດງຜົນງານ 10 ປີແຫ່ງວັນສ້າງຕັ້ງ ແລະ ພັດທະນາເຂດທົ່ງພຽງແມ່ນນ້ຳຂອງ. ງານວາງສະແດງດັ່ງກ່າວແມ່ນສົມທົບກັບການຈັດພິທີສະເຫຼີມສະຫຼອງ 37 ປີແຫ່ງວັນປົກປ່ອຍພາກໃຕ້ຢ່າງສົມບູນ, ໂຮມປະເທດຊາດເປັນເອກະພາບ. ງານຕະຫຼາດນັດຄັ້ງນີ້ຈະດຳເນີນແຕ່ວັນທີ 27/4 ຫາວັນທີ 1/5 ປີ 2012 ຢູ່ນະຄອນ ເກີນເທີ. ນີ້ແມ່ນເຫດການທີ່ສຳຄັນດ້ານການເມືອງ, ເສດຖະກິດ, ວັດທະນະທຳສັງຄົມ, ປ້ອງກັນຊາດປ້ອງກັນຄວາມສະຫງົບຂອງເຂດທົ່ງພຽງແມ່ນ້ຳຂອງ ເພື່ອແນໃສ່ສະຫຼຸບຕີລາຄາ 10 ປີແຫ່ງການປະຕິບັດມະຕິເລກທີ 21 ຂອງກົມການເມືອງ ກ່ຽວກັບການພັດທະນາເສດຖະກິດສັງຄົມ, ປ້ອງກັນຊາດປ້ອງກັນຄວາມສະຫງົບຂອງເຂດທົ່ງພຽງແມ່ນ້ຳຂອງໄລຍະ 2000 – 2010. ໄປຄຽງຄູ່ບັນດາການເຄື່ອນໄຫວວາງສະແດງ, ງານຕະຫຼາດນັດຄັ້ງນີ້ ນອກຈາກມີຮ້ານວາງສະແດງກວ່າ 700 ຮ້ານ ຍັງມີບັນດາການສຳມະນາດ້ວຍຫຼາຍຫົວຂໍ້ເພື່ອແນໃສ່ຊີ້ໃຫ້ເຫັນບັນດາຄວາມສາມາດບົ່ມຊ້ອນ, ທ່າແຮງຂອງເຂດທົ່ງພຽງແມ່ນ້ຳຂອງໃນໄລຍະໃໝ່; ດຶງດູດບັນດາແຫຼ່ງກຳລັງພັດທະນາເພື່ອພັດທະນາເຂດໃນໄລຍະທີ່ຈະມາເຖິງ. ທ່ານຮອງນາຍົກລັດຖະມົນຕີ ວູວັນນິງ ເວົ້າວ່າ.
“ ຄະນະຊີ້ນຳວຽກງານວາງສະແດງຜົນງານດ້ານເສດຖະກິດຂອງເຂດທົ່ງພຽງແມ່ນ້ຳຂອງຄວນສຸມໃສ່ສ້າງແຜນການຢ່າງລະອຽດ, ສືບຕໍ່ກວດກາຄືນບັນດາແຜນການທີ່ຍັງເຫຼືອ ເພື່ອປະຕິບັດຢ່າງຮີບດ່ວນ, ແລ້ວກໍ່ຊຸກຍູ້ບັນດາກະຊວງ, ຂະແໜງການ ແລະ ທ້ອງຖິ່ນຕ່າງໆ ເພື່ອເຮັດແນວໃດຮັບປະກັນບັນລຸເນື້ອໃນທີ່ໄດ້ວາງອອກໃນແຜນການເຊິ່ງຄະນະຈັດຕັ້ງງານວາງສະແດງໄດ້ອະນຸມັດຜ່ານ, ສ່ວນບັນຫາທີ່ເກີດຂຶ້ນໃໝ່ ພວກເຮົາຕ້ອງຜັນຂະຫຍາຍຕໍ່ໄປແຕ່ນີ້ຮອດເວລາທີ່ພວກເຮົາຈັດຕັ້ງກອງປະຊຸມໃນທ້າຍເດືອນເມສາ”.